SONAHA ma pangahapmu porini ham mandapot surat humbani hasomanmu? Hinan, ongga do si Timoteus mandapot surat humbani apostel Paulus. Sonari itanda hita do surat ai gabe buku 2 Timoteus ibagas Bibel. Dob mandapot surat ai, tontu sihol do uhur ni si Timoteus mambotoh isini. Ra do ninuhurni, ‘Sonaha do baritani si Paulus? Ai dong do podahni na boi mangurupi ahu ase marhasil mandalankon tugas? Sonaha surat on boi mangurupi ahu ibagas pangidangion ampa mangurupi na legan?’ Ibalosi do sungkun-sungkun ai ibagas surat ai. Bani artikel on, iulas hita ma piga-piga humbani podah ai.

Jadi, mulai ma ibasa si Timoteus surat ai. Gabe malas ma uhurni halani ijai isobut si Paulus do ia ‘anak na hinaholonganni’. Gabe ibotoh si Timoteus ma sari do hape si Paulus hu bani. (2 Tim. 1:2) Sanggah si Timoteus mandapot surat ai hira-hira tahun 65 M, ra do domma marumur 30 tahun lobih ia, janah domma dokah ia gabe sintua. Leganni ai, ongga do ia mangkasomani si Paulus ibagas pangidangion sadokah sapuluh tahun lobih. Jadi, domma bahat na iparlajari ia humbani si Paulus.

Gabe tarojur do si Timoteus dob mambotoh totap do si Paulus setia hassi pe bahat sitarononni. Sanggah ai, ipenjarahon do si Paulus i Rom, janah tongkin nari iuhum matei ma ia. (2 Tim. 1:15, 16; 4:6-8) Tapi bani suratni ihatahon si Paulus do, “Hutaron do haganupan in.” (2 Tim. 2:8-13) Hunjon ibotoh si Timoteus ma barani do si Paulus. Hita pe gabe toguh do homa uhurta dob mambotoh siusihan na ibahen si Paulus ai.

Iojur si Paulus do ase ihargai si Timoteus tugasni ibagas pangidangion. Ihatahon do “ase iparatah-ratah [si Timoteus] sibere-bere ni Naibata” na dong bani. (2 Tim. 1:6) Hata “sibere-bere” ijon anggo itonggor hita bani bahasa Junani, ai ma khaʹri·sma. On maksudni sibere-bere na ibere hubani sasahalak halani silayak-layakni halak na mambere ai. Jadi domma ijalo si Timoteus sibere-bere ai sanggah ia mandapot tugas na ponting.​—1 Tim. 4:14.

 Sanggah ihatahon si Paulus ase ‘iparatah-ratah si Timoteus sibere-bere ni Naibata’, aha do maksudni ai? Bani bahasa Junani ai mangartihon ase ibahen si Timoteus sibere-bere ni Naibata ai songon gara ni apuy ibagas uhurni. Sanggah ibasa si Timoteus surat ai, ra do mintor ibayangkon ia apuy na igunahon i rumah laho mandadang. Ase boi totap gara apuyni, sipata maningon ijungkit do narnarni. Bani sada kamus kata kerja Junani (a·na·zo·py·reʹo) na igunahon si Paulus ijon mangartihon “ringgas mangkorjahon sada tugas”. Jadi sasintongni on do na laho ihatahon si Paulus hubani si Timoteus, ‘Humbani gok ni uhurmu ma horjahon tugasmu.’ Sonari pe, maningon sonai ma homa na ibahen hita. Maningon ringgas ma hita ibagas pangidangion.

Leganni ai dong ope podah na ibere si Paulus hubani si Timoteus ase marhasil ia mandalankon tugasni. Nini si Paulus ma, “Ramotkon ma arta na madear, na pinasimpankon in bam marhitei tonduy na pansing, na marianan ibagas hita.” (2 Tim. 1:14) Arta aha do na domma ibere hubani si Timoteus? Bani ayat sebelumni, ihatahon si Paulus do ase ijolom si Timoteus “hata hasintongan” na dong bani Na Tarsurat in. (2 Tim. 1:13) Halani sintua si Timoteus, maningon iajarhon ia do hasintongan ai hubani sanina botou ampa hubani halak na legan. (2 Tim. 4:1-5) Sobali ai, maningon iparmahani ia do homa biribiri ni Naibata. (1 Ptr. 5:2) Jadi ase boi totap iramotkon si Timoteus hasintongan ai, maningon iihutkon ia do panogu-noguan humbani tonduy na pansing ampa Na Tarsurat in.​—2 Tim. 3:14-17.

Sonari pe, ibere do homa hasintongan hubanta janah maningon iajarhon hita do homa ai hubani halak na legan. (Mat. 28:19, 20) Jadi maningon ipatuduh hita do anggo hita mangkargai tugas ai marhitei martonggo ampa ringgas mamparlajari Bibel. (Rom 12:11, 12; 1 Tim. 4:13, 15, 16) Leganni ai, ra do homa ibere banta tanggung jawab na legan. Umpamani, gabe sintua atap pe mangidangi ibagas dinas sepenuh waktu. Halani ai, maningon marondos do hita hubani Jahowa ase boi iramotkon hita tugasta.

Isuruh do homa si Timoteus ase mangajarhon aha na iparlajari ia hubani sanina na legan. Halani ai ma ase ihatahon si Paulus sonon, “Na binogeimu hun bangku . . . ai ma padas hubani hasoman hatengeran ni uhur, na boi mangajari halak na legan.” (2 Tim. 2:2) Jadi, ganup na iparlajari si Timoteus, maningon iajarhon ia do homa ai hubani sanina i kuria. Sonari pe, maningon sonai do homa na ibahen sintua i kuria. Lang isimpan ia aha na dob iparlajarisi. Tapi ibagihon ia do homa ai hubani sanina-sanina na legan. Tontu lang mabiar ia pentaran do holi sanina na legan marimbangkonsi. Halani ai, lang sungkup pitah ipatugah ia sonaha mandalankon sada tugas hubani sanina na legan. Tapi, maningon iurupi ia do homa sidea ase boi mambahen haputusan mangihutkon Hata ni Naibata. Anggo sonai ibahen ia, gabe dear ma halak na iajari ai mandalankon tugasni. Janah bahat ma gunani ai bani kuria.

Tontu malas tumang uhur ni si Timoteus dob mambasa surat ni si Paulus ai. Ra do marulak-ulak ibasa ia ai, janah ipingkirhon ia ma sonaha mandalankon podah ni si Paulus ase boi ia dear mangkorjahon tugasni.

Tontu sihol do homa uhurta mandalankon podah ai. Sonaha carani? Marusaha ma ase songon gara ni apuy ibahen hita sibere-bere ni Naibata ai ibagas uhurta. Ramotkon ma hasintongan ai, janah ajarhon ma ai hubani halak na legan. Ambahni ai, latih ma hasoman i kuria ase boi mandalankon tugasni. Anggo sonai ibahen hita, gabe boi ma idalankon hita ‘tugasta humbani gok ni uhurta’, songon na ihatahon si Paulus hubani si Timoteus.​—2 Tim. 4:5.