UGA nge perasanndu sanga idatndu surat si mpegegehi arah temanndu si mehuli? Idat Timotius surat si bage arah Rasul Paulus. Gundari, surat e igelari buku 2 Timotius. Pasti idarami Timotius ingan si melungen guna mbaca surat e gelah tuhu-tuhu iangkaina isina. Banci saja bagenda Timotius rukur, “Uga keadan Paulus? Lit nge nasehat si iberekenna man bangku guna nampati aku i bas ngelakoken tugasku? Banci nge nasehatna si lit bas surat e nampati aku i bas erberita janah gelah reh beluhna ngajar bage pe nampati kalak si deban? Bagi si nandangi sibahas, idat Timotius jawapen arah kerina penungkunen-penungkunenna e bage pe melala nasehat si penting i bas surat si meherga e. Bas artikel enda sipelajari kari piga-piga nasehat si erguna si lit bas surat e.

Sanga tangtangna ibaca Timotius surat Paulus mis iangkaina maka ermediate kel Paulus man bana. Ilebuh Paulus ia “anak si kukelengi.” (2 Tim. 1:2) Ialoken Timotius surat e kira-kira tahun 65 Masehi. Umurna paksa si e enggo 30 tahun lebih janah ia enggo jadi pertua si erpengalamen. Lit lebih sepuluh tahun ia ngelayani ras Paulus janah melala si banci ipelajarina arah Paulus nari.

Pasti terpegegehi kel Timotius sanga tehna tetap Paulus setia ngadapi melala kiniseran. Paulus ipenjaraken i Roma janah nandangi ibunuh. (2 Tim. 1:15, 16; 4:6-8) Banci iteh Timotius Paulus e kalak si perpang arah kata-katana enda: “Terus aku setia ngadapi kerinana.” (2 Tim. 2:8-13) Bagi Timotius, kita pe banci terpegegehi arah usihen Paulus.

Iiahken Paulus Timotius gelah meherga kel iakapna tugasna i bas ngelayani Dibata. Iarapken Paulus gelah Timotius “tetap semangat bagi api si gurlah i bas nggunaken pemere Dibata” si lit bas ia. (2 Tim. 1:6) Igunaken Paulus kata kharisma man kata “pemere.” Kata Junani e ertina gratis ras pemere si la metunggung ialoken. Ialoken Timotius pemere enda sanga ibereken man bana tugas istimewa bas runggun.​—1 Tim. 4:14.

Uga Timotius nggunaken pemere enda? Sanga ibacana kata-kata “tetap semangat  bagi api si gurlah” banci saja iukurina kerna rara batu bara si biasa igunaken kalak bas rumah. Batu bara banci lit apina ntah pe reh dekahna reh lasna adi rusur ikusur-kusur ras isempul. Sada kamus ngataken maka kata kerja Junani (anazopyreo) si igunaken Paulus e ertina “ipegeluh mulihi, ipegara mulihi, isempul gelah lit apina.” Emaka, e ertina nggit janah semangat ngelakoken piga-piga dahin. Jadi, si sangana ikataken Paulus man Timotius eme tutuslah atendu ndahiken tugasndu. Gundari, kita pe arus tutus ateta i bas ngelayani.

I bas suratna lit ka si ikataken Paulus man Timotius si banci nampati ia gelah berhasil bas pelayanen. Nina Paulus bas suratna e, “Alu kesah si badia si lit i bas dirita, jagalah erta si ialokenndu.” (2 Tim. 1:14) Erta kai e? Erta si meherga kai si lit bas Timotius? I bas ayat sebelumna si imaksud Paulus “kata-kata si benar,” eme kebenaren si lit bas Kitap si Badia. (2 Tim. 1:13) Perban Timotius sekalak pelayan Kristen, arus iajarkenna kebenaren man turang senina si lit bas runggun bage pe man kalak si lit i bas daerahna. (2 Tim. 4:1-5) Timotius pe enggo ilantik jadi sekalak pertua guna mpermakani rarasen Dibata. (1 Pet. 5:2) Emaka, banci ijaga Timotius erta e, eme kebenaren si iajarkenna adi iandalken Timotius kesah si badia bage pe Kata Dibata.​—2 Tim. 3:14-17.

Gundari pe ibereken man banta kebenaren si arus siajarken man kalak si deban. (Mat. 28:19, 20) Banci tetap siergai kebenaren enda adi terus kita ertoto janah ratur kita mpelajari Kata Dibata. (Rom. 12:11, 12; 1 Tim. 4:13, 15, 16) Banci saja lit tugas tambahen si ibereken man banta, misalna ngelayani jadi pertua bas runggun ntah pe pelayan sepenuh waktu. Tugas si meherga e arusna erban kita meteruk ukur janah lalap ngandalken Dibata. Alu bage, sicidahken maka enggo tuhu-tuhu siergai erta si enggo ibereken Jahwe man banta.

Lit ka tugas Timotius eme ngelatih kalak si deban. Tujunna eme gelah kalak si ilatih pe banci ngelakoken dahin si sangana ilakokenna. E me sebapna maka iiahken Paulus Timotius, nina, “Kai si nggo ibegindu i bas aku nari . . . ajarkenlah e man kalak si setia si ngasup pagi ngajarkenca man kalak si deban.” (2 Tim. 2:2) Iingetken Paulus Timotius gelah iajarkenna kerina si enggo ipelajarina man senina-senina si deban. Kerina pengawas ntah pe pertua si lit bas runggun Kristen gundari pe arus bage banna. Sekalak pengawas si mehuli la ibunikenna kai si itehna kerna sada tugas. Sebalikna, iajarina kalak si deban gelah beluh ngelakoken tugas e. La ia mbiar buen pemeteh kalak ntah pe beluhen kalak asangken ia bas ngelakoken sada tugas. La ngenca pendahin-pendahin si kitik iajarkenna man kalak. Isampatina atena kalak si ilatihna gelah jadi kalak Kristen si erpengalamen. Beluh mbedaken kai si salah ras kai si benar janah erban keputusen si mehuli. Alu bage, “kalak si setia” enda, si enggo iajari banci ngelakoken terbuen i bas runggun.

Pasti iergai Timotius surat Paulus. Banci sibayangken maka mulih-ulih ibacana surat e janah iukurina uga cara ndalankenca i bas ngelakoken tugasna.

Kita pe sidalanken ateta nasehat e. Uga carana? Arus siusahaken gelah tetap kita semangat bagi api si gurlah i bas nggunaken pemere e. Sijaga ertata janah nggit kita ngajari kalak. Alu bage, bagi si ikataken Paulus man Timotius banci ‘silakoken pelayanenta alu tutus.’​—2 Tim. 4:5.