HOW yu feel wen yu geh wahn byootiful an inkorijin leta fahn wahn kloas fren? Yu mosi feel di saym way how di Kristyan disaipl Timoti mi feel wen ih mi geh wahn preshos leta fahn di apasl Paal. Tudeh, wee noa da leta az di Baibl buk a 2 Timoti. Wi noa fi shoar dat Timoti mosi mi kyaahn wayt fi fain wahn kwaiyet plays soh dat ih kuda mi sidong ahn reed weh Paal mi rait tu ahn. Maybi Timoti mi-di tink, ‘How Paal di du? Hihn gat eni advais fi mi weh wahn help mi eena mi asainment? Fi hihn advais wahn help mi fi preech ahn teech beta ahn fi help adaz?ʼ Wi wahn geh fi si dat Timoti mi get ansaz tu dehndeh kweschanz an eevn moa dan dat eena da preshos leta. Bot fi now, wi wahn foakos pahn di helpful advais weh deh eena dis leta.

Fahn di taim Timoti mi staat tu reed ih leta, ih kuda mi tel humoch Paal mi reeli kay bowt ahn. Paal mi seh dat Timoti da-mi laik “wahn son” tu ahn. (2 Tim. 1:2) Timoti mi geh dis leta rong 65 C.E., ahn hihn mosi mi don oava 30 yaaz oal. Soh dat meenz dat hihn da-mi don wahn Kristyan elda wid lata ekspeeryens. Hihn mi-di werk wid Paal fi moa dan ten yaaz aredi an ih mi laan wahn lata tingz fahn hihn.

An ih mosi mi reeli inkorij Timoti wen ih fain owt dat Paal mi-di bayr op dong tu di en. Paal da-mi wahn prizna da Roam ahn dehn mi wahn soon kil ahn. (2 Tim. 1:15, 16; 4:6-8) Timoti kuda mi si dat Paal mi ga korij, bikaaz Paal mi seh: “Ah kip aan di bayr op anda evriting.” (2 Tim. 2:8-13) Paal egzampl mi schrentn Timoti bikaaz Timoti si how Paal mi bayr op anda evriting. Wee ku feel di saym way tu wen wi reed bowt Paal egzampl.

Paal mi tel Timoti dat ih shuda si ih asainment weh Jehoava giv ahn az sohnting weh veri preshos. Paal mi tel Timoti “fi bee eega fi yooz di gif weh Gaad giv ahn.” (2 Tim. 1:6) Di Greek werd fi “gif” da khaʹri·sma. Da werd rifaa tu wahn gif weh free ahn weh yu noh dizerv. Timoti mi geh dis gif wen dehn mi chooz ahn fi serv di kangrigayshan eena wahn speshal way.—1 Tim. 4:14.

 Soh weh Paal mi-di inkorij Timoti fi du wid dis gif? Wen Timoti mi reed di werdz “bee eega fi yooz di gif,” ih mi praabli staat tu tink bowt weh di werd “eega” meenz. Ih kuda mi kompyaa it tu wahn faiya, kaaz sohntaim wahn faiya ku blayz op ahn sohntaim da onli di koal stay lait op. Soh yu wuda haftu ster op dehndeh koal fi geh wahn faiya weh biga ahn hata. Soh Paal mi-di seh dat Timoti shuda fan da faiya, eena ada werdz, hihn shuda geh eksaitid ahn du ih bes eena di werk weh ih mi ga fi du. Paal mi-di tel Timoti: ‘Du yu asainment wid aala yu haat!ʼ Tudeh wee need fi du di saym ting; wi need fi bee eksaitid bowt di werk ahn du it wid aala wi haat.

Az Timoti kantinyu fi reed dis byootiful an inkorijin leta fan ih kloas fren, ih mi si sohnting els weh mi wahn help ahn ga sokses eena ih minischri. Paal mi tel Timoti: “Protek da chrezha wid di help a di hoali spirit weh deh eena wi.” (2 Tim. 1:14) Wat da-mi dis chrezha weh Timoti mi gat? Eena vers 13 Paal mi menshan “gud werdz,” weh da di chroot weh deh eena di Skripchaz. (2 Tim. 1:13) Bikaaz Timoti da-mi wahn Kristyan, hihn mi haftu teech di chroot tu di bradaz ahn sistaz eena di kangrigayshan ahn tu peepl eena di teritori. (2 Tim. 4:1-5) Aalso, Timoti mi geh apointid az wahn elda fi tek kayr a di flak weh bilangz tu Gaad. (1 Peet. 5:2) Soh fi mek Timoti ku protek di chrezha weh ih mi gat, weh da di chroot weh ih mi fi teech, ih mi haftu pen pahn Jehoava hoali spirit an Ih Werd.—2 Tim. 3:14-17.

Tudeh, wee haftu shayr di chroot wid adaz tu. (Mach. 28:19, 20) Wi shuda neva ferget dat di chroot weh wi teech veri preshos, ahn dat da wai wi need fi kip aan di pray ahn stodi Gaad Werd. (Roam. 12:11, 12; 1 Tim. 4:13, 15, 16) Wi mait aalso get di asainment fi serv az wahn elda er az wahn ful-taim servant. Wahn preshos chrezha laik dat shuda mek wi bee hombl ahn pen pahn Jehoava fi help wi. Soh wi protek di chrezha weh wi gat wen wi cherish it ahn pen pahn Jehoava fi help wi tek kayr a it.

Paat a Timoti asainment da-mi fi chrayn ada peepl fi du di werk weh hihn mi-di du. Dat da wai Paal mi tel Timoti: “Teech di faytful man dehn di tingz weh Ah mi teech yu, . . . den dehnya man wahn kwalifai fi teech dehnya tingz tu ada peepl.” (2 Tim. 2:2) Soh Paal mi-di tel Timoti fi teech ada bradaz aal di tingz weh ih mi don laan. Soh ih impoatant dat evri oavaseeya eena di Kristyan kangrigayshan tudeh du di saym ting. Wahn gud oavaseeya noh wahn kip evriting weh ih noa bowt wahn asainment tu ihself. Insteda dat, ih wahn teech adaz soh dat dehn wahn ku du di jab gud. Ih noh wahn bee frayd dat di persn weh ih teech mait en op di noa moa dan hihn er du di jab beta dan hihn. Soh di oavaseeya noh wahn teech jos di baysik tingz weh di persn haftu du eena ih asainment. Hihn shuda waahn help di wan dehn weh ih di chrayn fi ga gud jojment ahn fi groa spirichwali. Eena da way deh, di “faytful man dehn” weh ih mi teech wahn ku help di kangrigayshan eevn moa.

Wi noa fi shoar dat Timoti mi cherish di byootiful leta weh ih mi geh fahn Paal. Wi ku jos imajin hihn di reed di helpful advais oava ahn oava agen ahn di tink bowt how ih ku yooz it eena ih asainment.

Wee waahn du di saym ting tu; wi waahn yooz da saym advais eena wi laif. How? Wel, wi ku werk haad fi bee eega fi yooz di gif weh Gaad gi wi, fi protek di chrezha weh wi gat, ahn fi teech adaz evriting wi noa bowt wi asainment. An eena da way deh, wi wahn ku “finish di werk weh Gaad gi [wi] fi du.”—2 Tim. 4:5.