U TIPFISA kutxani u txi amukela dipasi dota ngu ka mngana? Mgondiswa Timoti a rumeletwe dipasi ngu Paulo, dipasi donedo di maha txienge txa Bhiblia a di di dhanwako ku 2 Timoti. Ti ha kubasani ti to Timoti a ti ningile mbimo, yo lera dipasi do ta ngu ka mngana wakwe. Ti nga maha Timoti a di ti wotisile tiya: A ka ti to txani Paulo a kuwa? Ina ku ni sialakanyiso si a nga ni ninga si nga ni vhunako ka siavelo sango? Ina dipasi diya di na ni vhuna ti to ni humelela ka mthumo wangu kota Mkristu ni tshumela ni vhuna vamwani? Tixamulo ta siwotiso siya ni timwani nda lisima. Kambe konku he bhule ngu timhaka ti ti nga hi vhunako, a ti ti manekako ka dipapilo diya.

Mbimo yi Timoti a nga khata kulera mapswi o khata ka dipapilo a tekete kutiwona to Paulo atxi khatala ngu ngene. Ngu lirando Paulo a dhani Timoti to i “mwanana wangu wo randeka.” (2 Tim. 1:2) Hambi ku Timoti a nga ti ni 30 wa malembe mbimo yi a nga amukela dipasi ngu dilembe da 65 ene se i ti didhota. Ku ti pinda konamu ka 10 wa malembe va di zivanile ni Paulo, ni ku a ti gondile to tala kwakwe.

Ti nga maha Timoti a di tsanisilwe ngu kuziva ti to Paulo a ti simama a di thembekile hambiku a nga txi wonisana ni sikarato. Paulo a ti seketwe khe Roma ni ku a ti hafuni ni ku dawa. (2 Tim. 1:15, 16; 4:6-8) Mapswi ya ma ku: ‘Na timisela ka totshe,’ ti nga maha ma di vhuni Timoti e wona to Paulo a di ni txibindi. (2 Tim. 2:8-13) Kufana ni Timoti nathu hi nga mana mtamo ngu kugonda ka txikombiso txa Paulo txo timisela.

Paulo a kuzetile Timoti ti to e ninga lisima txiavelo a txi a nga ti natxo ka mthumo wa Txizimu. Ene a gete Timoti ti to e “wuseta txihiwa txa Txizimu.” Dipswi da Txigriki a di di ku wuseta txihiwa txa Txizimu, di womba kuonzeta txihiwa txa Txizimu ku fana ni mndilo.” (2 Tim. 1:6) Paulo a thumisile dipswi da Txigriki a di di ku khaʹri·sma di wombako “txihiwa” dipswi diya di womba txihiwa atxi u txi manako mahala na u sa txi thumela. Timoti a amukete txihiwa txonetxo mbimo yi a nga sawulwa ti to e va ka mthumo wo sawuleka dibanzani.—1 Tim. 4:14.

Timoti a ti fanete ku maha txani ngu txihiwa txiya? Nga ha hi nga ti wona ngu kona dipswi da Txigriki a di di ku “kuwuseta txihiwa” di womba  ku onzeta txihiwa txa Txizimu ku fana ni mndilo. Se mbimo yi Timoti a nga lera mapswi a Paulo ti nga maha a di alakanyisisile ngu mndilo. Mbimo yimwani ti nga maha u di wu dhivete kambe wu si turi. Ti to wu tura ti lava u onzeta. Mgondi mmwani wa tidimi a wombile ti to dipswi da Txigriki (a·na·zo·py·reʹo) a di Paulo a nga di thumisa di womba kuwuseta kuhembenyeta ni kufuteta, a ti ti fanekiselako kuhiseka ka mthumo.” Se ti txo fana ni ku va Paulo a txi gela Timoti ku e ‘ninga lisima txiavelo txakwe.’ Nathu hi nga maha a ti ti fanako ngu kuhiseka ka mthumo wathu.

Mbimo yi Timoti a nga ti simama e lera dipasi dota ngu ka mngana wakwe ati ya mana mapswi mamwani aya ma nga mvhuna ku e humelela ka mthumo wakwe. Paulo a bhate tiya: “Tximaha txa txinene atxi txi nga vekwa manzani kwako, txi xayise ngu ko vhunwa ngu moya wo sawuleka awu wu zumbako timbiluni kwanu.” (2 Tim. 1:14) I ti txani tximaha txa txinene a txi Timoti a nga ti fanete ku txi xayisa? A si se bhala mapasi awa Paulo a wombile ti to ditshuri di hi di manako ka Bhiblia i “mapswi a manene.” (2 Tim. 1:13) Kota Mkristu Timoti a ti fanete ku txhumayela ditshuri mndani ni hahanze ka dibanza. (2 Tim. 4:1-5) Timoti a ti tshumete e vekwa kota didhota da dibanza ti to e dyisa mtxhambi wa Txizimu. (1 Pedro 5:2) Ene a ndi na xayisa tximaha txa txinene ngu kuthumisa Bhiblia ni kuthemba moya wo sawuleka wa Jehovha.—2 Tim. 3:14-17.

Nathu nyamsi hi ningilwe txiavelo txonetxo txa lisima i ku mthumo wo gondisa vamwani ditshuri. (Mat. 28:19, 20) Hi nga kombisa kubonga txilo txonetxo ngu kusimama hi maha mikombelo, ni ku sakulela txiemiso txa txinene txo gonda dipswi da Txizimu. (Var. 12:11, 12; 1 Tim. 4:13, 15, 16) Hi nga tshumela hi mana siavelo so engeteleka so thuma kota didhota mwendo ku va ka mthumo wa mbimo yotshe. Kambe hi fanete kutiveka hahatshi hi khumbula ti to hi tikota toneto ngu kuvhunwa ngu Txizimu. Hi nga xayisa mwendo kuvhikela txiya txonetxo txa txinene ngu ku txi ninga lisima ni kuthemba to Jehovha a na hi vhuna to hi txi khatalela.

Mithumo yi Timoti a nga ningwa yi txi pata ni ku gondisa vamwani ti to ni vona ve maha mithumo yi a nga txi maha. Ngu toneto Paulo a nga kuzeta Timoti a txi khene: “A ti u nga ti engisa kwangu . . . tiveke manzani ka vavamna vo thembeka a va va no sikota ku gondisa vamwani.” (2 Tim. 2:2) Se Timoti a ti fanete ku gondisa vanathu a ti nene a nga ti gondile. Ti ni lisima ku ava va thangelako dibanzani ve gondisa vamwani kumaha ati ti fanako. Madhota kha ma tumeleli ti to mabava me va maha ve sisela vamwani ati va ti zivako. Hahanze keto ona ma gondisa vamwani kasi ku ni vona ve sikota ku maha mthumo. Ona kha ma thavi ku mwanathu a nga va ni wusikoti se e maha mthumo ku va pala. Ngu toneto madhota ma gondisa vanathu totshe ti va ti zivako ngu mthumo wonewo. Ona ma vhuna mwanathu e ziva kumaha mthumo ngu nzila ya yinene, ni kuva ni wutxhari kasi ku e kula ngu didhawa da moya. Ngu nzila yoneyo “vavamna vo thembeka” ava va nga gondiswa va va txivhuno txa hombe ka dibanza.

Ti ha kubasani ti to Timoti a di tsakete dipasi di a nga di amukela ka Paulo. Phela ti nga maha a di lerile ngu ku wuyeletela dipasi donedo to e mana sialakanyiso, ni kuwona to a nga si thumisisa kutxani sialakanyiso soneso ka siavelo sakwe.

Nathu hi fanete ku txi tekela ha msungo txialakanyiso txonetxo. Hi nga mahisa kutxani? Ngu kuonzeta nga mndilo txihiwa txonetxo, hi xayisa tximaha txa lisima txi hi nga vekelwa manzani kwathu, ni ku gondisa vamwani ati hi ti zivako. Hi txi maha toneto hi na ‘hi na hetisisa mthumo wathu’ nga ha Paulo a nga gela ngu kona Timoti.—2 Tim. 4:5.