NI BATA oku ori kwehurira watunga ebaruha eyaruga ahari munywani wawe? Timoseo akatunga ebaruha eri kuruga ahari Paulo eri kumanywa nka 2 Timoseo. Hatariho kubanganisa, Timoseo ayine kuba yaronzire omwanya murungi kugira ngu ashome eyo baruha. Timoseo nabasa kuba yayeburize ngu: ‘Konka shi Paulo aryata? Konka shi hine obuhabuzi obu yampa oburankwase aha omurimo gwange? Mbwenu shi eyi baruha neyija kunkwasa kukora omurimo n’okukwasa abandi?’ Nk’oku twaza kukireba, Timoseo akatunga ebyokugarukamu by’ebyo bibuzo n’ebintu by’omugasho omuri eyo baruha. Omuri eki kicweka, twaza kushwijuma ebintu by’omugasho ebiri omuri eyo baruha.

Timoseo ku yatandikire kushoma eyo baruha akareba ku Paulo ari kumufaho. Paulo akamweta ‘omwana [weye] ori kukundwa.’ (2 Tim 1:2) N’obu Timoseo yabire ayine emyaka nka 30, hihi omu mwaka gwa 65 B.Y., akaba ari omuzehe w’ekibina ori kukora n’amani. Akaba yamazire emyaka eri kurenga 10 ari kugenda na Paulo, kandi akaba yamwegireho ebintu byingi.

Timoseo ku yamanyire ngu Paulo akaba nayehanganira ebizibu omu bwesigwa, kikamugumya. Paulo akaba ari omusibe omuri Rooma kandi akaba ari hihi kwitwa. (2 Tim 1:15, 16; 4:6-8) Timoseo akerebera ku Paulo yabire ari emanzi ahabw’okuba akagamba ngu: ‘Ninyehanganira byona.’ (2 Tim 2:8-13) Nka Timoseo, ecokureberaho ca Paulo c’okwehangana n’itwe nikitugaruramu amani.

Paulo akahiga Timoseo kuguma nareba omurimo gwa Yehova nk’og’omuhendo munonga. Akaba nayenda ngu Timoseo ‘ayenegeza ekiconco ca Ruhanga,’ ecabire kiri omuri we. (2 Tim 1:6) Paulo akakoresa ekigambo khaʹri·sma ekiri kumanyisa “ekiconco.” Eco kigambo c’Orugriika nikimanyisa ekiconco eki turi kuhebwa aha bwa busha. Timoseo akatunga eco kiconco obu yatungire omurimo g’omutano omu kibina.—1 Tim 4:14.

 Ni bata oku Timoseo yabire arakorese eco kiconco? Ku yatekatekire aha kigambo “okwenegeza,” nabasa kuba yatekatekire aha muriro g’omu ka oguri kubasa kurara. Ogo muriro nibaba bashemerire kuguma kugwenegeza kugira ngu gugume nigwaka. Kashoborozi emwe ekagamba ku ekigambo c’Orugriika (a·na·zo·py·reʹo) eki Paulo yakoresize omu buryo bw’akamanyiso, kiri kumanyisa “okugira amani aha murimo.” Obwe rero, Paulo akaba ari kuhabura Timoseo ngu ‘ate omutima aha murimo!’ N’itwe omuri obu bwire tushemerire kukora omurimo n’obweziriki.

Omu baruha eyi Paulo yahandikire Timoseo akahandikamu n’ebindi byintu ebyabire biramukwase omu murimo g’okuburira. Paulo akahandika ati: ‘Orinde eco kirungi eki wakwasibwe omwika oguri kwera ogutura omuri itwe.’ (2 Tim 1:14) Ni enki eki yabire ari kumugambira? Kandi shi ni kiha kintu kirungi eki Timoseo yabire akwasibwe? Omu runyiriri oruri kubandiza orwo, Paulo akagambamu ‘ebigambo by’amazima,’ agari omu Byahandikirwe. (2 Tim 1:13) Ahabw’okuba Timoseo yabire ari Omukristo kandi ari omuhereza, akaba ashemerire kwegesa ago mazima ab’omu kibina n’abaheru. (2 Tim 4:1-5) Nambwenu, Timoseo akaba yatorinwe nk’omuzehe w’okurisa entama za Ruhanga. (1 Pet 5:2) Kugira ngu arinde amazima agu yabire naburira, akaba ashemerire kushaba Yehova omwika oguri kwera kandi akarondera obuhabuzi omu Kigambo ceye.—2 Tim 3:14-17.

Omuri obu bwire, n’itwe tukahebwa amazima agu turi kuburira. (Mat 28:19, 20) Nitubasa kwereka ku nitusima ahabw’eki twakwasibwe turi kushaba kandi tukashoma Ekigambo ca Ruhanga burizoba. (Rom 12:11, 12; 1 Tim 4:13, 15, 16) Nambwenu, nitubasa kuhebwa endijo mirimo omu kibina, nk’okuba omuzehe ninga shi omu murimo g’obwire bwona. Eyo mirimo netuma twaba abacurezi kandi burijo netuma twashaba Ruhanga obuyambi. Obwe rero, tushemerire kureba eki twakwasibwe nk’ec’omuhendo kandi burijo tushaba Yehova obuyambi kugira tukirinde.

Emirimo eyi Timoseo yahibwe akaba atagegumanire wenka, ahobwe akaba ashemerire n’okumanyiza abandi. Ni yo nshonga Paulo yahigire Timoseo nagira ati: ‘Ebi wahurire ningamba, obikwase abantu abari kwesigwa abaribasa kubyegesa abandi.’ (2 Tim 2:2) Mazima, Timoseo akaba ashemerire kwegera aha bandi Bakristo bagenzi beye kandi na we agira ebi yabegesa. Ni ec’omugasho munonga buri muzehe wena w’omu kibina kutoreza Timoseo. Omureberezi murungi tari kushereka ebi ari kumanya aha murimo ogu yahebwa. Ahobwe, nabyegesa abandi kugira ngu na bo bije kukora ogo murimo. Tari kutina ngu nibija kumanya byingi ninga kukora ebiri kukira ebyeye. Obwe rero, omureberezi tari kwegesa ebintu bice ebiri kukwata aha murimo gweye. Naba ari kwenda kukwasa abu ari kumanyiza kumanya kusharamu, bakaba abantu bakuzire omu by’omwika. Ku arakikore basyoya, ‘abantu abari kwesigwa’ abu yayegesa nibija kuyamba ekibina.

Hatariho okubanganisa, Timoseo akashemererwa ahabw’ebaruha eyi Paulo yamuhandikire. Nitubasa kutekateka ku yagumizemu kushoma eyo baruha kugira ngu arebe oku ari kubasa kuta obwo buhabuzi omu nkora omu murimo gweye.

N’itwe tushemerire kukuratiza obwo buhabuzi. Tukakikora tuta? Nitubasa kukikora turi kutamu amani ngu twenegeze ekiconco eki twine, turinde eki twakwasibwe kandi twegese n’abandi ebi turi kumanya. Ku turakikore tusyoya, nk’oku Paulo yakigambire, nitwija ‘kuhikiririza kimwe’ omurimo gwitu.—2 Tim 4:5.