EPWE met meefiom ika a toruk eché taropwe seni emén chiechiom, mi masou ren pwóróus mi apéchékkúl? A tori ewe Chón Kraist Timoty ena esin taropwe seni ewe aposel Paulus, me ena taropwe ina ewe puken 2 Timoty lón ewe Paipel. Ese mwáál, Timoty a mwétéres le kútta eú leeni mi mosonoson pwe epwe tongeni álleani ena taropwe seni chienan we mi áchengicheng. Eli Timoty a ekieki: ‘Epwe ifa usun Paulus iei? Epwe awora ngeniei kapasen pesepes epwe álisiei lón wisei kewe? Masouen ei taropwe a tongeni álisiei le álisi ekkewe ekkóch me sópwéch lón ewe angangen afalafal?’ Usun met sipwele kúna, pwe Timoty a kúna pélúwen ekkena kapas eis me pwal och mettóch mi aúchea lón ena taropwe. Nge ren mwo iei, lón ei lesen sipwe káé ekkóch kapasen emmwen mi álilliséch lón ei taropwe.

Atun Timoty a poputá le álleani masouen lepoputáán ena taropwe, a mwittir meefi pwe Paulus a enletin tongei. Fán tong, Paulus a kér ngeni “nei mi achengicheng.” (2 Tim. 1:2) A tori Timoty ena taropwe lón ina epwe ewe ier 65. Eli a fen lu seni 30 ierin, me a fen emén Chón Kraist mwán mi ásimaw mi sipeéch. Ra fen angangfengen me Paulus ren lap seni 10 ier me a fen káé chómmóng seni.

Ese mwáál Timoty a fókkun péchékkúletá ren an silei pwe Paulus a fen tuppwél le likiitú fán an kewe riáfféú. Paulus a féfé ngeni sein lón Rom, me epwele ninniiló. (2 Tim. 1:15, 16; 4:6-8) Timoty a tongeni esilla pworaan Paulus pokiten iei met a erá: “Üa likitü lon ekei riaföü meinisin.” (2 Tim. 2:8-13) Sia tongeni usun Timoty, me péchékkúletá ren án Paulus leenien áppirú mi fókkun múrinné ren an likiitú.

Paulus a pese ngeni Timoty an epwe fókkun aúcheani wisan we lón an angang ngeni Kot. Paulus a mochen pwe Timoty epwe “sópweló le ängeta än Kot we liffang” mi nóm ren. (2 Tim. 1:6, Agapé) Paulus a néúnéú ewe kapasen Krik khaʹri·sma fán iten “liffang.” Ena kapasen Krik a wewe ngeni eú liffang ese kamé me fáng fán kirekiréch. Timoty a angei ena esin liffang atun a kewis ngeni an epwe eáni eú wis mi kkóló aúchean fán iten ewe mwichefel.​—1 Tim. 4:14.

Met Paulus a pese ngeni Timoty an epwe féri ngeni ena liffang? Atun Timoty a álleani  ekkewe kapas, “sópweló le ängeta,” eli a ekieki usun án aramas kewe ekkei lón imwer kewe fán ekkóch a chék wiliti moochen ekkei. A lamot án emén epwe sossoni ena ekeei pwe epwe nget me rar. Me ren eú puk pwe ewe kapasen Krik (a·na·zo·py·reʹo) Paulus a néúnéú, a wewe ngeni “angetasefálli, amanawa, me ékékúú ewe ekkeei,” weween pwe emén epwe mwétéres me tinikken fán iten och angang. Weween pwe iei met Paulus a ereni Timoty: ‘Kopwe unusen tinikken lón wisom we!’ A pwal lamot ach sipwe ina usun lón ach ei fansoun, weween sipwe tinikken lón ach angang ngeni Jiowa.

Lón néún Paulus we taropwe, a pwal makkeei och mettóch epwe álisi Timoty le sópwéch lón an angangen afalafal. Iei met a makkeei: “Ren manamanen ewe Ngünmifel mi nom loch kopwe tümwünüöchü ewe Pworausen Manau Kot a lükü ngonuk.” (2 Tim. 1:14) Ifa ena mettóch Timoty epwe túmúnú? Ifa ena mettóch mi aúchea mi nóm ren? Lón ewe wokisin mwan, Paulus a fós usun “ekewe kapas mi let,” weween ewe enlet mi nóm lón ewe Paipel. (2 Tim. 1:13) Pokiten Timoty i emén chón Kraist mi uwei ewe kapas allim, a lamot an epwe afalafala ewe enlet lón me lúkún ewe mwichefel. (2 Tim. 4:1-5) Pwal och, Timoty a wiliti emén mwán mi ásimaw mi túmúnú néún Kot kewe siip. (1 Pet. 5:2) Timoty a tongeni túmúnú ewe enlet epwe asukula ngeni aramas ren an lúkúlúk wóón án Jiowa we ngún mi fel me An we Kapas.​—2 Tim. 3:14-17.

Lón ei fansoun, Jiowa a pwal lúkú ngenikich ewe enlet sia asukula ngeni aramas. (Mat. 28:19, 20) A lamot ach sisap fókkun ménúki úkúkún aúchean ewe enlet sia asukula ngeni aramas, ina popun a lamot ach sipwe likiitú le ikkiótek me kákkáé án Kot we Kapas. (Rom 12:11, 12; 1 Tim. 4:13, 15, 16) Eli epwe pwal kewis ngeni ekkewe mwán ewe wis mwán mi ásimaw are a tongeni kewis ngenikich ach sipwe fiti ewe angangen afalafal full-time. Ekkena wis mi aúchea, repwe fen álisikich ach sipwe tipetekison, me amwékútúkich ach sipwe onómu ach lúkúlúk wóón Jiowa. Iwe sia tongeni túttúmúnú minne Jiowa a lúkú ngenikich ren ach unusen aúcheani me lúkúlúk wóón i pwe epwe álisikich le túmúnú ena wis.

A kapachelong lón ewe wis Timoty a eáni, ina an asukula ekkewe ekkóch ifa usun repwe pwal eáni ewe angang a eáni. Ina popun Paulus a pese ngeni: “Met ka rongorong seniei . . . , kopwe lükü ngeni ätekewe mi allükülük o tufichin asukula pwal ekewe ekoch souläng.” (2 Tim. 2:2) Ewer, Paulus a áchema ngeni Timoty an epwe asukula ngeni ekkewe ekkóch Chón Kraist mwán meinisin minne a fen káé. A mmen lamot ngeni meinisin chónemmwen lón ekkewe mwichefelin Chón Kraist lón ei fansoun ar repwe pwal féri ena. Emén chónemmwen mi múrinné esap fókkun amonomonaló fán lólówó minne a silei usun wisan we. Nge epwe asukula ekkewe ekkóch pwe repwe pwal tongeni féri ena angang. Esap niwokkus le áiti ngeniir ena angang inaamwo ika eli a ekieki pwe repwe lipwákéch lap seni. Ina popun, esap chék asukula ngeniir ekkewe kinikin mi mecheres lón ena angang. Epwe mochen álisi chókkewe a asukuler ar repwe eáni ekiekéch me weweéch me repwe ásimawóló lón pekin ngún. Ika ena chónemmwen a ina usun, iwe “ätekewe mi allükülük” a asukuler, repwe tufichin alapa ar álillis lón ewe mwichefel.

Ese mwáál, Timoty a aúcheani ewe taropwe a angei seni Paulus. Sia tongeni anchangei án Timoty ákkálleani fán fite ena emmwen mi álilliséch me an ekkekieki ifa usun epwe apwénúetáfichi lón wisan we.

Sia pwal mochen apwénúetá ena kapasen emmwen. Ifa usun? Sia tongeni angang weires le angetá án Kot we liffang, túmúnú minne a fen lúkú ngenikich, me asukula ngeni ekkewe ekkóch minne sia silei. Ika sia féri ekkena mettóch, iwe sipwe féri minne Paulus a ereni Timoty, sipwe “unusen apwönüetä [wisach] usun eman nöün Kot chon angang.”​—2 Tim. 4:5.