WEYO oniwamo dhavi ogattambirha karta nirumile mukwawo onimukweliwe? Timóteo wahakela karta namurumeli murumiwi Paulo nttuwene ninziwehu ninga karta na Bibilia na 2 Timóteo. Mwakweleli Timóteo karta ntti, iyene wahizuzumeya venjene, Timóteo wahiveda mburo wofwaseya wi aziwe esile dhamulebeli mukwaye wokweleya. Txino Timóteo wafiyedha wubuwela, Paulo oli dhavi? Txino okana malago anfuniye oddivaha wi ddeddihena mabasa attomeliwemi? Njagarha ntti ninela oddikamihedha weddeleya dderetu mmabasani a olaleya, vina wakamihedha attu enna? Ninga munenele iyo Timóteo wahifwanya dhawakula dha mavuzo aba na dhina. Mbwenye ovano nddowene nisekesereni malago amakamaka anfwanyeya mu kartani ntti.

Muromile Timóteo wengesa mazu oroma a kartaya, iyene wahifiyedha woona wi Paulo wannimukwela. Na nriho notene Paulo wahiloga wi Timóteo “wali mwana wokweleya.” (2 Tim. 1:2) Timóteo wakelile karta ntti yaka ya 65 N.K. [Nsaka na Kristu], enoneya ninga iyene wana vyaka 30, masiki, valiye muzombwe Timóteo wali munddimuwa wa mulogo wa zelu. Iyene ohilaba vyaka kumi na Paulo, nona wahisunza dhilobo dhinjene na iyene.

Oziwa wi Paulo wahivilela makattamiho aye na njedhelo eji yahimulibiha venjene Timóteo. Paulo wahifugeliwa mukambura o Roma vina musogorhomwa agahifiyedha opiwa. (2 Tim. 1:15, 16; 4:6-8) Mazu aba a Paulo alogiliye wi ddinovilela dhotene yamukamihedha Timóteo woona wi Paulo wali muttu woliba murima. (2 Tim. 2:8-13) Dhaene ninga Timóteo iyo vina ninolibiheya ya yotagiha ya ovilela wa Paulo.

Paulo wahimulibiha Timóteo wi avahe ttima ejile yattomeliweyi mmabasani a Mulugu. Iyene ohiloga na Timóteo mazu aba “nona ddinukokomeza wi otitedhegevi motho wa nvaho wuvahile Mulugu.” (2 Tim. 1:6) Mazu aba alabihedhi Paulo “mvaho” na elogelo a Egrego antapulela khaʹri·sma. Mazu aba na Egrego makamaka addiwana mvaho wa mahala. Timóteo wahakela mvaho obu mudhidhi wattomiwiye ninga nameddelela milogo.—1 Tim. 4:14.

Txini yafanyeeliye okosa na mvaho obu? Vengesileyi mazu aba “otitedhegevi motho wa mvaho,”  iyene wahubuwela motho walemeletxa attu ogasa, wi mottoya ottiddegevi yanfuneya otitedhagavi obe wikagavo kuni. Disionario dhahi atapulelaga mazu aba a Egrego (a·na·zo·py·reʹo) alogile Paulo antapulela “ogasedha, vina wenjedhedhavo kuni wila mottoya ottiddegevi,” na mazu mena antapulela “wagalala na mabasa ankosiwe.” Dhahene nikokomezo nafuna onvaha Paulo Timóteo ttintti: ‘Kakosa muli mwetemwene mmabasani attomeliwewi!’ Masaka abano iyo vina ninofwanyela okosa yakakene—Ninofwanyela ovingela mabasa a Yehova.

Adhowagavi engesaga karta yamukwaye wokweleya, Timóteo wahifanya nlago nina nigamukamihedhile weddiha deretu mabasa olaleya Paulo ohileba: “Na guru dha [muya wokoddela,] onkala mwa iyo, koya masunziho a ebaribari avahiwiwe.” (2 Tim. 1:14) Mvaho gani wamakamaka wakele Timóteo? Versu dha mundduni Paulo wahiloga mazu aba “fwara mazu a egumi,” a ebaribari anfwanyeya Mmaleboni. (2 Tim. 1:13) Sabwa ya okala Mukristu, Timóteo wanfwanyela walaleyela ebaribari attu ena vina osunziha mmulogoni. (2 Tim. 4:1-5) Ottiya ejo Timóteo wahithomeliwa osapihaga mabila a Mulugu. (1 Ped. 5:2) Wila akoyevi ebaribari yattima yasunzihiwiye, Timóteo wanfwanyela okuluvela guru dha muya wokoddela wa Yehova vina Nzu Naye.—2 Tim. 3:14.

Masaka abano iyo vina nihikuluveliwana gari ya olaleya muttaka Wapama. (Mt. 28:19, 20) Ninela owodha odhowaga nivahaga ttima mabasa aba amakamaka mwa oddiddelavi munlobeloni, vina osunzaga Mazu a Mulugu masiku otene. (Rom. 12:11, 12; 1 Tim. 4:13, 15, 16) Txino nihittomeliwa mabasa mena ninga olaba mmabasani a mudhidhi wotene obe nittomiwe ninga anddimuwa a mulogo. Nigakaana ettomo eso ninofwanyeela okala attu oviyeviha wi nilagihe wila ninkuluvela guru dha muya wokoddela wa Mulugu. Ninofwanyela okoya ebaribari ya masunziho avahiwehu, mwa oriha vina omukuluvela Yehova wila niwodhe wakwaniha.

Mabasa attomeliwe Timóteo katapulela wila iyene anfwanyeela okosaga yeka. Iyene wanfwanyela washagiha enna wila amukamihedhege. Nona Paulo wahimukokomeza Timóteo na mazu awi: “Dhetene dhiddiwalewe ddilogaga vamentoni va athu enjene, àfiyedhena athu ororomeleya, anziwa wasunziha athu ena.” (2 Tim. 2:2) Txibarene Timóteo ahubutxedhiwa wi wanfwanyela wasunziha abali ena Akristu wila awodhege ottidda mabasaya. Jamalago anddimuwa etene a milogo Dhokristu ozuzumelaga washagiha abali ena, ttabwa-ttabwa masaka abano. Munddimuwa wa mulogo onna eziwelo, kanwayedha ettomo yaye vina kankoodda wasunziha ena esile dhinziwiye. Ottiya ejo iyene onowashwagiha ena wila awodhege osogorhana mabasaya. Iyene kanubuwela wi anadhe apittihiwe na abali ena anna eziwelo, obe ttontto ya okosa dhilobo. Munddimuwa wa mulogo wapama kansunziha bahi mukoseliwo wa mabasaya. Iyene onotamela wakamihedha abaleya anashagihiye wunuwiha ewodhelo ya ononelamo vina owarala omuyani. Dhahene attu aba okuluveleya anshagihiwa anela owodha okamihedha mulogo mwawakwana-mwene.

Mohaganyedha Timóteo wahitamalela venjene karta ntti nokwela namulebeli Paulo. Kinrutxa omubuwela Timóteo engesaga karta ntti vina atanaalelaga mukalelo ogawodhileyi weddana malago aba mmabasani mwaye.

Iyo vina ninofwanyela ofwara malago aba. Na mukalelo gani? Mwa otitedhagavi motto wa nvaho wakelilehu, okoya masunziho a ebaribari vina wasunziha ena esile dhinziwehu. Dhahene ninela ofwara malago avahile murumiwi Paulo awi: “Dhowaganavi ddimawo, Pulihá mabasawo attomeliwewe.” —2 Tim. 4:5.