KUCHI wakwivwa nyi watambula umwe mukanda upema wa sepa lie? Kambaji Timoteu katambwile mukanda wacho kuli postolo Paulu, uze tunanyingika musono ngwetu, mukanda 2 Timoteu. Kwamba pundu, Timoteu kota kafupile chihela chipema hanga ahase kutanga mukanda uze anakamutumina kuli sepa lienyi. Kota Timoteu kanyongene ngwenyi: ‘Yika Paulu analingi? Shina kanazange kungwaha chimwe chiyulo chize muchingukwasa mu mulimo wami? Shina mukanda uno muungukwasa mu mulimo wami wa kwambujola ni kulongesa akwetu?’ Ngwe chize mutumona, Timoteu kawanyine makumbululo a yihula yino ni yikwo ha mukanda uno ulemu. Alioze, haliapwila, tutalenu yize mutuhasa kulilongesa ha chiyulo chize chili ha mukanda wacho.

Muze Timoteu aputukile kutanga maliji atangu a mukanda wacho, hazehene yamona pundu ngwenyi Paulu kakumuzanga. Ni zango lieswe, Paulu yamuvuluka ngwenyi: “Mwanami wa zango.” (2 Timo. 1:2) Muze Timoteu atambwile mukanda wacho ha mwaka 65 M.J, kota te kali ni miaka kuhiana 30, iye te hapwa mukulwana wa mu chikungulwila wajama ku ufulielo. Iye te hanakalakala ni Paulu ha miaka yinji nawa te halilongesa yuma yinji kuli iye.

Timoteu kota kawanyine utakamiso ha kunyingika ngwenyi, Paulu te kananyongonona ni ushishiko weswe. Paulu kapwile mu zuwo lia ususu ku Roma, nawa te kwasala hakehe hanga amushihe. (2 Timo. 1:15, 16; 4:6-8) Timoteu kahashile kumona ngwenyi, Paulu kakwete hamu linji muze amwene maliji jenyi ha mukanda anambe ngwo: “Nakunyongonona mu yuma yeswe.” (2 Timo. 2:8-13) Ngwe Timoteu, ni yetu mutuhasa kutakama ha kukaula chilweza chipema cha Paulu cha kunyongonona.

Paulu katowezele Timoteu hanga alemese chiteli chenyi mu mulimo wa Zambi. Iye kazangile hanga Timoteu ‘asosele ngwe kahia’ chawana cha Zambi chize apwile nacho. (2 Timo. 1:6) Paulu kazachishile liji khaʹri·sma, ha “chawana.” Liji lino lia Ngregu linalumbunuka chuma hanji chawana chize kuchatutelele. Timoteu katambwile chawana chacho muze amusakwile hanga akwase yikungulwila mu jila yalipwila.—1 Timo. 4:14.

Yika Timoteu te malinga ni chawana chacho? Muze atangile maliji, ‘sosela chawana cha Zambi  ngwe kahia,’ kota kanyongene ha kahia kaze atu te akuwika mu mazuwo kaze kapwile ni kusala wika makala. Makala jacho kapwile ni kwapepelela hanga kahia koke ni kuhwisa chishika. Mukanda umwe unambe ngwo, liji lia Ngregu (a·na·zo·py·reʹo) lize Paulu azachishile, linalumbunuka “kusosela, kufuza hanji kukwachisa,” maliji wano kanasolola ngwo, “mutu katamba kulikolweza chinji muze analingi umwe mulimo.” Chochene, Paulu katakamishine Timoteu ha kumwamba ngwenyi: ‘Likolweze mu mulimo we!’ Chipwe musono che twatamba kulinga, chekwamba, kulihana chinji mu mulimo uze atuhele kuli Yehova.

Muze anungine kutanga mukanda uze sepa lienyi amutumine, Timoteu yawana chiyulo chikwo chize chamukwashile chinji mu mulimo wenyi. Paulu yasoneka ngwenyi: “Chuma chipema chize akukunjikile, chifunge ku tachi ja spiritu musandu, yoze watwama muli yetu.” (2 Timo. 1:14) Chuma chika chipema chize ahanyine kuli Timoteu? Ha versu 13 Paulu kahanjikile hakutwala ku “maliji angunu” waze ali mu Yisoneko. (2 Timo. 1:13) Timoteu kapwile mukwa-Kristu wajama, kashika te katamba kulongesa umwenemwene kuli mandumbu mu chikungulwila ni atu a mu ngiza yenyi. (2 Timo. 4:1-5) Chikwo nawa, Timoteu kamutongwele kupwa mukulwana wa mu chikungulwila hanga afunge mapanga a Zambi. (1 Petu. 5:2) Timoteu te katamba kufunga kanawa umwenemwene uze apwile nawo ni kujikijila mu spiritu yisandu ya Yehova ni ha Liji lienyi.—2 Timo. 3:14-17.

Chipwe musono, ni yetu hitunatambula chawana chilemu chize twatamba kulongesa akwetu. (Mateu 28:19, 20) Kashika, twatamba kulemba ni kulilongesa Liji lia Zambi matangwa eswe mba tunyongonone mu mulimo wacho. (Roma 12:11, 12; 1 Timo. 4:13, 15, 16) Chikwo nawa, hanji hitunatambula chiteli cha kukalakala ngwe makulwana a mu chikungulwila hanji mu mulimo wa shimbu lieswe. Yiteli yino, yatamba kututwala hanga tulikehese ni kujikijila muli Zambi. Mutuhasa kufunga chawana chize hanatwehe ha kuchilemesa ni kujikijila ngwo Yehova matukwasa.

Timoteu kamuhele nawa mulimo wakufumba akwo hanga alinge mulimo uze iye apwile ni kulinga. Kashika Paulu asonekene ngwenyi: “Yuma yize hiunevu kuli yami . . . , yikunjike kuli malunga amwenemwene, waze makahasa kufumba akwo nawa.” (2 Timo. 2:2) Ewa, Paulu kewulwile Timoteu hanga alongese mandumbu akwo yuma yize alilongesele. Chipwe musono chili chilemu chinji makulwana a mu chikungulwila kukaula chiyulo chacho. Mukulwana wa mu chikungulwila mupema, keshi kusweka yuma yize ananyingika yinatale ha umwe mulimo. Shimbu achilinge, kakulongesa akwo anyingike chize atamba kulinga mulimo wacho. Keshi kulipikala ngwo, atu waze analongesa mahasa kunyingika yuma yinji kuhiana iye. Keshi kulongesa wika tuyikuma tukehe-tukehe twa mulimo wenyi. Kakukwasa mandumbu waze anafumbu hanga akole ku ufulielo. Hachino, “malunga amwenemwene” waze analongesa, majama hanga akwase chikungulwila.

Kwamba pundu, Timoteu kazangile chinji mukanda uze amusonekenene kuli Paulu. Mutuhasa kunyonga Timoteu kanatange mukanda wacho yisuho yinji ni kupukuna ha chize mahasa kukaula yiyulo yacho mu mulimo wenyi.

Ni yetu musono tunazange kukaula yiyulo yacho. Kuchi mutuhasa kuchilinga? Ha kulihana chinji mu mulimo wetu ni kuufunga ni kulongesa akwetu yuma yize tunanyingika. Kashika, nyi twembulula Paulu, mutulinga kanawa “milimo ya mukwa kwambujola.”—2 Timo. 4:5.