NA HAWIKOM ṭha pakhat sinin thazaang peknak cakuat na hmuh tikah zeitindah na um? Cu bantuk cakuat kha Timote nih lamkaltu Paul sinin a rak hmuh, mah cu 2 Timote Baibal kha a si. Timote nih a dawtmi a hawikom nih a chimmi mah cakuat kha a rel khawh nakhnga a daihnak hmun a kawl lai ti cu a fiang ko. Timote nih hitin a ruah khawh men: ‘Paul cu a dam hnga maw? Ka rian kong he aa tlaiin a ka bawm khomi ruahnak a ka cheu maw? Mah cakuat nih phungchim rian ka ṭuannak le midang ka bawmh hnanak ah hlawhtlinnak hmuh dingin a ka bawm maw?’ Kan theih lai bantukin Timote nih mah biahalnak a phi kha a hmuh i mah cakuat kha a sunsak tuk. Hi capar ah mah cakuat chungin bawmtu a simi ruahnak cheuhnak kong kha zoh hna hmanh u sih.

Timote nih cakuat a hun rel tikah Paul nih ka zawn a ka ruah tuk ti kha a hngalhthiam colh. Paul nih “ka dawtmi ka fa” tiah a auh. (2 Tim. 1:2) Timote nih mah cakuat kha AD 65 hrawng ah a rak hmuh. Mah lioah anih cu kum 30 leng hrawng si dawh a si i hmuhtonnak a ngeimi Khrihfa upa pakhat a rak si cang. Paul he kum 10 leng rian an ṭuanṭi i a sinin tampi a rak cawn.

Paul nih zumhfek tein harnak tampi a inkhawhnak kong a hlathlai tikah Timote cu thazaang tampi a hmu ko lai. Paul cu Rom ah thong a tla i a rauhhlan ah thah a si cang lai. (2 Tim. 1:15, 16; 4:6-8) Paul nih “hi vialte ka innak hi” tiah a ti caah anih cu a ral a ṭha tukmi a si ti kha Timote nih a hngalh. (2 Tim. 2:8-13) Paul inkhawhnak a ngeihmi nih Timote bantukin kannih zong thazaang a kan ngeihter khawh.

Paul nih Timote kha a ṭuanmi Pathian rian cu a sunglawi tukmi in a hmuh nakhnga a forh. Timote nih “Pathian nih a pekmi laksawng kha nunter peng” seh tiah Paul nih a duh. (2 Tim. 1:6) Paul nih “laksawng” caah khaʹri·sma timi Greek biafang kha a hman. Mah Greek biafang i a hrampi a sullam nih man loin le kan phut lo buin kan hmuhmi laksawng kha a chim duhmi a si. Timote nih Khrihfabu ah a biapimi rian ṭuan dingin thim a si tikah mah laksawng kha a rak hmuh.—1 Tim. 4:14.

Timote nih mah laksawng ningin zeidah a rak tuah? Greek biafang ah ‘laksawng hman’ timi cu ‘Pathian pekmi laksawng mei bantukin alhter’ kha a chim duhmi a si. Cucaah Timote nih mah Paul  thazaang peknak bia a rel tikah inn ah tihmi lungmeihol alhternak kong kha a lung ah a chuak men lai. Mah lungmeihol cu a alh chin nakhnga cawh peng a hau. Dictionary pakhat nih Greek biafang (a·na·zo·py·reʹo) timi cu Paul nih a hmanmi lungcawlcanghnak le rian cheukhat kong he aa tlaiin lungthawhnak hun ngeih kha a chim duhmi a si tiah a ti. Cucaah Paul nih Timote kha ‘na rian ah na lungthin pe’ tiah a rak ti. Tuchan zongah lohmun rian kan ṭuan tikah lungthawhnak he kan ṭuan ve a hau.

Paul cakuat chung i a chimmi bia nih Timote kha lohmun rian a ṭuannak ah hlawhtlinnak hmuh dingin a bawmh rih. Paul nih hitin a ti: “Kan chungah a ummi thiang thlarau ṭhawnnak thawngin na kut chungah chiahmi thil ṭha kha him tein keng hna.” (2 Tim. 1:14) Mah thil ṭha cu zeidah a si? Timote nih zei tuah awk tinvo sung dah a ngeih? A hmasa Baibal caang i Paul a chimmi “cawnpiakmi biatak” timi nih Cathiang chungah hmuhmi biatak kha a chim duhmi a si. (2 Tim. 1:13) Phungchimtu pakhat in Timote cu unau pawl lawng si loin lohmun ah a ummi mi pawl sin zongah biatak cawnpiak dingin rian a ngei. (2 Tim. 4:1-5) Cun Timote cu Pathian tuu pawl a zohkhenhtu Khrihfa upa pakhat zongin rian pek a rak si. (1 Pet. 5:2) Jehovah thiang thlarau le Baibal aa bochannak thawngin Timote nih pek a simi biatak cawnpiaknak tinvo sung kha a rak kilven khawh.—2 Tim. 3:14-17.

Tuchan zongah midang kha biatak cawnpiak awkah rian pek kan si ve. (Matt. 28:19, 20) Mah pek kan simi a ṭha tukmi rian kha thla kan cam pengnak thawngin le Baibal hmaan tein kan hlathlainak thawngin kan sunsak peng khawh. (Rom 12:11, 12; 1 Tim. 4:13, 15, 16) Cun Khrihfa upa asiloah caantling rianṭuantu pakhat in a dang rian zong kan ngei kho men. Mah a sunglawimi rian nih aa toidormi le a bawmhnak caah Pathian aa bochanmi a kan siter. Cucaah Jehovah bawmhnak le zohkhenhnak kha kan i bochan i kan sunsaknak thawngin mah biatak kha kan kilven khawh.

Timote pek a simi rian cu amah nih a ṭuanmi rian kha midang zong nih an ṭuan ve nakhnga cawnpiak kha a si. Cucaah Paul nih Timote kha hitin a forh: “Tehte tampi hna theih ah ka chimmi bia kha i lak law, midang a cawnpiak kho ve dingmi na zumhmi hna kha va kenter hna.” (2 Tim. 2:2) Timote nih Khrihfa unau pawl sinin a cawnmi kha a rak cawnpiak hna. Tuchan i Khrihfabu hruaitu kip zong nih cutin tuah awkah i zuam cu a biapi tukmi a si. Hruaitu ṭha a simi nih cun rian kong he aa tlaiin a hngalhmi kong kha a thup lo. Mah canah midang nih mah rian kha an ṭuan khawh ve nakhnga a cawnpiak hna. A cawnpiakmi hna nih amah nakin tam deuh an hngalh dingmi asiloah ṭha deuh in an ṭuan khawh dingmi kha a thin a phang lo. Cucaah hruaitu a simi nih rian kong he aa tlaiin a hrampi kehlan lawng kha a cawnpiak hna lo. A cawnpiakmi hna nih Pathian lei ah an ṭhancho nakhnga le ṭha tein an hngalhthiam nakhnga bawmh a duh hna. Cuticun a cawnpiakmi “zumhfekmi pa” hna nih Khrihfabu kha hmualngei deuh in an bawmh khawh hna lai.

Timote nih Paul sinin a hmuhmi cakuat kha a sunsak tuk lai ti cu a fiang ko. Mah a ṭha tukmi ruahnak cheuhnak kha atu le atu a rel lai i a rian kha zeitindah a ṭha bik in ka ṭuan khawh lai timi kong kha a ruah lai ti cu kan mitthlam ah kan cuanter khawh.

Mah ruahnak cheuhnak kha kan si khawh chungin zulh kan duh. Zeitin in dah? Kan laksawng kha mei bantukin a alh peng nakhnga, biatak kan kilven peng khawh nakhnga le kan hngalhmi vialte kha midang kan cawnpiak khawh hna nakhnga fakpi in rian kan ṭuan kho. Cuticun Paul nih Timote sinah ca a kuat bantukin phungchim “rian vialte kha [kan] ṭuan” khawh.—2 Tim. 4:5.