KI MANNYER ou santi ler ou ganny en zoli let sorti kot en bon zanmi? Zapot Pol ti anvoy en let koumsa pour Timote. Ozordi, sa let i dan Labib e i apel 2 Timote. San dout, Timote ti anvi al dan en landrwa trankil pour li kapab lir sa ki son bon zanmi ti’n ekri li. Petet Timote ti pe mazinen: ‘Ki mannyer Pol i ete? Eski i pou donn mwan konsey ki kapab ed mwan dan mon servis? Eski son konsey i kapab ed mwan pour anons e ansenny sa bon nouvel byen e pour ed lezot?’ Parey nou pou vwar, Timote i ganny larepons sa bann kestyon e lezot ankor dan sa let. Dan sa lartik, nou pou vwar bann konsey pratik ki ganny trouve dan sa let.

Ler Timote ti lir konmansman sa let, deswit i ti konpran ki Pol ti vreman kontan li. Avek bokou lafeksyon, Pol ti apel li “zanfan ki mon kontan.” (2 Tim. 1:2) Timote ti ganny sa let ver lannen 65. I kapab ki sa letan i ti annan plis ki 30 an e i ti deza en ansyen eksperyanse. I ti’n travay avek Pol pour plis ki di-z-an e i ti’n aprann en kantite keksoz.

Timote ti’n bezwen vreman ganny ankouraze ler i ti aprann ki Pol ti pe reste fidel malgre i ti pe pas atraver difikilte. Pol ti dan prizon Ronm e i ti pe al ganny touye. (2 Tim. 1:15, 16; 4:6-8) Timote ti kapab vwar ki Pol ti annan kouraz parski Pol ti dir: “Mon kontinyen andire dan tou keksoz.” (2 Tim. 2:8-13) Parey Timote, landirans Pol i kapab ankouraz nou.

Pol ti ankouraz Timote pour konsider son servis konman en keksoz ki annan en gran valer. Pol ti anvi ki Timote i “kontinyen fer sa kado ki dan [li] brile parey dife.” (2 Tim. 1:6, not) Dan sa verse, Pol ti servi sa mo Grek khaʹri·sma pour “kado” ki vedir en kado ki pour nanryen e ki nou pa merite. Timote ti’n ganny sa kado ler i ti ganny swazir pour servi kongregasyon dan en fason spesyal.​—1 Tim. 4:14.

Ki Pol ti pe ankouraz Timote pour fer avek sa kado? Anmezir ki Timote ti lir sa lekspresyon “kontinyen fer sa kado ki dan ou brile parey dife,” i kapab ki i ti pe mazin  dife ki dimoun i servi kot lakour, ki parfwa i vin zis en labrez. Sa bann labrez ti bezwen ganny bourye pour fer li flanbe e donn plis lasaler. En diksyonner i dir ki sa verb Grek (a·na·zo·py·reʹo) ki Pol ti servi i vedir pour “repran, evante” setadir pour eksite e devoue pour fer en travay. Alor, Pol ti pe dir Timote: ‘Donn tou pour tou dan ou servis!’ Ozordi, nou bezwen fer parey, setadir devoue dan nou servis.

Dan sa let ki Pol ti ekri, Pol ti dir Timote en lot keksoz ki ti pou ed Timote reisi dan son servis. Pol ti ekri: “Protez sa keksoz presye ki’n ganny konfye avek ou gras a lespri sen ki dan nou.” (2 Tim. 1:14) Ki sa keksoz presye ki Timote ti’n ganny konfye? Dan sa verse avan, Pol ti mansyonn “bann bon lansennyman,” setadir laverite ki dan Lekritir. (2 Tim. 1:13) Konman en minis Kretyen, Timote ti bezwen ansenny laverite avek bann frer ek ser dan kongregasyon e osi avek bann dimoun dan teritwar. (2 Tim. 4:1-5) Osi, Timote ti’n ganny apwente konman en ansyen pour li pran swen avek troupo Bondye. (1 Pyer 5:2) Timote ti protez sa keksoz presye, setadir sa laverite ki i ti bezwen ansennyen, par depan lo lespri sen Zeova ek Son Parol.​—2 Tim. 3:14-17.

Ozordi, nou osi nou’n ganny konfye sa laverite ki nou ansenny lezot dimoun. (Mat. 28:19, 20) Annou pa zanmen oubliye ki sa laverite ki nou ansennyen i vreman presye alor nou bezwen kontinyen priye e etidye Labib regilyerman. (Rom. 12:11, 12; 1 Tim. 4:13, 15, 16) I kapab ki nou pe servi konman en ansyen dan kongregasyon oubyen nou dan servis a plen tan. Sa i en responsabilite presye ki devret fer nou annan limilite e depan lo Bondye pour ed nou. Alor, nou gard oubyen protez sa keksoz presye ki nou’n ganny konfye par depan lo Zeova pour ed nou.

Sa responsabilite ki Timote ti annan ti enkli form lezot pour fer sa travay ki i ti pe fer. I pour sa rezon Pol ti ankouraz Timote: “Bann keksoz ki mon’n ansenny ou . . . , ansenny sa bann keksoz avek bann zonm fidel pour ki zot osi zot ava byen kalifye pour ansenny lezot.” (2 Tim. 2:2) Pol ti fer Timote rapel ki i ti bezwen ansenny tou sa ki i ti’n aprann avek lezot frer. I enportan ki tou ansyen dan kongregasyon i annan sa menm lobzektif. En bon ansyen pa kasyet sa ki i konnen konsernan en responsabilite. O kontrer i ansenny lezot pour ki zot osi zot kapab fer sa travay. I pa per ki lezot i konn plis ki li oubyen ki zot fer sa travay pli byen ki li. Alor, sa ansyen pa pou ansenny zis bann keksoz de baz. I anvi ed bann frer ki i pe formen pour annan bon zizman e pour vin bann Kretyen matir. Dan sa fason, sa “bann zonm fidel” ki i’n formen pou kapab ed kongregasyon plis ankor.

Sirman Timote ti apresye sa let ki i ti’n gannyen avek Pol. Nou kapab imazin Timote pe lir sa let plizyer fwa e pe reflesir lo ki mannyer i kapab pli byen aplik sa bann konsey dan son servis.

Nou osi nou anvi fer parey Timote. Ki mannyer? Nou kapab fer bokou zefor pour kontinyen fer sa kado ki dan nou brile parey dife, protez sa keksoz presye ki nou’n ganny konfye e ansenny lezot tou sa ki nou konnen. Ler nou fer sa, nou pou fer parey Timote e nou pou “akonpli byen [nou] minister.”​—2 Tim. 4:5.