NEMENE la mekuna i epun ngöne la epuni a kapa la tusi ne la ketre sinee? Ame la ketre ijin, hnei Paulo hna cinyanyi tusi koi Timoteo me ithuecatre koi angeic. Celë hi lai hnaaluene tusi Timoteo e hnine la Tusi Hmitrötr. Maine jë, hnei Timoteo hna canga thele la ketre götran gaa pë mejen matre troa e la tusi qaathene la sinee i angeic. Maine jë hnei Timoteo hna hnying ka hape: ‘Tune kaa Paulo? Tro kö nyidrëti a hamë eamo koi ni göne la aqane troa eatrëne la hnëqang? Tro jë kö Paulo a xatua ni troa maca ngöne la huliwa ne cainöj me inine la itre atr?’ Tune la hne së hna troa ce wang, hnei Timoteo hna öhne la itre mekun ka sa la itre hnyinge i angeic, nge hetre itre xaa ini hnei angeic hna kapa. Ame ngöne la tane mekun celë, tro sa ce wang la itre xaa eamo hna qatreng ngöne la tusi celë.

Ame la Timoteo a nyiqaane e la tusi Paulo, canga öhne hi angeic la etrune la ihnimi Paulo koi angeic. Hnei Paulo hna hë angeic ka hape, “nekönge hniminang.” (2 Tim. 1:2) Maine jë, hnei Timoteo hna kapa la tusi Paulo ngöne lo macatre 65 M.K. Matre, traqa koi 30 lao macatre i Timoteo nge ketre qatre thup hë angeic. Ketre, traqa koi 10 lao macatre ne ce huliwa angeic me Paulo, matre nyimutre la itre ini hnei angeic hna xom.

Hnei Timoteo hna öhne la aqane mele nyipici Paulo ngöne la nöjei pengöne jol. Celë hi lai ka ithuecatre koi angeic. Hna akalabusi Paulo e Roma nge atre hnyawa hi nyidrë laka, kola troa humuthi nyidrë. (2 Tim. 1:15, 16; 4:6-8) Ngo öni Paulo: “Eni a cile huti ngöne la nöjei ewekë asë.” (2 Tim. 2:8-13) Hnei Timoteo hna öhne la aqane catr Paulo. Tui Timoteo, kola xatua së hnene la aqane mele nyipici Paulo.

Hnei Paulo hna ithuecatre koi Timoteo troa wangatrune la huliwa i angeic koi Akötresie. Paulo a ajane tro Timoteo a “ipicon kösë eë, lo ahnahna i Akötresie” ka ej e kuhu hni angeic. (2 Tim. 1:6) Ame la hnaewekë “ahnahna” ke, hna ujëne qene Heberu ka hape, khaʹri·sma. Kola qaja la ahnahna hna hamën gufa qa kuhu hni. Hnei Timoteo hna  kapa la ahnahna celë, ngöne lo kola ië angeic troa xome la ketre hnëqa ka sisitria e hnine la ekalesia.—1 Tim. 4:14.

Nemene la aqane tro Timoteo a wangatrune la ahnahna cili? Ame la Timoteo a e la hna hape, “ipicon kösë eë,” maine jë angeic a mekun la pengöne la eë. Maine tha hna ipicone kö së, tro hë ej a ae trootro nge tro pe hi a lapa la wanalep. Nyipiewekë troa ipicone matre troa mel la eë nge tro palahi a idreuth. Kola qaja ngöne la ketre itus ka hape, ame la hnaewekë qene Geres (a·na·zo·py·reʹo) hna qaja e celë hnei Paulo ke, kola hape, “amelene, ipicon.” Kolo lai a hape, “tro palahi a catr ngöne huliwa hna athip.” Eje hi, Paulo a ithuecatre koi Timoteo troa wangatrune la itre hnëqa hna ahnithe koi angeic. Ketre eamo ka lolo lai koi së enehila. Loi e tro fe sa catre huliwa ngöne la huliwa i Akötresie.

Hetre ketre eamo hna kapa hnei Timoteo ngöne la tusi qaathei Paulo. Kola xatua angeic troa maca ngöne la huliwa ne cainöj. Öni Paulo: “Thupëne hnyawa ju la trengamo cili hna hamë eö, jëne la uati hmitrötr ka eje thei eö.” (2 Tim. 1:14) Nemene la trengamo hna hamën koi Timoteo? Ame ngöne la xötre 13, Paulo a qaja la “itre trengewekë nyine loi,” ene la nyipici qa hnine la Tusi Hmitrötr. (2 Tim. 1:13) Pine laka, Timoteo la ketre hlue i Akötresie, matre loi e tro angeic a inine la nyipici kowe la itre trejin me kowe la itre xan. (2 Tim. 4:1-5) Ketre, angeic la ketre qatre thup, matre hnëqa i angeic troa thupëne la itre mamoe i Akötresie. (1 Pet. 5:2) Jëne la uati hmitrötre i Akötresie memine la Tusi Hmitrötr, hnei Timoteo hna thupëne la ahnahna, ene la itre nyipici nyine tro fë koi itre xan.—2 Tim. 3:14-17.

Ketre tu së fe, hetre ahnahna hna ahnithe koi së, ene la itre nyipici qa hnine la Tusi Hmitrötr hne së hna cainöjën. (Mat. 28:19, 20) Easa wangatrune la ahnahna cili, ngöne la easa catre thith me inine la Tusi Hmitrötr. (Rom. 12:11, 12; 1 Tim. 4:13, 15, 16) Maine jë, ketre qatre thup së maine pionie huti pena. Tro la ahnahna cili a xatua së troa hetre hni ne ipië me catre mejiune koi Akötresie. Celë hi matre, loi e tro sa thupën me wangatrune la ahnahna cili ka sisitria, me sipo ixatua koi Iehova matre tro sa eatrëne hnyawa la itre hnëqa së.

Ame la ketre hnëqa i Timoteo, tre, troa inine la itre xan. Celë hi matre, hnei Paulo hna cinyihan koi Timoteo, ka hape: “Ame la itre ewekë cili hnei eö hna kapa qaatheng . . . , hane jë fe eö ahnithe kowe la itre trahmanyi ka nyipici, matre tro fe angatr a atreine ini itre xan.” (2 Tim. 2:2) Loi e tro Timoteo a hane xomi ini qaathene la itre trejin trahmany me hane ce thawa me angatr la itre ini hna hamën hnei Paulo. Loi e tro fe la itre qatre thup a kuca lai enehila. Tha tro kö angatr a cipane la itre ithuemacanyi ka nyipiewekë. Loi e tro angatr a hane inine la itre xaa trejin trahmanyi la aqane troa eatrëne la ketre hnëqa. Ketre, tha angatre kö a zalu laka, tro itre xan a kuca hnyawa la huliwa hui angatr. Tha angatre kö a cipan maine hamëne pena la itre hnepe ithuemacanyi hnei angatr hna atre. Angatre pe a xatuane la itre hnei angatre hna inin matre troa atreine waiewekë me inamacan. E cili, tro hë “la itre trahmanyi ka nyipici” cili a macaj, me hane ini itre xane fe e hnine la ekalesia troa catre huliwa.

Nyipici, hnei Timoteo hna wangatrune la tusi Paulo. Nge hnei angeic hna canga fe me anyimua e lai tus me lapa mekun la itre eamo ka tru hna hamën hnei Paulo me catre trongëne itre ej.

Ketre tu së fe, easa ajane troa trongëne la itre eamo hna hamën. Tro sa tune kaa? Tro sa ipicon kösë eë, lo ahnahna i Akötresie me wangatrune ej. Loi e tro fe sa inine la itre xan la itre hne së hna atre. E cili, tune la hna ithuecatre hnei Paulo koi Timoteo, tro hë sa “eatrëne hnyawa la huliwa [së].”—2 Tim. 4:5.