N’I TERI sɔbɛ dɔ ye lɛtɛrɛ ci i ma walisa k’i jija, o be mun lo kɛ i la do? Ciden Pol y’o lɛtɛrɛ ɲɔgɔn ci a balimacɛ Timote ma. O lɛtɛrɛ lo be weele Bibulu kɔnɔ ko Timote ka bataki 2nan. Siga t’a la, Timote tun kɔrɔtɔnin lo ka yɔrɔ dɔ sɔrɔ, mankan tɛ yɔrɔ min na walisa k’a teri sɔbɛ ka lɛtɛrɛ kalan. N’a sɔrɔ a tun b’a yɛrɛ ɲiningara ko: “Pol be di? Ladili dɔ b’a fɛ k’a di n’ ma walisa ka n’ dɛmɛ n’ ka baara la wa? Yala o lɛtɛrɛ bena n’ dɛmɛ ka n’ ka cidenya baara kɛ ka ɲɛ ani ka tɔɔw dɛmɛ wa?” I ko an bena a ye cogo min na, Timote y’o ɲiningaliw jaabiliw sɔrɔ ani a ye miiriya nafaman caaman wɛrɛw sɔrɔ o lɛtɛrɛ kɔnɔ. Barokun nin na, an bena o lɛtɛrɛ ka ladili nafaman dɔw lajɛ.

Tuma min na Timote y’a daminɛ k’o lɛtɛrɛ kalan, a sinna k’a faamu ko Pol b’a janto ale la kosɔbɛ. Pol ko Timote ye ale ‘deen ye a be min kanu haali.’ (2 Tim. 1:2). N’a sɔrɔ Timote tun be ni saan 30 ni kɔ ye tuma min na a ye Pol ka lɛtɛrɛ sɔrɔ saan 65 fan fɛ Krista tile la. O y’a sɔrɔ a tun ye diinan mɔgɔkɔrɔ kolɔnbaga ye ka ban. A tun be baara kɛra ni Pol ye kabi saan 10 ni kɔ ani a tun ye koo caaman faamu Pol sababu fɛ.

Tuma min na Timote y’a mɛn ko Pol be gwɛlɛyaw muɲuna kantigiya la, siga t’a la o y’a jija kosɔbɛ. Pol tun be kaso la Ɔrɔmu ani yanni dɔɔni, u tun bena a faga (2 Tim. 1:15, 16; 4:6-8). Timote y’a faamu ko Pol jaa ka gwɛlɛ sabu Pol y’a fɔ ko: “Ne be koo bɛɛ muɲu.” (2 Tim. 2:8-13). Pol ka muɲuli be se k’an fana jija i ko a ye Timote jija cogo min na.

Pol ye Timote jija ko Ala ye baara min kalifa a ma, a k’o jati baara nafamanba ye. Pol y’a fɔ Timote ye ko: “I ka ninyɔrɔ min sɔrɔ ka bɔ Ala fɛ, i jija k’a to o tasuma mananin ye to.” (2 Tim. 1:6, Biblu Ala ta Kuma). Gɛrɛkikan kumaden min bayɛlɛmana ko “ninyɔrɔ,” o ye karisma lo ye. O gɛrɛkikan kumaden ɲɛsinna nilifɛn dɔ lo ma min be sɔrɔ gwansan ani nɛɛma lo k’a sɔrɔ. Timote y’o nilifɛn sɔrɔ tuma min na a sugandira ka baara kɛrɛnkɛrɛnnin dɔ kɛ kafo kɔnɔ.—1 Tim. 4:14.

Timote tun ka ɲi ka mun lo kɛ n’o nilifɛn ye? Mɔgɔw be tasuma min mana luu kɔnɔ, n’a sɔrɔ Timote miirila o la tuma min na a y’a kalan ko: “I jija k’a to o tasuma mananin  ye to.” Tuma dɔw la, o tasuma be kɛ komi a b’a fɛ ka faga. An ka ɲi k’o tasuma fiɲɛ walisa a ka mana ka ɲɛ. Daɲɛgafe dɔ ko Pol ye gɛrɛkikan kumaden (anazopireo) min fɔ, o kɔrɔ ko ka “tasuma ladon, k’a barika bonya, k’a fiyɛ a be mana ka ɲɛ.” O la, o kɔrɔ ko k’i jija ani ka kisɛya baara dɔ la. Pol tun be Timote ladira le ko: “I dusu don i ka baara la!” Bi, an fana ka ɲi k’o ɲɔgɔn lo kɛ, o kɔrɔ, ka kisɛya an ka cidenya baara la.

Pol ka lɛtɛrɛ kɔnɔ, a ye koo wɛrɛ fɔ min tun bena Timote dɛmɛ a k’a ka cidenya baara kɛ ka ɲɛ. Pol y’a sɛbɛ ko: “I ye koɲuman minw sɔrɔ, i ka olu minɛ kosɔbɛ Nii senuman barika la, min be an kɔnɔ.” (2 Tim. 1:14). Koo ɲuman juman lo tun kalifara Timote ma? Vɛrise 13nan kɔnɔ, Pol ko ale ye “kumaɲuman minw fɔ” Timote ye, o kɔrɔ, tiɲɛn kuma minw be Ala ka Kuma kɔnɔ (2 Tim. 1:13). Timote tun ye Ala ka baarakɛla ye minkɛ, a tun ka ɲi ka mɔgɔw kalan tiɲɛn koo la kafo kɔnɔ ani waajuli la (2 Tim. 4:1-5). Komi Timote tun ye diinan mɔgɔkɔrɔ ye fana, a tun ka ɲi ka Ala ka sagakulu kɔrɔsi (1 Piyɛri 5:2). Timote tun ye koo ɲuman minw sɔrɔ, o tun ye tiɲɛn kumaw ye, a tun be mɔgɔw kalan minw na. A tun bena se k’u minɛ ka ɲɛ a kɛtɔ k’a to Jehova ka hakili senu n’a ka Kuma k’a ɲɛminɛ.—2 Tim. 3:14-17.

Bi, tiɲɛn kumaw kalifara an fana ma ani an be mɔgɔw kalan u la (Mat. 28:19, 20). Walisa an kana ɲinɛ k’o tiɲɛn kumaw nafa ka bon kosɔbɛ, an ka ɲi ka to ka delili kɛ ani ka Ala ka Kuma kalan tuma o tuma (Ɔrɔm. 12:11, 12; 1 Tim. 4:13, 15, 16). N’a sɔrɔ an ye diinan mɔgɔkɔrɔ wala kudayi cidenya baarakɛla ye. O kunkanbaaraba ɲɔgɔn ka ɲi k’an lasun an k’an yɛrɛ majigi ani an k’an jigi la Ala kan walisa a k’an dɛmɛ. O la, kunkanbaara min kalifara an ma, an bena se k’o minɛ ka ɲɛ an kɛtɔ k’a jati fɛɛn nafamanba ye. An k’an jigi la Jehova kan fana walisa a k’an dɛmɛ k’o dafa.

Kunkanbaara minw tun kalifara Timote ma, o tun ma ɲɛsin ale kelen dɔrɔn ma. O tun ɲɛsinna mɔgɔ wɛrɛw fana ma. O lo kama Pol ye Timote jija ko: “I ye fɛɛn min mɛn ne fɛ . . . i k’o kalifa mɔgɔsɔbɛw ma minw be se ka mɔgɔ wɛrɛw kalan n’o ye.” (2 Tim. 2:2). Timote tun ye kalan minw sɔrɔ, a tun ka ɲi ka balima wɛrɛw kalan o la. A kɔrɔtanin lo diinan mɔgɔkɔrɔ kelen kelen bɛɛ k’a jija k’o ɲɔgɔn kɛ. Diinan mɔgɔkɔrɔ ɲuman be ni lɔnniya min ye baara dɔ koo la, a man ɲi k’o kɛ a kelen ta ye. A ka ɲi ka tɔɔw kalan walisa olu fana ka se k’o baara kɛ. A man ɲi ka siran ko u bena koo caaman lɔn wala ko u bena se o baara kɛcogo la koɲuman ka tɛmɛ ale kan. O kama, diinan mɔgɔkɔrɔ tɛ tɔɔw kalan koo jɔnjɔnw dɔrɔn na baara dɔ koo la. A be fɔrɔmasɔn dira minw ma, a b’a fɛ k’olu dɛmɛ u ka kɛ ni koow filɛcogo ɲuman ye. A b’a fɛ fana u ka hakilitigiya sɔrɔ, o kɔrɔ u ka ɲɛtaga kɛ Alako ta fan fɛ. O cogo la, a ye ‘mɔgɔsɔbɛ’ minw kalan, olu bena se ka kafo dɛmɛ bɛrɛbɛrɛ.

Siga t’a la, Timote teri sɔbɛ Pol ka lɛtɛrɛ diyara a ye kosɔbɛ. Ladili nafaman minw be Pol ka lɛtɛrɛ kɔnɔ, n’a sɔrɔ Timote y’o kalan siɲɛ caaman ani k’a filɛ a be se k’o sira tagama cogo min na a ka cidenya baara la.

An fana b’a fɛ k’o ladiliw sira tagama. An be se k’o kɛ cogo di do? An k’an jija ka to ka koo nunu kɛ: An ye ninyɔrɔ min sɔrɔ, an k’o ladon i ko tasuma, an ye koo ɲuman minw sɔrɔ, an k’u minɛ kosɔbɛ ani an kalanna min na, an ka tɔɔw kalan o la. N’an y’o kɛ, an bena se k’an ka cidenya “baara kɛ ka ɲa” i ko Pol y’a fɔ Timote ye cogo min na.—2 Tim. 4:5.