NA CAVA o dau vakila ni o ciqoma e dua na ivola veivacegui mai vua na nomu itokani vinaka? E vola e dua na ivola va qori na yapositolo o Paula vua na tisaipeli o Timoci, qori na ivola e vakatokai na 2 Timoci. E macala ga ni na vaqara e dua na vanua vakanomodi o Timoci me wilika kina na ka e vola mai o nona itokani. Ena rairai via kila: ‘Sa vakacava tiko o Paula? E bau dua nona ivakasala me vukei au ena noqu ilesilesi? Ena vukei au na ivola qo meu qarava vinaka noqu cakacaka vakaitalatala qai vukea eso tale?’ Eda na raica ni saumi vinaka na vakatataro nei Timoci ena ivola totoka qo. E vulica tale ga kina e levu tale na ka. Eda na dikeva ena ulutaga qo eso na ivakasala yaga ena ivola i Paula.

Ni wilika o Timoci na itekitekivu ni ivola qori, ena vakila sara ga nodrau veivolekati kei Paula. E veivakacegui nona vakatokai koya o Paula me “luvequ lomani.” (2 Tim. 1:2) Sa rairai yabaki 30 vakacaca tiko o Timoci ni ciqoma na ivola qo ena 65 G.V., ia e qase ni ivavakoso matua. Sa tini vakacaca na yabaki nona dau cakacaka vata tiko kei Paula, e vulica tale ga e levu na ka.

E macala ni na vakayaloqaqataki Timoci sara ga ni rogoca nona yalodina o Paula ni vosota na veika dredre. A vesu tiko o Paula e Roma, sa vakarau vakamatei tale ga. (2 Tim. 1:15, 16; 4:6-8) E raica sara ga o Timoci nona yaloqaqa na yapositolo o Paula ena nona kaya: ‘Au vosota na ka kece.’ (2 Tim. 2:8-13) Me vakataki Timoci, eda na vakayaloqaqataki tale ga ena nona ivakaraitaki vinaka ni vosota o Paula.

E uqeti Timoci o Paula me mareqeta vakalevu nona ilesilesi ni veiqaravi vua na Kalou. E vinakata vei Timoci me “vakacaudreva me vaka na buka na isolisoli ni Kalou” e tiko vua. (2 Tim. 1:6) Na vosa vaKirisi ni “isolisoli” e vakayagataka o Paula, na khaʹri·sma. E kena ibalebale na isolisoli se iloloma e soli wale. E soli vei Timoci na isolisoli qori ena gauna e lesi kina ena itavi lavotaki me veiqaravi ena ivavakoso.—1 Tim. 4:14.

Na cava me cakava o Timoci ena isolisoli  qori? Ni wilika na matavosa “vakacaudreva me vaka na buka,” ena rairai vakasamataka na buka e dau vakayagataki e vale, ena kama me lai qilaiso. Ena uturi na qilaiso qori me rawa ni caudre se katakata vakalevu. E tukuni ena dua na ivolavosa, ni vosa vaKirisi (a·na·zo·py·reʹo) e vakayagataka o Paula, e kena ibalebale “vakawaqari, vakacaudreva, irivi me waqa.” E dau vakatauvatani va qori me dusia na kena “marautaki vakalevu na gumatuataki ni dua na itavi.” E macala gona ni vakasalataki Timoci tiko o Paula: ‘Mo gumatua ena nomu ilesilesi!’ E bibi tale ga meda cakava qori nikua, meda gumatua ena noda veiqaravi.

Ni tomana nona wiliwili o Timoci, e raica e dua tale na matavosa e vakayagataka o nona itokani me vukei koya me maqosa ena nona cakacaka vakaitalatala. E vola o Paula: “Mo maroroya na ka talei e nuitaki vei iko ena veidusimaki ni yalo tabu, e tiko vei keda.” (2 Tim. 1:14) Na cava e nuitaki vua? Na ka talei cava e nuitaki vei Timoci? A cavuta o Paula ena tikina e 13 na “vosa dina,” qori na ka dina ena iVolatabu. (2 Tim. 1:13) Ni italatala lotu vaKarisito o Timoci, e nona itavi me vunautaka na ka dina ena loma kei na saula ni ivavakoso. (2 Tim. 4:1-5) A lesi tale ga o Timoci me qase ni ivavakoso, me vakatawa na qelenisipi ni Kalou. (1 Pita 5:2) Ena maroroya gona o Timoci na ka e nuitaki vua, ya na ka dina me vakavulica, ni nuitaka na veivuke ni yalo tabu i Jiova kei na nona Vosa.—2 Tim. 3:14-17.

Eda nuitaki tale ga nikua ena ka dina eda vunautaka ena cakacaka vakaitalatala. (Maciu 28:19, 20) Eda na mareqeta tiko ga vakacava na isolisoli qori? Ena rawa qori nida gumatua ena masu, nida vulica wasoma tale ga na Vosa ni Kalou. (Roma 12:11, 12; 1 Tim. 4:13, 15, 16) De dua eda rairai veiqaravi tiko vaqase se veiqaravi vakatabakidua. E dodonu meda yalomalumalumu nida nuitaki ena itavi va qori, meda raica kina na bibi ni noda nuitaka na Kalou. Eda na maroroya se taqomaka gona na ka eda nuitaki kina nida mareqeta, qai nuitaki Jiova me rawa nida qarava.

E nona itavi tale ga o Timoci me vakavulica eso tale ena nona itavi. Sa rauta me uqeti Timoci o Paula: “Na ka o rogoca vei au . . . mo tukuna . . . vei ira na tagane yalodina me rawa ni ganiti ira mera vakavulica vei ira eso tale.” (2 Tim. 2:2) E vinakati gona vei Timoci me vakavulica eso tale na tagane lotu vaKarisito ena ka e vakavulici kina. E bibi mera cakava tale ga qori na ivakatawa kece ena ivavakoso vaKarisito nikua. Na ivakatawa vinaka ena sega ni bureitaka na ka e kila me baleta na nona itavi. Ena vakavulica eso tale me rawa nira qarava tale ga. Ena sega ni leqataka de levu sara na ka era na kila, se na vinaka cake sara nodra veiqaravi. Ena sega gona ni vovodea na ka e vakavulica me baleta na itavi. Ena via vukei ira mera yalomatua ra qai vakatulewa vinaka, mera matua vakayalo. Era na yaga vakalevu ena ivavakoso na “tagane yalodina” e vakavulica.

E macala ga ni taleitaka vakalevu o Timoci na ivola nei Paula. Eda kila ni na dau taleva wasoma na ivakasala totoka qori qai vakasamataka vakatitobu, me rawa ni qarava vinaka nona ilesilesi.

E bibi meda muria tale ga na ivakasala qori. Ena sala cava? Meda gumatua ni vakacaudreva na noda isolisoli me vaka na buka, meda maroroya na ka e nuitaki vei keda, da qai vakavulica eso tale ena ka eda kila. Ena yaga vakacava? Me vaka ga e tukuna o Paula vei Timoci, eda na “vakacavara vinaka” kina na noda “cakacaka vakaitalatala.”—2 Tim. 4:5.