LÈ ON bon zanmi a-w, kè ou enmé onlo, ka voyé on lèt ba-w, ka sa ka fè-w ? On jou, lapòt Pòl voyé on lèt ba Timoté pou pé sa ankourajé-y. Jòdijou, nou ka touvé lèt-lasa an Bib-la é non a-y sé 2 Timoté. Sèten Timoté ay chèché on ti koté trankil pou i té vwè ka zanmi a-y maké adan lèt-lasa. Pétèt kè i pozé-y sé kèsyon-lasa : « Ki nouvèl a Pòl ? Ès i ké ban-mwen déotwa konsèy pou mwen pé sa fè travay an mwen pibyen ? Ès i ké di-mwen ka mwen fè pou mwen préché pibyen ? Ès i ké ban-mwen dé ti konsèy pou mwen pé sa édé lézòt pi fasilman ? » Kon nou ké ni lokazyon vwè, non sèlman Timoté touvé répons a sé kèsyon-lasa, men, anplisdisa, i aprann onlo dòt biten enpòwtan ankò. Adan awtik-lasa, nou ké palé dè déotwa konsèy kè nou ka touvé adan lèt-lasa.

A pa ti enmé Pòl té enmé Timoté é lè Timoté koumansé li lèt-la Pòl voyé ba-y la, i santi sa tousuit ! Dayè, Pòl jous kriyé-y « pitit an mwen kè an enmé » (2 Tim. 1:2). Timoté dwèt té ni 30 an apépré lè i rèsèvwa lèt-lasa, koté 65 a épòk an nou, men i té ja ansyen é i té ni onlo èkspéryans. Sa té ja ka fè plis ki 10 an kè i té ka travay èvè Pòl é Pòl aprann-li onlo biten toubònman !

Magré difikilté Pòl té ka jwenn, i pa jen lagé. É lè Timoté té ka vwè jan Pòl té ka andiré, sa dwèt ankourajé-y toubònman ! Pòl té lajòl a Wòm é i té sav kè yo té k’ay tchouyé-y talè (2 Tim. 1:15, 16 ; 4:6-8). Men magrésa, i maké : « An ka kontinyé andiré tout biten » (2 Tim. 2:8-13). Kifè, Timoté konstaté kè zanmi a-y té plen kouraj toujou. Pòl sé té on nonm ki té ka andiré. Ègzanp a-y ba Timoté onlo fòs é i pé ban-nou onlo fòs osi.

Pòl di Timoté kè konm sé pou Bondyé i ka travay, fò i ba travay-la i ka fè la onlo valè. I té vé kè Timoté ba don-la Bondyé ba-y la bon ‘chabon konsi sé té [on] difé’ (2 Tim. 1:6). Adan vèwsé-lasa, yo itilizé lèmo kharisma, on mo grèk ki vé di « don ». Lèwvwè yo ka sèvi èvè mo-lasa, sé pou palé dè on kado kè on moun ki donan ka fè-w é kè ou pa menm mérité. Yo té chwazi Timoté pou fè on travay èspésyal adan lasanblé-la, é sé  a moman-lasa Bondyé ba-y don-lasa (1 Tim. 4:14).

Ka pou Timoté té fè èvè don-lasa ? Pòl té di Timoté kè fò i té ba don-lasa ‘chabon, konsi sé té [on] difé’. Pétèt kè, lè Timoté li èksprésyon-lasa, sa dwèt fè-y sonjé kè lèwvwè ou limé on foyé-difé, fò ou ka vanté-y pou i pé sa voyé chalè é pou i pé sa voyé flanm. Adan vèwsé-lasa, vèwb grèk-la Pòl ka itilizé la sé anazopyreo. Sèlon on diksyonè, mo-lasa vé di « ba-y fòs », « pa lésé-y étenn ». Adan on sans, sa pé vé di kè ou cho pou fè on travay, é kè ou anvi pòté bon mannèv pou fè-y. An réyalité, Pòl té ka di Timoté kè fò i té pran travay-la yo té ba-y fè la oséryé. É konsèy-lasa sé pou nou osi. Kèlkèswa travay-la nou ka fè la pou Jéova, fò-nou pòté bon mannèv lè nou ka fè-y.

Adan lèt-lasa, Pòl ba Timoté on konsèy pou kò a-y té vin pibon an ministè-la. Pòl di-y : « Trézò-la yo ba-w la, tchenbé-y fò grasa lèspri sen la ki andidan an nou la » (2 Tim. 1:14). Ki trézò yo té ba Timoté ? Répons-la adan 2 Timoté 1:13. Adan pasaj-lasa, Pòl ka palé dè « sé bon pawòl-la » kivédi dè vérité-la ki ka touvé-y adan Lézékriti. É antankè sèwvitè a Bondyé, fò Timoté té anségné vérité-lasa an lasanblé-la. Anplisdisa, fò i té édé moun a téritwa-la dékouvè vérité-lasa osi (2 Tim. 4:1-5). É konm yo té nonmé-y ansyen, fò i té pran swen a twoupo a Bondyé (1 Pyè 5:2). Sé konsa i té ké tchenbé trézò-la yo ba-y la fò, kivédi sé vérité-la pou i té anségné-la. Pou i té rivé fè sa, fò i té konté asi lèspri sen a Jéova é fò i té sèvi èvè Pawòl a-y (2 Tim. 3:14-17).

Nou osi, yo ban-nou on bèl trézò. Trézò-lasa sé sé vérité-la nou ka aprann moun konnèt an téritwa-la (Mat. 28:19, 20). Si nou ka priyé toutlè, é si nou ka étidyé Pawòl a Bondyé touléjou, nou ké montré kè nou ka kontinyé ba trézò-lasa onlo valè (Wom. 12:11, 12 ; 1 Tim. 4:13, 15, 16). Anplisdisa, pétèt kè nou ansyen, oben nou ka sèvi Jéova aplentan. Si sé sa, Jéova ban-nou on bèl trézò toubònman. Men a pa pou nou akwè-nou ! Okontrè, fò-nou ni imilité é fò-nou fè fon asi Jéova a san pou san. Si sé konsa nou ka aji, nou ké montré kè nou ka ba trézò-la Jéova ban-nou la onlo valè toubònman !

Timoté té ni ondòt rèsponsabilité ankò : fò i té fòwmé lézòt. Sé pousa Pòl di-y : « Sé biten-la ou tann-mwen di la [...], mété-yo an men a nonm ki fidèl, é yo a tou a yo, yo ké kapab anségné lézòt » (2 Tim. 2:2). Fò Timoté té aprann sé frè-la tousa Pòl té aprann-li. Jòdijou, sé sa pou chak ansyen chèché a fè. On bon ansyen pa’a kaché pon enfòwmasyon ki té’é pé itil pou sélézòt frè-la. I ka montré-yo kijan pou yo fè sèwten travay pou yo rivé fè-y tousèl a yo. I pa’a mèt an tèt a-y kè si i di frè-la tousa i konnèt, frè-la ké vin pi fò ki-y é kè yo ka riské dè ba-y biyé-pa-lapenn a-y. I pé’é ba-y yenki tikrazi enfòwmasyon. Sa i vé, sé kè frè-la i ka fòwmé la aji èvè bon jijman, é kè i rivé vwè ka ki dèyè do a on pwoblèm é ola sa pé menné. Konsa, i ké édé frè-la vin on krétyen ki ni onlo èkspéryans. Kifè, sé « nonm fidèl » la kè i fòwmé la ké pé édé lasanblé-la plis ankò.

A pa ti kontan Timoté dwèt té kontan lèt-la Pòl voyé ba-y la ! Sèten i té ka li-y, i té ka wouli-y, é i té ka pran tan réfléchi asi sé konsèy-la Pòl té ba-y la pou i té vwè kijan pou i té mété-yo an pratik.

Nou osi, nou vé mèt sé konsèy-lasa an pratik. Kijan nou pé fè sa ? Fò-nou fè éfò pou nou pa lésé don-la Bondyé ban-nou la étenn. Fò-nou ‘ba-y chabon konsi sé té [on] difé’. Fò-nou tchenbé trézò-la Bondyé ban-nou la fò. Fò-nou fòwmé lézòt. É pousa, fò pa nou kaché pon enfòwmasyon ki té’é pé édé-yo fè travay a yo byen. Si sé konsa nou ka aji, nou ké suiv on konsèy Pòl ni lokazyon ba Timoté : nou ké « sèvi Bondyé afon » (2 Tim. 4:5).