TUMCHEA eka ixtta koddlean tumkam ek urbebhorit chitt melltta tednam tumkam koxem dista? Timotak apostl Paulu koddlean oxinch ek chitt mell’lli. Bible-ant 2 Timotak hem pustok, hi chitt zaun asa. Timotak tachea mogall ixtta thaun hi chitt mell’lli tednam ti vachunk tannem ek xant zago vinchun kaddlo astolo. Timotachea monant ghoddie he prosn aile astole: ‘Paulu koso asa kai? Mhaka asloleo zobabdari vo sueog bore toren korunk tannem mhaka koslo tori sol’lo dila kai? Porgottnni korunk ani herank modot korunk hea chittie thaun mhaka adar zatolo kai?’ Hea moladik chittie thaun Timotak hea prosnanchea zobaba borabor anik zaitem xikonk mell’llem mhunn ami hea lekhant polloitolim. Punn atam ami hea chittient aslolea thoddea mhotvachea vixoi-ancher dhean dium-ia.

Timotan hea chittiechi survatechi utram vachlim tednam Paulu tacho kitlo mog korta tem taka dison ailem. Paulun taka mogan ‘mhozo opurbaiecho put’ mhunnttlo. (2 Tim. 1:2) Sumar 65 K.X.-ant Timotak hi chitt mell’lli tednam to ghoddie 30-a poros chodd piraiecho aslo astolo. Ani zaitea vorsam thaun to vhoddil mhunn seva kortalo. Tannem hachea poili Paulu sangata dha vorsam poros chodd temp kam kel’lem ani tachea thaun to zaitem xikonk povlo.

Paulu visvaxiponnan tras sostalo tem vachun Timotak khub urba mell’lli astoli. Tea vellar Paulu Romant bondkhonnint aslo ani beginuch taka jivexim marche asle. (2 Tim. 1:15, 16; 4:6-8) Punn Paulu dhirvont aslo mhunn tachea hea utrantlean Timotak kollon ailem: “Hanv hem sogllem sosnnikaien bhogtam.” (2 Tim. 2:8-13) Timota bhaxen Pauluchea hea dhirvont udharonnantlean amkam-i ghottai mellonk xokta.

Devachea sevent aslolo sueog khub moladik mhunn lekhunk Paulun Timotak urba dili. ‘Devan taka dil’lea vorgunnacho uzo tannem odhik peronk vo vaddounk’ zai mhunn Paulun sanglem. (2 Tim. 1:6) “Vorgunn” hea utrak Paulun khaʹri·sma hem utor uzar kel’le. Hea Grek utracho orth ek funkott dennem vo favona toslem ek dennem vo vorgunn zaun asa. Sobhent ek khas seva korunk taka vinchun kaddlo tednam taka hem dennem mell’llem.—1 Tim. 4:14.

Hea denneachem Timotan kitem korunk zai mhunn Paulun sanglem? ‘Vorgunnacho uzo odhik  peroi vo vaddoi’ mhunn Timotan chittient vachlem tednam, ghora bhitor uzo pettoun dovrunk uzar kortale te inglle tachea ugddasak aile astole. Uzo pettot dovrunk inglleank perunk zai aslem vo iglleank haloun uzo vaddounk zai aslo. Hanga Paulun uzar kelolea Grek utracho orth (a·na·zo·py·reʹo) “portun pettovop, porot jiv haddop vo inglleancher funk marop.” Hacho orth, ‘ek kam korunk eklean urba vaddovop’ oso zata. Dusrea utramnim Paulun Timotak oso sol’lo dilo: ‘Tuka mell’llolea sueogant tujean zata titlem kor.’ Teach bhaxen, amkam aiz mell’lloleo sueog vo asololi seva ami urben korunk zai.

Aplea mogall ixtta thaun mell’llolea chittie thaun, porgottnnek faideak poddtta toslo anik ek vixoi Timotak mell’llo. Paulun boroilem: “Tuje adhin kel’lo tthevo amche sovem jietolea Povitr Atmeachea bollan rakhun dovor.” (2 Tim. 1:14) To tthevo mhunnttlear kitem? Timotak koslo tthevo dil’lo? Hache poilinchea versant Devachea Utrant boroilolea ‘sotachea’ xikounne vixim Paulu sangtalo astolo. (2 Tim. 1:13) Timot ek Kristi vhoddil zal’lean tannem sobhentlea bhav-bhoinnank ani tea vattarantlea lokank sot xikounk zai aslem. (2 Tim. 4:1-5) Toxench taka vhoddilachi zobabdari aslolean Devachea menddranchi dekh-rekh korchi zobabdari taka asli. (1 Ped. 5:2) Tor Timotan apleak dil’lo tthevo rakhonk zai aslo. Hacho orth, tachea lagim aslolem sot dusreank xikoitana tannem Jehovachea povitr xoktecher ani tachea Utracher patieunk zai aslem.—2 Tim. 3:14-17.

Aiz amchea lagim pasun dusreank sangonk sot asa. (Mt. 28:19, 20) Ami dusreank xikoita tem sot kitlem moladik asa tem ami kednanch visorchem nhoi. Taka lagon ami sodanch magnnem korunk zai ani Devachem Utor xikot ravonk zai. (Rom. 12:11, 12; 1 Tim. 4:13, 15, 16) Tea bhair, sobhent vhoddil zaun seva korcho, purnn vellachi seva korchi vo her sueog pasun amkam asonk xoktat. Osle sueog amkam astat tednam ami chodd khaltim zaunk zai ani Jehovachea modoticher chodd patieunk zai. Amkam aslolo sueog vo seva ami moladik mhunn lekhtat tednam ani ti samballunk modotik lagon Jehovacher patietat tednam amkam dilolo ho tthevo ami rakhunk pavtat.

Apunn korta tem kam her bhavank xikouchim zobabdari pasun Timotak asli. Taka lagon Paulun Timotak sanglem: “Tunvem mhoje koddlem aikolai, tem tum herank-ui xikounk purte zatole toslea khatrechea monxanche adhin kor.” (2 Tim. 2:2) Timot Paulu thaun xiklam tem tannem her bhavank xikounk zai aslem. Aiz sobhentle vhoddil pasun hench korunk vavurtat. Ek boro vhoddil dusreank ek kam xikoitana xikounk zai aslolea mahitint thoddi mahiti lipoun dovrina. Tachea bodlek tem kam bore toren korunk to xikoita tea bhavak goroz ti sogli mahiti dita ani to bhav apnnem xikoilolem kam aplea poros boro kortolo mhunn taka bhirant asona. Tor to vhoddil xikoitana sogli mahiti dita ani to proxikxonn dita tea bhavachi somzonni ani zannvai vaddoun taka sotant ghott zaunk modot korta. Hea toren he ‘khatreche munis,’ sobhek anik modot korunk pavtole.

Paulu thaun mell’lloli hi chitt Timotan khub valorachi mhunn lekhli. Tannem ti chitt porot-porot vachun tantuntlean mell’llole sol’le apunn aplea jivitant koxe lagu kortolo hacher niall kelo astolo.

Ami pasun hea chittientle sol’le apnnaunk zata. Koxe? Zoso ami uzo vaddoitat, tea toren amkam dilolem dennem vo kam ami urben korunk zai. Amkam dilolo tthevo vo sot ami rakhonk zai. Ani dusreank xikoitana ami zannam ti sogli mahiti tankam diunk zai. Hea toren Paulun Timotak sanglem toxem ami pasun ‘purnn toren xubhvortoman porgottunk’ pavtolim.—2 Tim. 4:5, NW.