¿JAMÜSÜCHE paaʼin nüshajüle pümüin wanee paʼaleewain wanee karaloʼuta atütüleʼeraka maʼin paaʼin? Ashajünüsüinka wanee karaloʼuta nümüin Timoteo nutuma chi aluwataaushikai Pablo. Tia karaloʼutakat, shia süpüshi tü karaloʼutachein eekat suluʼu tü Wiwüliakat. Shia tü kanüliakat tü Chiiruaajatkat Karaloʼuta nutuma Pablo nümüin Timoteo. Nüchajaakajasaʼa Timoteo eeinjachire naashajeʼerüin tia karaloʼutakat, jama niyaawateein saaʼu tü nüshajakat chi naʼaleewainkai nümüin. Eesüjaʼa müle nünüiki Timoteo mayaa: «¿Jamakajasaʼa Pablo chaa eere nia? ¿Eesüche tü nüküjeekat tamüin süpüla anainjatüin sukuwaʼipa tatuma tü taʼyataainkat nümüin Jeʼwaa? ¿Sükaalinjeeiche taya tü sümakat karaloʼutakat tüü süpüla tatüjain aküjaa pütchi, ekirajaa wayuu otta takaalinjeein na waneinnua?». Nüküjain Pablo süchiki tia otta süchiki waneirua kasa suluʼu tia karaloʼutakat. Wekirajaajeerü anain waneirua pütchi akaalinjeenaka waya.

Wanaa sümaa naashajeʼerüin Timoteo tü karaloʼuta ajütünakat nümüin nutuma Pablo, niyaawatamaata aaʼu kachipünaain nia naaʼin Pablo. Anuu nünüiki Pablo nümüin: «Pia tachonkai aishikai tapüla» (2 Tim. 1:2). Ashajünüsü tia karaloʼutakat nümüin Timoteo soʼunnaa tü juyakat 65, eesüjaʼa maʼaka saaʼin 30 süsapoʼumüin nuuyase soʼu tia otta kakaliaichi nia laülaashin suluʼu tü outkajaaleekat. Alatüsü suulia poloo juya niʼyanaajiraakalü oʼu Timoteo nümaa Pablo otta watta saalii tü kasa nütüjakat nünainjee.

Atütülaakajasaʼa maʼin naaʼin Timoteo naapapa süchiki ayatüinya Pablo achecherüin naaʼin soʼunnaa tü kasa mojusü alatakat nümüin. Chajachi püreesain Pablo chaa Roma otta oʼutunajachi aaʼin nia (2 Tim. 1:15, 16; 4:6-8). Niyaawata aaʼu Timoteo, meimmoluin Pablo sünainjee tü nümakat: «Müshijeseʼe taya, achecherüin taaʼin suʼunnaa süpüshua tü müliaa teʼrakat» (2 Tim. 2:8-13). Akatchinraajeerü waaʼin maʼaka sükatchinraain naaʼin Timoteo sünainjee nüchecherüin naaʼin Pablo soʼunnaa tü kasa mojusü alatakat nümüin.

Nüküjain Pablo nümüin Timoteo kojutuinjatüin maʼin nümüin tü niʼyataainkat nümüin Maleiwa. Shia keeʼireeka naaʼin Pablo naaʼinmaainjatüin Timoteo tü atüjaa aapünakat nümüin nutuma Maleiwa (2 Tim. 1:6). Tü pütchi «aapünakat» makat nutuma Pablo, sünainjeejatü tü pütchikat griego khárisma. Pütchikat tia, aküjasü süchiki wanee kasa aapünakat wamüin masalouiwa sümaa nnojoluin wamüinjatüin shia  otta nnojoluin waaʼinrüin wanee kasa süpüla wakanajüinjatüin shia. Aapünüsü tia nümüin Timoteo wanaa sümaa nüneekünüin süpüla niʼyataainjachin sünain wanee kasa suluʼu tü outkajaaleekat (1 Tim. 4:14).

¿Kasache naaʼinrajatka Timoteo süka tü aapünakat nümüin? Tü pütchikat «paaʼinmajüinjatüin tü atüjaa aapünakat paala pümüin» makat suluʼu griego «maa putuma maʼaka saaʼin wanee siki», maluʼulu. Wanaa sümaa naashajeʼerüin Timoteo tia pütchikat, eesüjaʼa süntajaale suluʼu nikii tü alatakat sümüin tü sikikat wanaa sümaa shiyokojoweein. Ayokojoosü shia shiʼipaʼaya. Shiasaʼa joo mapa, apütaʼalaasü neʼe shikemechin. Choʼujaasü shipeʼipajaanajatüin süpüla kawaralainjatüin maʼin shia. Saashin wanee karaloʼuta, tü pütchi nüküjakat Pablo suluʼu griego (anazōpyréō), «achuwajawaa süchikuaʼa, epeʼipalawaa», maluʼulu. Tü nüküjeekat Pablo nümüin Timoteo, shia niʼyataashaatainjachin süka süpüshuaʼa naaʼin. Müshi nümakat aaʼin Pablo nümüin: «Paaʼinmaa maʼin tü piʼyataainkat». Müinjatiaʼaya sukuwaʼipa tia watuma maaʼulu yaa, aʼyataainjana maʼin waya nümüin Jeʼwaa süka süpüshuaʼa waaʼin.

Nüküjain Pablo suluʼu tü karaloʼuta nüshajakat nümüin Timoteo, wanee pütchi akaalinjeechikai nia süpüla anainjatüin sukuwaʼipa tü niʼyataainkat nümüin Maleiwa. Anuu tü nüshajakat nümüin: «Anakaja müleka paaʼinmajüle tü pütchi shiimüin aapünakat pümüin suulia amülajüin neʼe shia. Chi akaaliijakai waya sünain waaʼinmajüin tia pütchikat, nia chi Naaʼinkai Maleiwa süka eein nia suluʼu waaʼin» (2 Tim. 1:14). ¿Kasache tü pütchi shiimain aapünakat nümüin Timoteo? Nüküjain Pablo suluʼu tü wetsiikulokot 13 shiain tü pütchi nikirajüinjatkalü anain Timoteo, tü eekat suluʼu tü Ashajuushikat (2 Tim. 1:13). Nikirajüinjana Timoteo na anoujashiikana süka tü pütchi shiimüinkat otta nikirajüinjana na wayuukana nüküjapa pütchi (2 Tim. 4:1-5). Aneekünüshi Timoteo süpüla laülaashinjachin nia suluʼu tü outkajaaleekat (1 Ped. 5:2). ¿Kasache naaʼinrajatka Timoteo süpüla naaʼinmajüin tü pütchi nikirajüinjatkalü anain? Nuʼunirüinjatü nukuwaʼipa nükajee chi naaʼinkai Jeʼwaa otta sükajee tü sümakat tü Wiwüliakat (2 Tim. 3:14-17).

Akaataajaʼa wayakana maaʼulu yaa, aapünüsü wamüin tü pütchi shiimain wekirajüinjatkalü anain wayuu (Mat. 28:19, 20). Ayateeria kojutuin wamüin tia pütchi shiimain wekirajakalü anain, woʼuraajüle nümüin Jeʼwaa otta waashajeʼerawaire tü Wiwüliakat (Roma 12:11, 12; 1 Tim. 4:13, 15, 16). Otta eeshijaʼa laülaashire pia jee piʼyataale waneepia nümüin Jeʼwaa. Tü pütchi shiimain aapünakat wamüin sükaalinjain waya süpüla nnojoluinjatüin yaletüin waaʼin otta süpüla weʼitaainjatüin waaʼin nünain Jeʼwaa. Waaʼinmajüle tia pütchikat kojuteerü shia wamüin otta weʼitaajeerü waaʼin sünain nükaalinjeenain waya Jeʼwaa.

Naashin Pablo, nikirajüinjana Timoteo na wayuu aaʼinrakana waneepia tü aluwataanakalü anain naya süpüla natüjainjanain ekirajaa wayuu (2 Tim. 2:2). Nüküjain Pablo nümüin Timoteo nikirajüinjanain na waneinnua sünain tü nütüjakalü apüleerua. Müinjatiaʼaya sukuwaʼipa tia natuma na laülaashiikana maaʼulu yaa. Wanee laülaashi anakai akuwaʼipa, nnojoishi jeʼiyein saaʼu tü nütüjaakalü aaʼu süchiki wanee aʼyatawaa, nikirajüin na waneinnua sünain süpüla natüjainjanain süpüleerua. Nnojotsü mmoluwaain naaʼin saaʼu natüjaleejeenain na waneinnua nuulia jee analeejeeriain sukuwaʼipa natuma. Nnojotsü neʼe naküjain namüin tü sukuwaʼipainjatkat wanee kasa natuma, nekirajüin naya süpüla kekiinjanain naya, nayaawatüinjatüin saaʼu wanee kasa otta laülaainjatüin naaʼin sünain anoujaa. Naaʼinrüle tia, yapeena na wayuu nikirajakana süpüla nakaalinjain maʼin na wawalayuukana.

Kojutukajasaʼa maʼin nümüin Timoteo tü pütchi ashajünakat nümüin nutuma Pablo. Naashajeʼerawaikajasaʼa Timoteo tü pütchi nüshajakat Pablo nümüin otta jülüjakajasaʼa naaʼin kasainjatüin naaʼinrüin süpüla noonooinjachin sümaa tia pütchikat.

Waaʼinreʼeinya wayakana tü sümakat tia karaloʼutakat. ¿Kasakaʼa waaʼinrüinjatüin süpüla wountuin tia? Waaʼinmajüinjatü tü kasa naapakat wamüin Jeʼwaa, müinjatü shia watuma maʼaka saaʼin sukuwaʼipa wanee siki wepeʼipalakat suulia shiyokojoʼolooin otta wekirajüinjana na waneinnua sünain tü kasa watüjakalü apüleerua. Müle shia watuma, yapeena waya süpüla wekeraajüin tü waʼyataainkat maʼaka nüküjain shia Pablo nümüin Timoteo (2 Tim. 4:5).