JA KETAMUKO tä kukwe tike mä kräke ja töi kwinbiti, ¿yebätä jata nemen ruin ño mäi? Apóstol Pablo kukwe ye kwrere tikani Timoteo kräke. Tärä tikani ye tä Bibliabätä aune kädekata tärä tikani ketebukäre Timoteo ie. Timoteo tö namani ñäkäi tärä yebätä kä kaibe te aune ja ketamuko käkwe dre tikani kräke tö namani gai. Timoteo namani kukwe ne kwrere ngwentari raba ruin nie: “¿Pablo yeta ño? ¿Sribi nuainta tikwe ye tikwe nuaindre ño bäri kwin tö mikabätä gare tie ya? ¿Tärä tikani kwe ti kräke yebiti ti raba kukwe driere bäri kwin aune yebiti nitre mada dimike ya?”. Kukwe ngwantarita ne aune kukwe ngwantarita mada mada ye mikani gare kukwe tikani yebätä. Kukwe meden ütiäte tikani yete ye ani mike gare ruäre jai.

Tärä tikani Timoteo ie yebätä ñäkäbare kwe ngwane, niara ye ütiäte Pablo kräke nükani gare bengwairebe ie. Pablokwe töi kwinbiti kädekani monso tare tikwe (2 Tim. 1:2). Kukwe tikani Timoteo ie ye ngwane, kä namanina 30 biti bäribiti kä 65 ye ngwane aune kukwe namanina gare krubäte ie sribibätä ni ji ngwanka konkrekasionte erere. Sribibarera kwe Pablobe kä kwäjätä biti bäri te aune ja kitanina krubäte kwe Pablobe.

Pablo nämäne kä ngwen nüke jai kukwe tare yebätä ye namani gare Timoteo ie ngwane, ye käkwe dimikani krubäte raba ruin nie. Nämäne ngite Roma aune murie ketadre ye käi jatanina nüke (2 Tim. 1:15, 16; 4:6-8). Tita kä ngwen nüke jai kukwe jökräbätä tikani Pablokwe, yebiti brukwä kwekebe jai jutuabare Timoteo ie (2 Tim. 2:8-13). Pablokwe kä ngwani nüke jai ye käkwe Timoteo dimikani krubäte aune ye raba ni dimike krubäte arato.

Pablokwe Timoteo töi mikani sribi Ngöbökwe ye mike tuin jondron ütiäte kwrere jai. Niebare kwe ie: “Tibike mäträre mäbätä krörö: Sribi biani Ngöbökwe mä ie, [...] ne jutra dikaka jankunu mäkwe” (2 Tim. 1:6, NGT). Pablokwe kukwe griego khárisma kädekaninte nete blitakäre “sribi” yebätä. Kukwe griego ye abokän jondron bianta ngwarbe nie ñaka bian bä nie aune ni ñaka tä ganainne meden gärätä. Sribi o jondron ye biani Timoteo ie dianinkä sribikäre konkrekasionte ye ngwane (1 Tim. 4:14).

¿Sribi biani Timoteo ie yebiti dre nuaindre kwe? ‘Sribi biani Ngöbökwe mäi ne jutra dikaka  jankunu mäkwe’ niebare Pablokwe ngwane, ñukwä jutra ngitiekä gwi ye tä niken nötöte bätärekä bätärekä jatäri aune ruäre ngwane ñukwä okwäbeda aibe tä nemen yebätä töbika nämäne kwe raba ruin nie. Jutra gitiadrekä jankunu aune rabadre ngire krubäte yekäre okwä bukadrekä jankunu. Diccionario keteiti tä niere erere, kukwe griego (anazōpyréō) kädekaninte Pablokwe nete ye abokän “ñukwä okwä bukadrekäta” meden gäräbare kwe. Kukwe madabiti, Timoteokwe sribidre kä jutobiti meden gäräbare Pablokwe ie. Ye abokän Pablokwe niebare krörö ie raba ruin nie: “Mäkwe sribi nuain ja brukwä ngöibiti”. Ye erere nikwe nuaindre kä nengwane. Nikwe ja di ngwandre sribikäre Ngöbö kräke kä jutobiti.

Kukwe tikani Pablokwe Timoteo ie yebätä Timoteo ñäkäbare jankunu aune kukwe keteiti käkwe dimikai kukwe driekäre kwin ye kwani ie. Pablokwe tikani: “Kukwe kuin era metre Jesubtä mata dirire, yebti abko makwe kukwe ngwarbe ngwarbe krai. Ngöbö Üai Deme tä nüne nibtä abko diebti makwe kukwe ngwarbe krai” (2 Tim. 1:14). ¿Jondron meden ütiäte biani Timoteo ie? Bersikulo käne yete Pablokwe blitabare kukwe kwin yebätä, ye abokän kukwe metre tä Bibliabätä meden gärä nämäne kwe (2 Tim. 1:13). Timoteo ye abokän sribikä Ngöbökwe, yebätä kukwe metre driedre kwe konkrekasionte aune nitre ñaka kukwebätä ie (2 Tim. 4:1-5). Ne madakäre, Timoteo kädekani ni ji ngwanka konkrekasionte oveja Ngöbökwe ye ngübakäre (1 Ped. 5:2). Jondron ütiäte biani Timoteo ie ye abokän kukwe metre drie nämäne kwe, ¿ye kriemikadre ño kwe? Üai deme Jehovakwe aune Kukwe kwe yebiti kriemikadre kwe (2 Tim. 3:14-17).

Kukwe metre drieta nikwe nitre madai ye abokän jondron ütiäte biani nie arato (Mat. 28:19, 20). Kukwe metre drieta nikwe ni madai ye abokän ütiäte ye nikwe ñaka käi kwitadrekä jire jabiti. Yekäre, nikwe oradre käre aune ja tötikadre käre Kukwe Ngöbökwe yebätä (Rom. 12:11, 12; 1 Tim. 4:13, 15, 16). Mä niena sribire ni umbrere konkrekasionte o sribire köbö täte, akwa jondron ütiäte ye kwrere tä nikwe ye käkwe ni dimikadre ja töi mike bobre aune tö ngwen Ngöböi. Ye medenbätä, jondron ütiäte tä nikwe ye nita mike ütiäte jai aune nita ja dimikamana Jehovai ngwane nita kriemike.

Sribi keta kabre nämäne Timoteo kötärä, ye ngätäite rabadre nitre mada tötike. Ye medenbätä, Pablokwe niebare ie: “Makwe ti kukwei nuani, ye abko nire nire bti tödekadre amne rabadre Ngöbö kukwei dirire kuin, raba tuen mae, ye ie makwe kukwe ye dirita, niaratre käkwe diridreta ni mda mdaye ja täritäri abkokäre” (2 Tim. 2:2). Dre dre namani gare Timoteo ie ye driedre kwe nitre madai Pablokwe ngwaninta törö ie. Kä nengwane, nitre ji ngwanka konkrekasionte rabadre ja di ngwen ye erere nuainne ye ütiäte krubäte. Ni ji ngwanka kwin ie kukwe meden gare ye ñaka tä üke ja aibe kräke, ñakare aune, sribi meden nuain gare kwin ie ye tä driere nitre madai arato. Nitre madai kukwe gare bäri niara kräke o sribi nuaindre bäri kwin niara kräke yebätä bä rabadre nemen ngwarbe ye jürä ñakabätä. Aisete sribi nuaindre ño yebätä ñaka kukwe kiakia aibe mike gare. Nitre mada tötikata kwe yekwe töbikadre kwin ja käne, kukwe ño ye mikadre gare nguseta kwe jai aune rabadre ünä kukwe ja üairebiti ye ie tö. Ye köböire, nitre ja ngwanka metre ye raba sribire krubäte konkrekasionte.

Erametre, Pablokwe kukwe tikani Timoteo ie ye namani ütiäte krubäte kräke. Ja ketamuko kwe käkwe mäträbarebätä yebätä ñäkäbare kwe bati bobu aune rabadre mike ño täte yebätä nämäne töbiketari ye ni raba bämike ja töite, ¿ñan ererea?

Kukwe ütiäte niebare ye ni tö mikabätä täte arato. ¿Ni raba nuainne ño? Sribi biani nie ye ni tö okwä bukakabätä jankunu, jondron ütiäte ni tö kriemikabätä aune kukwe gare nie ye ni tö driebätä ni jökrä ie. Nikwe ye erere nuaindi ngwane, Pablokwe niebare Timoteo ie ye erere, sribi mikani ni kisete ye nikwe nuaindi täte (2 Tim. 4:5).