ANO ang mabatyagan mo kon makabaton ka sang makapalig-on nga sulat halin sa imo suod nga abyan? Nakabaton sang makapalig-on nga sulat ang disipulo nga si Timoteo halin kay apostol Pablo. Ini nga sulat amo subong ang 2 Timoteo sa Biblia. Sigurado gid nga nangita dayon si Timoteo sang malinong nga lugar para basahon ang sulat sang iya pinalangga nga abyan. Mahimo ginhunahuna ni Timoteo: ‘Kamusta na ayhan si Pablo? Ano ayhan ang mga laygay niya sa akon para mabuligan ako sa akon asaynment? Ano ayhan ang iya mga laygay para mangin epektibo pa gid ako sa akon pagministeryo kag pagbulig sa iban?’ Nabasa ni Timoteo sa sining importante nga sulat ang mga sabat sa sini nga mga pamangkot. Kag magluwas sa sini, madamo pa gid sing laygay ini nga sulat. Binagbinagon naton ang pila ka laygay nga makabulig gid sa aton.

Sa umpisa pa lang sang sulat, nabatyagan dayon ni Timoteo nga palangga gid sia ni Pablo kay gintawag niya sia nga “hinigugma nga anak.” (2 Tim. 1:2) Nabaton ni Timoteo ini nga sulat sang mga 65 C.E. Mahimo sobra 30 anyos na sia sadto, kag madugay na sia nga gulang. Nakaupod niya si Pablo sing sobra napulo ka tuig kag madamo sia sing natun-an.

Mahimo nga napalig-on gid si Timoteo sang nabal-an niya nga matutom nga ginabatas ni Pablo ang mga kabudlayan. Napriso si Pablo sa Roma, kag mahimo malapit na sia patyon. (2 Tim. 1:15, 16; 4:6-8) Mabatyagan ni Timoteo ang kaisog ni Pablo sang nagsiling sia: “Padayon ako nga nagabatas.” (2 Tim. 2:8-13) Pareho kay Timoteo, mapalig-on man kita sang tumalagsahon nga pagbatas ni Pablo.

Ginpalig-on ni Pablo si Timoteo nga dapat gid niya pabaloran ang iya asaynment sa pag-alagad sa Dios. Gusto ni Pablo nga ‘padabdabon ni Timoteo kaangay sang kalayo ang dulot sang Dios’ nga nabaton niya. (2 Tim. 1:6) Ang Griego nga tinaga nga gin-translate nga “dulot” amo ang khaʹri·sma. Ini nga tinaga nagapatuhoy sa dulot nga wala sing bayad, ukon sa regalo nga ginhatag bisan pa wala ini ginpangabudlayan sang nakabaton. Nabaton ni Timoteo ini nga dulot sang ginpili sia nga mag-alagad sa kongregasyon sa pinasahi nga paagi.—1 Tim. 4:14.

 Ano ang himuon ni Timoteo sa sini nga dulot? Sang mabasa niya ang mga tinaga nga “padabdabon mo kaangay sang kalayo,” mahimo nahunahuna niya ang kalayo nga ginagamit sang mga tawo sa mga hilikuton nila sa ila balay. Kon kaisa, baga na lang ang mabilin sa sini nga kalayo, gani dapat ini padabdabon liwat. Ang isa ka diksionaryo nagsiling nga ang Griego nga tinaga (a·na·zo·py·reʹo) nga gingamit ni Pablo nagakahulugan sing “padabdabon ang kalayo” ukon “kuyaban ang baga para magkalayo.” Ginapahangop sini nga dapat mangin mapisan ang isa sa paghimo sang iya hilikuton. Gani, daw pareho lang nga ginalaygayan ni Pablo si Timoteo: ‘Himua ang imo asaynment sa bug-os mo nga masarangan!’ Dapat man naton iaplikar ini nga laygay paagi sa paghimo sang aton bug-os nga masarangan sa aton pag-alagad.

Sa sulat ni Pablo, may ginsiling pa gid sia nga makabulig sa pagministeryo ni Timoteo. Nagsiling sia: “Bantayi ining maayo nga butang nga ginsalig sa imo paagi sa balaan nga espiritu nga yara sa aton.” (2 Tim. 1:14) Ano ining maayo nga butang nga ginsalig kay Timoteo? Antes sini nga bersikulo, ginsambit ni Pablo ang “maayo nga mga pulong,” ukon ang kamatuoran nga mabasa sa Kasulatan. (2 Tim. 1:13) Isa ka ministro si Timoteo, gani dapat niya itudlo ang kamatuoran sa mga kauturan sa kongregasyon kag sa mga tawo sa iya teritoryo. (2 Tim. 4:1-5) Gintangdo man si Timoteo bilang isa ka gulang para bantayan ang panong sang Dios. (1 Ped. 5:2) Mabantayan ni Timoteo ang maayo nga butang nga ginsalig sa iya, ukon ang kamatuoran nga dapat niya itudlo, paagi sa pagpagiya sa balaan nga espiritu ni Jehova kag sa Iya Pulong.—2 Tim. 3:14-17.

Subong, ginhatagan man kita sang kamatuoran nga dapat naton itudlo sa iban. (Mat. 28:19, 20) Indi gid naton dapat pagkalimtan kon daw ano kaimportante ini nga kamatuoran, gani dapat kita pirme mangamuyo kag regular nga magtuon sang Pulong sang Dios. (Roma 12:11, 12; 1 Tim. 4:13, 15, 16) Kon may iban pa nga asaynment nga ginhatag sa aton pareho sang pag-alagad bilang isa ka gulang ukon bug-os tion nga ministro, dapat kita mangin mapainubuson kag magsalig sa Dios. Gani ginabantayan naton ukon ginaamligan ang ginhatag sa aton kon ginapabaloran naton ini kag kon nagapabulig kita kay Jehova.

Nalakip sa asaynment ni Timoteo ang paghanas sa iban nga himuon man ang iya hilikuton. Gani ginpalig-on ni Pablo si Timoteo: “Itugyan ang mga butang nga nabatian mo sa akon . . . sa matutom nga mga lalaki agod mangin kalipikado gid sila nga itudlo ini sa iban.” (2 Tim. 2:2) Ginpahanumdom ni Pablo si Timoteo nga dapat niya itudlo sa mga utod nga lalaki ang tanan nga natun-an niya. Importante gid nga himuon man ini sang mga manugtatap sang kongregasyon subong. Ginasugid sang maayo nga manugtatap sa iya mga ginahanas ang tanan nga nabal-an niya parte sa isa ka hilikuton. Ginahimo niya ini para mahimo nila sing maayo ang ila asaynment. Wala sia nabalaka nga basi maabot ang tion nga mas madamo pa ang mabal-an nila sangsa iya ukon mangin mas sagad pa sila sa iya. Gani, dapat itudlo sang manugtatap sa iya mga ginahanas ang tanan nga dapat mabal-an nila parte sa isa ka hilikuton. Dapat niya sila buligan nga gamiton ang ila kaalam kag paghangop para maghamtong sila sa espirituwal. Paagi sa sini, makabulig gid sa kongregasyon ang “matutom nga mga lalaki” nga iya ginhanas.

Sigurado gid nga ginpabaloran ni Timoteo ang makapalig-on nga sulat ni Pablo. Mahimo nga sulitsulit niya nga ginabasa ang mga laygay sa iya kag ginapamalandungan niya kon paano niya ini maaplikar sa iya asaynment.

Dapat man naton iaplikar ini nga mga laygay. Paano? Dapat kita manikasog nga padabdabon kaangay sang kalayo ang dulot nga nabaton naton, dapat naton bantayan ang asaynment nga ginhatag sa aton, kag dapat naton itudlo sa iban ang tanan naton nga nabal-an. Kon himuon naton ini, ‘matuman man naton sing bug-os ang aton ministeryo,’ pareho sa ginsiling ni Pablo kay Timoteo.—2 Tim. 4:5.