WII xpiirst tuu tich wëns tuu een ufmuutich priif fon eene kuute froynt kriist? Te kristlich tisipel Timoteus hot soo een sort priif fom aphostel Phaul kriit; hayt, is tiise priif pekhant wii tas piiplix puuch fon 2 Timóteo. Sicher, Timoteus khont net waarte fer een ruych plats fine fer se leese was sayn liipe froynt wolt tëm saan. Fiilaycht waar Timoteus am tenke: ‘Wii is te Phaul traan? Hot eyer een aanreet fer mich in mayn flichte helfe? Khan tiise priif mich helfe peser preetiche un in lërne, un anere helfe?’ Wii mer noch siin tuun, Timoteus hot ti antworte fer tiise frooche un noch fiil mee in tiise kiltiche priif kefun. Awer yets, wole mer uns traan hale aan welche kuute aanreete woo in tiise priif xteen.

Wën Timoteus hot aan kefang ti eyerste wërter fon tiise priif leese, khont eyer klaych mërke tas Phaul hot sich wërklich mit tëm kekhimert. Phaul tuut tëm liiplich ruufe wii “mayn keliipte khint”. (2 Tim. 1:2) Timoteus hot tiise priif unkefeer im yoerkang 65 kriit. Tee hat, tsiimlich sicher, mee wii 30 yoore un waar xon een elteste mit fiil speryens. Eyer hat xon mit Phaul fer mee wii 10 yoore kexaft un hat fiil kelërnt.

Kewis, Timoteus hot sich ufkemuut kexpiirt wën eyer tsu wise kriit hot tas Phaul waar ti xwiirichkheete am troy aus hale. Phaul waar in Roma inkexpërt, un teet klaych um keprung wëre. (2 Tim. 1:15, 16; 4:6-8) Timoteus khont mërke wii Phaul koraajich waar weeche tëm sayn wërter: “Ich tuun wayter ales aus hale.” (2 Tim. 2:8-13) Soo wii Timoteus, Phaul sayn wunerlich payxpiil fon persewerans khan uns ferxtërke.

Phaul hot Timoteus uf kemuut fer sayn flichte in Kot sayn tiinst aan siin wii etwas woo fiil weyert hat. Phaul wolt tas Timoteus ‘uf hetse teet wii een fayer, tas kexenk fon Kot woo eyer kriit hat’. (2 Tim. 1:6) Phaul hot tas wort khaʹri·sma fer “kexenk” penutst. Tiise kreekix wort hot hauptseechlich se tuun mit een unfertiint kexenk, woo ma kriit oone se petsaale. Timoteus hot tiise kexenk kriit wii eyer raus kesuucht waar fer ti kemaynt in een ekstra aat tiine. (1 Tim. 4:14)

 Was solt Timoteus mit tiise kexenk mache? Wii eyer ti wërter keleest hot ‘wii een fayer uf hetse’, fiilaycht hot eyer ketenkt aan tëm fayer woo ti layt tehëm kemacht hon, woo khent als mool ploos roote khoole wëre. Tiise khoole praychte uf kehetst wëre fer noch mool flame kriin un noch mee hits mache. Een wërter puuch saat tas tas kreekix wërp (a·na·zo·py·reʹo) woo Phaul penutst hot, petayt: “noch mool aan mache, noch mool xtark lose, luft ploose fer ti flame aan mache”; in anere wërter, es wil saan: “uf rechne fer een nay aarwayt mache.” In woerheet, waar Phaul Timoteus am saan: ‘Xaf mit kans hërts in tayn flicht!’ Hayt, prauche mer tas selwiche mache — flaysich aan Yeehoowa sayn tiinst xafe.

In sayn priif, Phaul hot noch etwas kesaat woo teet sayn liipe froynt Timoteus helfe sayn tiinst kuut mache. Tee hot kexrip: “Torich te hayliche kayst woo in uns woont, xits te xats woo tich fertraut waar.” (2 Tim. 1:14) Was waar te xats woo fer Timoteus fertraut waar? Een wersikel eente, Phaul hot kexproch iwer ti “nutsliche wërter” — ti woerheet woo in te Xrifte xteet. (2 Tim. 1:13) Als een kristliche tiiner, Timoteus solt ti woerheet in un aus ti kemaynt preetiche. (2 Tim. 4:1-5) Un aach, Timoteus waar wii een elteste in kesetst fer Kot sayn trop uf phase. (1 Ped. 5:2) Fer sayn xats xitse — ti woerheet woo eyer in lërne praucht —, solt Timoteus uf Yeehoowa sayn hayliche kayst un sayn Wort traue. (2 Tim. 3:14-17).

Hayt, waare mer aach mit te woerheet fertraut woo mer fer ti anere in lërne. (Mat. 28:19, 20) Wën mer wayter peete un Kot sayn Wort reeklich xtutiire, tuun mer wayter weyert xetse fer tiise wunerliche xats. (Rom. 12:11, 12; 1 Tim. 4:13, 15, 16) Im xtant, hon mer aach ti flicht fer wii elteste in te kemaynt tiine orer fer in te fol tsayt tiinst xafe. Soo een kiltich xats sol uns teemuutich lose un mache tas mer aan Kot traue fer tëm sayn hilef kriin. Soo, mer khene unser xats xitse wën mer tëm weyert kepe un uf Yeehoowa sayn hilef traue fer tëm uf phase.

Ti flichte woo Timoteus kriit hot, hate net ploos mit tëm se tuun: anere waare aach tepay. Tes weeche hot Phaul Timoteus aan kereet: “Fertrau tsu troye mëner ti tinge woos tuu host fon mich keheert . . . , soo wëre se aach inkeiipt fer ti anere in lërne.” (2 Tim. 2:2) Phaul hot Timoteus erinert tas eyer selt, ales was eyer kelërnt hat, fer ti anere priiter in lërne. Es is wichtich hayt, tas yeete superintentent in te kemaynt sich miie tuut fer tas selwiche mache. Eene kuute superintentent ferxtekelt net was eyer iwer een flicht wees. Xtats tas, lërnt eyer ti anere in tas se khene aach ti aarwayt mache. Tee hot net pang tas ti anere tuun mee wii tëm wise orer ti aarwayt peser wii tëm selepst mache. Tes weeche, te superintentent tuut net ploos aus leye wii ti aarwayt mache. Tee wil aach tas, tii woo eyer am iipe is, ferninftichkheet un ferxtëntnis kriin — es wil saan, rayfe kriste wëre. Soo, ti “troye mëner” woo eyer keiipt hot, tuun een noch kreeser hilef fer ti kemaynt sin.

Sicher, Timoteus hot iwer kërn kehat te liiplich priif woo eyer fon Phaul kriit hot. Meyer kriin uns laycht foer xtele Timoteus noo un noo tiise nutsliche aanreete am leese, un am traan tenke iwer was weyer ti pest aat fer tëne in sayn flichte aan wëne.

Meyer wole aach tiise aanreete aan wëne. Wii? Meyer khene uns miie fer unser kexenk wii een fayer uf hetse, unser xats xitse, un ti anere in lërne ales was mer wise. In tiise aat, soo wii Phaul Timoteus kesaat hot, khene mer unser “tiinst aarwayt kuut mache”. (2 Tim. 4:5)