HAPO tji ku ṱuna vi indu tji wa munu orutuu oruyanḓiparise okuza kepanga roye roposengo? Omuhongewa wa Kristus, Timoteus, wa muna orutuu otjingero okuza komuapostele Paulus. Orutuu ndwi ru ri mOmbeibela, nu ru tjiukwa otja Orutuu orutjavari rwa Paulus ku Timoteus. Timoteus tjiri aa zeri okupaha oruveze pu pe hi norurokoho kokutja ma lese imbi epanga re nde mu suvera mbye mu tjangere. Mape ya Timoteus ee ripura kutja, ‘Hapo Paulus uri mongaro iṋe? Hapo u nondunge kaaṋi ndji me ndji pe, ndji mai ndji vatere moviungura mbi mbi ungura mombongo? Hapo orutuu ndwi maru ndji vatere kutja mbi rire omuhonge omuwa nokuyenena okuvatera varwe?’ Otja tji matu katara, matu kamuna kutja tjiri Timoteus wa muna omaziriro komapuriro ngo okuza morutuu orunanḓengu ndwo. Nungwari, nambano ngatu tare komapu tjiva omananḓengu ngu matu yenene okumuna morutuu ndwo.

Indu Timoteus tja uta okulesa orutuu ndwo pomautiro, eye tjiri wa muna kutja Paulus u rikendera ye. Nu Paulus we mu isana kutja, “omuatje wandje omusuverwa.” (2 Tim. 1:2) Mape ya kutja Timoteus wa karera otjomunene wombongo oure woruveze orure nu wa ri nozombura zokombanda 30, indu tja muna orutuu ndwo mombura ndji ape 65 O.Z. Eye wa kara oure wozombura zokombanda omurongo puna Paulus, nu we rihonga ovingi okuza ku ye.

Timoteus tjiri wa yanḓiparisiwa tjinene okutjiwa kutja Paulus aa tuurunga omauzeu nomuretima. Paulus wa ri motjovakamburwa moRoma, nu aa sokuzepewa. (2 Tim. 1:15, 16; 4:6-8) Timoteus aa munu ouvanḓe wa Paulus, mena rokutja Paulus wa tja: ‘Ami opu me zu okutjinda oviṋa avihe.’ (2 Tim. 2:8-13) Tjimuna Timoteus, eṱe wina matu yenene okuyanḓiparisiwa i omuano Paulus ma raisa onḓaro orure.

Paulus wa tunduuza Timoteus okuvara otjiungura Mukuru tje mu pa otjotjiṋa otjinanḓengu tjinene. Paulus wa tunduuza Timoteus kutja ma “yakisire ko” otjiyandjewa tja pewa i Ndjambi. (2 Tim. 1:6) Paulus wa ungurisa embo ndi khaʹri·sma nda torokwa kutja “otjiyandjewa.” Embo rOtjingrike ndo ri heya otjiyandjewa tji tji yandjewa nokuhinotjisuta poo otjiyandjewa tji tji yandjewa otjari. Timoteus wa pewa otjiyandjewa ho indu tja pewa otjiungura tjapeke tjokukarera mombongo.—1 Tim. 4:14.

 Hapo Timoteus aa sokutjita vi notjiyandjewa ho? Otja tjaa lese omambo nga, “u tji yakisire ko,” eye mape ya ee ripura nomuriro mbu yaka ponganda nu povikando tjiva mbu zema au rire omakara omapyu. Omakara ngo ye hepa okururumisiwa kutja ye yake. Embo rimwe romambo ra tja, embo rOtjingrike ndi (a·na·zo·py·reʹo), Paulus nda ungurisa ri heya okukara nondjoroka nokuungura oukukutu motjiungura kaaṋi. Kunao, Paulus wa raera Timoteus kutja, ‘Ungura oukukutu motjiungura tjoye.’ Ndino, eṱe wina matu sokuungura oukukutu motjiungura tjetu.

Indu tjaa lese orutuu okuza kepanga re, Timoteus wina wa muna otjiṋa tjarwe tji tja yenena okumuvatera motjiungura tjokuzuvarisa. Paulus wa tja: “Ṱakamisa oviṋa oviwa mbi mbi wa pewa. Vi ṱakamisa momasa wOmbepo Ondjapuke ndja tura mu eṱe.” (2 Tim. 1:14) Hapo ovikwaye mbyaa sokuṱakamisa? Otjiungura tjiṋe Timoteus tja pewa? Mezeva ndi 13, Paulus wa hungira ohunga ‘nomambo wouatjiri’ nge ri mOmatjangwa. (2 Tim. 1:13) Otjomuzuvarise, Timoteus aa sokuhonga ouatjiri mbo mombongo nu wina okuzuvarisa kovandu momaturiro we. (2 Tim. 4:1-5) Nu eye wina wa zikirwe otjomunene wombongo okurisa orupanda rwa Mukuru. (1 Petr. 5:2) Timoteus aa sokuṱakamisa ouatjiri mbwa hongwa, mokuṱaṱera kombepo ya Jehova ondjapuke nEmbo re.—2 Tim. 3:14-17.

Ndino, eṱe wina twa pewa ouatjiri mbu tu honga kovandu varwe. (Mat. 28:19, 20) Eṱe matu yenene okuraisa ondangi yetu kouatjiri ounanḓengu mbu twa pewa mbwi, mokupanḓera pokukumba nokukonḓonona Embo ra Mukuru aruhe. (Rom. 12:11, 12; 1 Tim. 4:13, 15, 16) Eṱe mape ya atu kara nomerizirira warwe tjimuna okukarera otjomunene wombongo poo okukara motjiungura tjokuzuvarisa aruhe. Oviṋa otja imbyo vi sokutjita kutja tu rire overisusuparise nokuṱaṱera ku Mukuru aruhe. Kunao matu sokuṱakamisa poo okutjevera otjiungura otjinanḓengu ho, mokuriyameka ku Jehova kutja me tu vatere okutjiyenenisa.

Otjiungura Timoteus tja pewa aa sokuhonga kovandu varwe. Kunao, Paulus wa raera Timoteus kutja, “Inga omahongero ngu wa zuvire ame zuvarisa . . . , ye yandja kovandu ovaṱakame mbu mave yenene okuhonga ovakwao wina.” (2 Tim. 2:2) Paulus wa zemburukisa Timoteus okuhonga varwe oviṋa avihe eye mbye rihonga. Otjiṋa otjinanḓengu komunene auhe wombongo okutjita nao. Omunene wombongo omusemba ka kondjo okuṱizira oviṋa mbya hongwa ku ye omuini. Nungwari, eye u honga varwe kokutja owo wina ve yenene okuungura otjiungura ho. Eye katira kutja owo mape ya ave tjiwa ovingi poo ave ungura otjiungura ho nawa pu ye. Kunao, eye kahongo oviṋa tjiva uriri. Nu u vanga kutja imba mbu ma hongo ve kare nondjiviro onyingi. Momuano mbo ‘ovandu ovaṱakame’ mba hongo mave yenene okurira ombatero kombongo.

Oukahu kutja Timoteus wa ri nondangi korutuu ndwa muna okuza ku Paulus. Eṱe matu yenene okumuna omuano maa yarukire po okulesa omambo ngo, nokuripura kutja omomuano uṋe mu ma yenene okuyeṱakamisa motjiungura tje.

Eṱe wina matu vanga okuṱakamisa eronga ndo. Omomuano uṋe? Eṱe matu yenene okuungura oukukutu okuyakisira ko otjiyandjewa tji twa pewa, okuṱakamisa oviṋa oviwa mbi twa pewa nokuhonga varwe oviṋa avihe mbi matu tjiwa. Nu indu tji twa tjiti nao, tjimuna Paulus tja hungira ku Timoteus, eṱe matu ‘yenenisa oviungura vyetu avihe.’—2 Tim. 4:5