ANNI i matageno mu nu sinurakkan naka na madukko nga kofummu? Nakalawa tu makapagaram nga tura si Timoteo ta kofunna nga si apostol Pablo. Nelagum ngana sangawe yatun nga tura ta libru ira na Biblia anna magalan tu 2 Timoteo. Magga insigida nga binibbig yatun ni Timoteo tapenu mammuanna nu anni i kayà nga ikagi nisa na meddu nga kofunna. Baka nononopan ni Timoteo: ‘Kumusta ngana tamma si Pablo? Egga kari i metabaranna nio tapenu makuà tu mapia i annungakku ira? Moffunannà kari naw nga tura tapenu metuppal ku i ministeriò anna moffunakku i tanakuan?’ Natabbag danatun nga pakkiavu ni Timoteo taw nga importante nga tura anna aru paga i nagigiammuna tatun. Ngem ammuattam labbi i karuan nga makoffun nga tabarang nga mabibbig taw nga tura.

Turi ta bibbigan ngana ni Timoteo i tura ni Pablo, matagenona nga kurug nga ikavurungan yayya ni Pablo. Inagalan paga yayya ni Pablo tu ‘iddeddukakku nga ana.’ (2 Tim. 1:2) Posible nga 30 anios ngana si Timoteo turi ta nalawana yatun nga tura ta 65 C.E. Ekspiriensadu ngana gapa yayya nga elder tatun nga tiempo. Maturu tu mafulu ragun ira nga nakkavulu ni Pablo anna aru i nagigiammuna nisa.

Siguradu nga napagaram si Timoteo turi ta nammuanna nga attattamman ni Pablo i ziga-riga anna matalo lagapa yayya. Agga-fuku gare si Pablo ta Roma anna aranni ngana yayya matay. (2 Tim. 1:15, 16; 4:6-8) Manonono ni Timoteo nu kunnasi kagutu si Pablo turi ta kinagina yaw ta turana: “Attammak-ku ngamin i adde na.” (2 Tim. 2:8-13) Kagitta ni Timoteo, mapasikan ittam gapa na ehemplo ni Pablo ta pagattattam.

Pinagaram ni Pablo si Timoteo nga kuruga tagibaloran i annunganna nga passerbian i Dios. Ikaya ni Pablo nga ‘talakkurugan nga kuan ni Timoteo i annungan nga niyawa na Dios tannisa.’ (2 Tim. 1:6) Ta orihinal nga niketura na “niyawa na Dios,” inusa ni Pablo i Griego nga uvovug nga khaʹri·sma nga i kebalinanna “regalu.” Tumukoy yatun nga Griego nga uvovug ta regalu nga awan tu pagana anna ari nakuan mepangngo nga alawatan na tadday nga tolay. Inalawa ni Timoteo i kunnatun nga regalu turi ta napili yayya para ta nerumu-ruma nga klase na passerbi ta kongregasion.​—1 Tim. 4:14.

Kunnasi nga usan ni Timoteo yatun nga regalu? Kinagi ni Pablo nisa nga ‘talakkuruganna nga kuan i annunganna.’ Niyusana i Griego nga uvovug  nga a·na·zo·py·reʹo nga kebalinanna “paggangatan nga kunna afi.” Turi ta bibbibbigan yatun ni Timoteo, awayyana tu nanonona i afi nga pappapatuan na totolay ta baleda nga baka mabbalin ngana laman tu baggang. Mawag nga madukkal yatun tapenu gumanga anna mas mappatu. Segun ta tadday nga diksionariu, i kebalinan natun nga Griego nga uvovug ay “pallanzogan, paggatangngan, anna sopan tapenu magafi.” Tumukoy gafu yatun ta matalikarag nga pangngua ta tadday nga trabahu. Fustu gafu yaw nga tabarang ni Pablo kani Timoteo: “Talakkurugam-mu nga kuan i annungam-mu.” Kunnatun nakuan gapa i kuattam​—mattalikarag ittam ta passerbi.

Ta tura ni Pablo kani Timoteo, egga paga i kinagina nga makoffun kani Timoteo tapenu metuppalna tu mapia i ministeriona. Nitura ni Pablo: “Ta pakapangngua na Espiritu Santo nga egga nittam, tangngallam-mu ta mapia ngamin i nepammakatalo nikaw.” (2 Tim. 1:14) Anni yatun nga tangngallanna tu mapia? Anni i nepammakatalo kani Timoteo? Ta nappollu nga versikulo, tinukoy ni Pablo i ‘kinakurug ira’ nga nitudduna kani Timoteo nga maggafu ta Katurakan. (2 Tim. 1:13) Bilang tadday nga Cristiano nga ministro, mawag tu ituddu ni Timoteo i kinakurug ta wawwaragi ta kongregasion anna ilayyagayyana yatun ta totolay ira. (2 Tim. 4:1-5) Natunno gapa si Timoteo bilang tadday nga elder nga mappastor ta karneru ira na Dios. (1 Ped. 5:2) Kunnasi nga matangngallan tu mapia ni Timoteo i kinakurug nga mawag tu itudduna? Gukaban na pammakatalo ta masanto nga espiritu ni Jehova anna ta Uvovugna.​—2 Tim. 3:14-17.

Nepammakatalo gapa nittam i kinakurug nga mawag tu ituddu tam ta tanakuan. (Mat. 28:19, 20) Mepasingattam nga kanayuttam nga tagibaloran yaw nga kinakurug nu regular ittam nga makimallo anna nu malallappo ittam ta paggigiammu ta Uvovug na Dios. (Roma 12:11, 12; 1 Tim. 4:13, 15, 16) Awayyana gapa nga egga i neyammung nga annungattam gitta na nu natunno ittam bilang elder onu massesserbi ittam ta ngamin-tiempo. Nu nepammakatalo nittam i kunnatun, mappakalinno ittam nakuan anna mattalo ittam ta panguffun na Dios. Yayya nga matangngallattam gafu tu mapia i nepammakatalo nittam gukaban na pattagibalor tatun anna pammakatalo ta uffun ni Jehova.

Kasali ta annungan ni Timoteo i passanay ta tanakuan tapenu makuada gapa i trabahu nga kukukuanna. Yayya nga nipagaram ni Pablo tannisa: “I naginnam ira nga nituttuddù . . . ay ituddum ta totolay ira nga pammakatalakkan tapenu awayya da gapa nga ituddu ta karuan.” (2 Tim. 2:2) Niperaddam ni Pablo kani Timoteo nga itudduna nakuan i ngamin nga nagigiammuna ta tanakuan nga Cristiano nga lallaki. Mawag tu kunnatun gapa i kuan na elder ira ta kongregasion. Ariadda nakuan iyetu i ammuda ta tadday nga trabahu. Itudduda nakuan yatun ta tanakuan tapenu magigiammu gapa na tanakuan nga kuan yatun nga trabahu. Ariadda nakuan nonopan nga baka mas aru ngana sangaw i ammu na tuttudduadda onu mas malalaki ngana sangaw yayya. Ari laman gafu nga ituddu na elder ira nu kunnasi nga kuan i tadday nga gannug. Uffunadda gapa nakuan i tuttudduadda nga mapeggan tu pakalippawa anna sirib. Makoffun yatun tapenu malladda i espiritualidad danuri tuttudduadda. Nu kunnatun i kuan na elder ira, mas aru i meyuffun ta kongregasion danuri na sinanayda.

Kuruga tagibaloran ni Timoteo i tura nga nalawana kani Pablo. Maimajittam yayya nga kanayunna nga bibbibbigan i tabarang tatun nga tura tapus pannonopanna nu kunnasina nga meyaplika yatun ta annunganna ira.

Kunnasi tam gapa meyaplika yatun nga tabarang? Talakkurugattam nakuan i annungattam, tangngallattam tu mapia i nepammakatalo nittam, anna ituddu tam ta tanakuan i ngamin nga ammu tam. Nu kuattam danatun, maparigattam i nakagi ni Pablo kani Timoteo nga ‘kuattam i ngamin nga annungattam kunna tadday nga doroban na Dios.’—2 Tim. 4:5.