ƐGƐNYÁ nɛ ɔtu gē ya uwɔ lɛ, eko duuma nɛ a miyɛ uleta ō ta ɔtu kwu ɔtu ŋma ɛgiyi ɛnɛɛnɛ oklobia ku uwɔ a? Utimoti nōo wɛ éyi ku Āce O Yɛce Ukraist a miyɛ ɛdɔ uleta ō ta ɔtu kwu ɔtu ɛgɛnyā ŋma ɛgiyi Upɔlu nōo wɛ ɔcocɛhɔ a. Uleta nyā kē wɛ ɔkpá ku 2 Utímōti babanya a. Ó lɛ afuu ŋ, Utimoti lɛ ɔtu caca ō dɔka ɛga nɛ uya i yɔ ŋ, o ya ɛɛ ka ó lɔfu jé ɔdā nɛ ɛnɛɛnɛ oklobia ku nu lɛ ō ka a. A jé ŋ, Utimoti yɔ i gbɛla: ‘Abɔɔ Upɔlu yɔ lɛ? Ó lɛ ukɔ́ duuma nɛ ó gē ta um, nōo géē ta um abɔ ipu uklɔ nɛ um gē ya ipu ɛ̄gbā ō gba ku Ujehofa a? Ukɔ́ ku nu lɔfu ta um abɔ, o ya ɛɛ ku um tɔɔna klla nwu ɛlā lɔhi fiyɛ mla ō ta ācɛ ɔhá abɔ?’ Ɛgɛ nɛ alɔ gáā nwu a, Utimoti lɛ ohi ku aɔka nyā fiyɛ ŋma ipu ɛnɛɛnɛ uleta nyā. Ipu ikpɛyi ɛlā nyā, alɔ géē kɛla lɛyikwu aukɔ́ ōhī nōo géē ta alɔ abɔ nōo yɔ ipu uleta nyā a.

Eko nɛ Utimoti gbɔɔ ō jé ō gbɔɔ ŋma ajɛ ku uleta a, ó gáā le má boobu ku Upɔlu lɛ ɛlá wu nɛhi. Ipu ɔwɛ ō ta ɔtu kwu ɔtu, Upɔlu hi ɔ ka “ɔyí um nōo he um ɔtū.” (2 Utím. 1:2) Utimoti miyɛ uleta nyā ihayi bɛɛka 65 C.E. a. A jé ŋ, Utimoti lɔfu le fiyɛ ihayi ofu ce igwo ɛ, ó kē kwu piya ɔnyakwɔcɛ ku ujɔ nōo le jikoko ɛ. Ó humayi yuklɔ tɔha mla Upɔlu fiyɛ ihayi igwo ɛ, ó kē lɛ aɔdā alɛwa nwu duu ɛ.

Ó lɛ afuu ŋ, Utimoti lɛ ɔtu kwu ɔtu nɛhi ō jé ka Upɔlu hayi kpaakpa yɔ i lɔtu ku unwalu ɛyɛɛyɛyi. Upɔlu yɔ inu agba ipu éwo ku Urom, ó kē gáā gboji ŋ, é géē je ɔ ŋmo. (2 Utím. 1:15, 16; 4:6-8) Utimoti má ku Upɔlu lɛ ɔtu lɛ ohigbu ka ó kahinii: “N gē lɔtūlé lɔhi ipú ōwē dóódu.” (2 Utím. 2:8-13) Bɛɛka Utimoti a, ɔtu nɛ Upɔlu lé a lɛ ɔfu ta alɔ iyē gla.

Upɔlu ta Utimoti ɔtu kwu ɔtu ka ó leyi má uklɔ nɛ ó lɛ ō ya ipu ɛ̄gbā ō gba ku Ɔwɔico a, ku ɔdā nōo cɛgbá nɛhi. Upɔlu dɔka ku Utimoti kóō “bī ɛhi kú alelékwū ihɔ” nōo ya anu iyē a. (2 Utím. 1:6) Upɔlu bi ɛlā ku Ugriisi néē hi ku khaʹri·sma a le yuklɔ kwɛyi “ɛhi.” Ɛyi ɛlā ku Ugriiisi ɔɔma yɔ i kɛla lɛyikwu ɛhi nɛ ɔcɛ i cika nu ŋ, amāŋ odee nɛ ɔcɛ i cika ō miyɛ ŋ. Utimoti miyɛ ɛhi nyā eko néē fu ɔ kóō yuklɔ ipu ujɔ ɔwɛ ɛyɛɛyi a.—1 Utím. 4:14.

Ɔdi nɛ Upɔlu yɔ i ta Utimoti ɔtu kwu kóō  ya mla ɛhi nyā a? Abɔɔ ó yɔ i jé ɛlā nōo kahinii: “Bī ɛhi kú alelékwū ihɔ” a, ó lɔfu gbɛla lɛyikwu ɔla nɛ ācɛ lɛ ɔlɛ uwa, nōo gē je piya ɔla nōo gē cɛ lɔfu lɔfu a. É cɛgbá ō ya ku ɔla nyā kōo yɔ i cɛ lɔfu lɔfu. Uditionary éyi ka ku ɛlā ku Ugriisi néē hi ku (a·na·zo·py·reʹo) nɛ Upɔlu bi le yuklɔ a, wɛ “ka ó lɛ eeye klla lɛ ɔtu caca lɛyikwu uklɔ ōhī.” Ohigbu ɛnyā, Upɔlu yɔ i da Utimoti kahinii: ‘Bi ɔtu caca le yuklɔ nɛ a lɛ ipu ɛ̄gbā ō gba ku Ujehofa a!’ Icɛ, alɔ cɛgbá ō ya lɛ a duu. Alɔ cika ō yuklɔ mla ɔtu caca ipu uklɔ nɛ alɔ lɛ ipu ɛ̄gbā ō gba ku Ujehofa a.

Ipu uleta ku nu a, Upɔlu ka ɔdā ɔhá kpɔ nōo géē ta Utimoti abɔ kóō ya lɔhi ipu uklɔ ku ɔna ō ta. Upɔlu kahinii: “Oŋmá lɛ ɔfú kú alelékwū Ihɔ, nōo lā ipú alɔ ā, lɛ aɔ́dā ocɛgba nɛ̄hi nɛ̄ ɔwɔicō kpó tū uwɔ abɔ̄ ā tū lɔɔlɔhi.” (2 Utím. 1:14) Ɔdi nōó wɛ? Ɔdā ocɛgbá nyá nɛ Utimoti lɛ a? Ipu ɔgba nōo yɔ gbɔbu lɛ ɛnyā, Upɔlu yɔ i kɛla lɛyikwu “ɔna kú ɛlā Ɔwɔicō,” nōo wɛ ɔkwɛyi nōo yɔ ipu Ubáyíbu a. (2 Utím. 1:13) Abɔɔ Utimoti wɛ Ɔcɛ O Yɛce Ukraist nōo gē tɔɔna a, ó cɛgbá ō nwu ayinɛ nōo yɔ ipu ujɔ ɛlā ɔkwɛyi a, mla ācɛ ɔhá nɛ ó gē tɔɔna lɛ uwa a. (2 Utím. 4:1-5) É klla lɛ Utimoti fu kóō wɛ ɔnyakwɔcɛ ku ujɔ nōo gē leyi kwu aala ku Ɔwɔico. (1 Upít. 5:2) Utimoti lɛ aɔdā ocɛgbá néē kpo tu ɔ abɔ a tu, ɛnyā kē wɛ ɛlā ɔkwɛyi nɛ ó gē nwu ācɛ a, ŋma lɛ ō gbolo ce Alelekwu Ihɔ ku Ujehofa mla ɛlā ku nu.—2 Utím. 3:14-17.

Icɛ, é kpo ɛlā ɔkwɛyi nɛ alɔ gē nwu ācɛ ɔhá a tu alɔ abɔ duu. (Umát. 28:19, 20) Alɔ i cika ō je mlanyi ɛgɛ nɛ ɛlā ɔkwɛyi nɛ alɔ gē nwu ācɛ a cɛgbá nɛhi lɛ a ŋ. Ohigbu ɛnyā, alɔ cika ō bēē gbɔɔkɔ mla oklɔcɛ ku ɛlā Ɔwɔico ɛ̄cī doodu. (Uróm 12:11, 12; 1 Utím. 4:13, 15, 16) Alɔ lɔfu lɛ uklɔ ɔhá ō wɛ ɔnyakwɔcɛ ku ujɔ amāŋ ɔcɛ ō tɔɔna ɛlā Ɔwɔico ojigogo. Ɛnɛɛnɛ uklɔ ɛgɔɔma cika ō cɛ lɛ alɔ tu iyi alɔ waajɛ, klla ya ku alɔ gbolo ce Ɔwɔico kóō ta alɔ abɔ. Ohigbu ɛnyā, alɔ lɔfu gbo ɔdā néē kpo tu alɔ abɔ, ŋma lɛ ō leyi má uklɔ a ka ó cɛgbá, mla ō gbolo ce Ujehofa kóō ta alɔ abɔ, o ya ɛɛ ku alɔ ya uklɔ a lɔɔlɔhi.

Uklɔ nɛ Utimoti miyɛ ō ya, lɛ ō ya mla nwu ācɛ ɔhá kéē ya ɛdɔ uklɔ nɛ ó gē ya a duu. Ɔɔma ya ɛɛ nɛ Upɔlu ta Utimoti ɔtu kwu ɔtu kahinii: “Lɛ abɔ̄ bī aɔ́dā nɛ̄ n nwū . . . lɛ aɔ́da ā kpó tū ācɛ ɔ̄kwɛ̄yi abɔ̄, ācɛ nēe géē nyɔ̄ gaá nwū ācɛ ɔhá dúú.” (2 Utím. 2:2) Upɔlu ta Utimoti ɛlá kwu ɔ, kóō nwu ayinɛ ɔhá nōo yɔ ipu ujɔ a ɛjɛɛji ɔdā nɛ ó nwu a. Ó cɛgbá ku ɛjɛɛji anyakwɔcɛ nōo yɔ ipu ujɔ icɛ a kéē ceyitikwu ya lɛ a duu. Ɔnyakwɔcɛ ku ujɔ olɔhi i gáā je ɔdā nōó jé lɛyikwu uklɔ ōhī a tayinu ŋ. Ikɔkɔ ɔɔma, ó gē nwu ācɛ ɔhá o ya ɛɛ kóō tɔɔtɛ lɛ uwa ō yuklɔ a. Ó gē yuufi ku uwa géē je uklɔ a amāŋ ya ɔ lɔhi fiyɛ ɛgɛ nɛ ó gē ya a ŋ. Ó lɛ a, ɔnyakwɔcɛ ku ujɔ a i gáā nwu ɔdā okpɔcii lɛyikwu uklɔ a foofunu ŋ. Ó dɔka ku ācɛ nɛ ó yɔ i nwu ɛlā kéē jé uklɔ a lɔhi, o ya ɛɛ kē kwu piya Ācɛ Yɛce Ukraist nōo jikoko. Ó bu ɔwɛ nyā, “ācɛ ɔ̄kwɛ̄yi” nɛ ó nwu ɛlā a géē lɔfu ta ujɔ a abɔ fiyɛ.

Ó lɛ afuu ŋ, uleta ō ta ɔtu kwu ɔtu nɛ Utimoti miyɛ ŋma ɛgiyi Upɔlu a jɛ ɔ eyī nɛhi. Ó lɔfu tɔɔtɛ lɛ alɔ ō gbɛla ka ó yɔ i je ɛnɛɛnɛ ukɔ́ nyā ŋma eko teeko, klla yɔ i gbɛla lɛyikwu ɛgɛ nɛ ó géē bi uwa yuklɔ ipu uklɔ nɛ ó gē ya ipu ɛ̄gbā ō gba ku Ujehofa a.

Alɔ dɔka ō bi ukɔ́ nyā le yuklɔ duu. Ɛgɛnyá a? Alɔ cika ō ceyitikwu lɔfu lɔfu, ku ɛhi ku Alelekwu Ihɔ nōo lɛbɛɛka ɔla a kóō yɔ i cɛ eko doodu, ō gbo aɔdā néē kpo tu alɔ abɔ, mla nwu ācɛ ɔhá ɛjɛɛji ɔdā nɛ alɔ jé a. Ó bu ɔwɛ nyā, bɛɛka ɔdā nɛ Upɔlu ka lɛ Utimoti a, alɔ lɔfu ‘yá ɛjɛ̄ɛ̄jī ɔdā nɛ alɔ cikā ó yá ā dúúdú abɔ̄ nɛ alɔ wɛ ācotɛ̄ɛhɔ̄ kú Ɔwɔicō ā.’—2 Utím. 4:5.