ẸVẸ o rẹ jọ owhẹ oma nọ ogbẹnyusu ọkpekpe ra o te kere emamọ ileta se owhẹ. Oghẹrẹ ileta itieye Pọl ukọ na o kere se Oleleikristi nọ a re se Timoti. Ileta yena a bi se obe 2 Timoti evaọ Ebaibol na. Ma riẹ nọ oke nọ ileta na i te Timoti obọ, ẹsejọhọ ọ gwọlọ omoria jọ nọ edo ọ rrọ họ nọ o re jo se ileta nọ ogbẹnyusu riẹ o kere sei na. O sae jọnọ Timoti ọ jẹ jọ udu riẹ roro nọ: ‘Kọ ẹvẹ eware e rrọ kẹ Pọl obọnana? Kọ o sae jọnọ ọ jọ ileta na kẹ omẹ ohrẹ jọ nọ u ti fiobọhọ kẹ omẹ evaọ iruo mẹ? Kọ oware nọ o kere se omẹ na u ti fiobọhọ kẹ omẹ ta usi uwoma na ziezi jẹ riẹ oghẹrẹ nọ me re ro fiobọhọ kẹ amọfa?’ Ma te jọ uzoẹme nana ruẹ nọ Timoti ọ ruẹ uyo enọ nana gbe eware efa buobu evaọ emamọ ileta nana nọ Pọl o kere sei na. Joma jọ ileta na ta kpahe umutho eware jọ nọ e rẹ sai fiobọhọ kẹ omai.

Nọ Timoti o rovie ileta riẹ na muhọ ese, ọ nwane ruẹ nọ Pọl o you rie gaga. Pọl o se rie “ọmọ oyoyou mẹ.” (2 Tim. 1:2) Ileta na i te Timoti obọ oware wọhọ 65 C.E., yọ o wọhọ nọ oke nana yọ ọ kpako vrẹ ikpe ọgba no. Ọ tẹ jẹ jọ ọkpako ukoko nọ ọ riẹ iruo riẹ ziezi. O vrẹ ikpe ikpe no nọ o bi ro lele Pọl ru iruo, yọ o wuhrẹ eware buobu mi ei no.

Eva e were Timoti gaga nọ ọ ruẹ nọ Pọl o gbe dikihẹ ga evaọ egagọ Ọghẹnẹ dede nọ a be wọso ẹe. Oke yena yọ Pọl ọ rrọ uwou-odi evaọ obọ Rom, a rọ egbregba kare iẹe, yọ u ti gbe kri re a te kpei no ho. (2 Tim. 1:15, 16; 4:6-8) Timoti ọ ruẹ nọ udu o rrọ Pọl awọ nọ ọ ta nọ: ‘Me bi thihakọ eware kpobi.’ (2 Tim. 2:8-13) Pọl ọ siọ iruo Ọghẹnẹ ba ha dede nọ a jẹ wọso ẹe. Emamọ oriruo nana o rẹ bọ omai ga wọhọ epanọ o bọ Timoti ga na.

Pọl ọ tuduhọ Timoti awọ inọ ọ rehọ iruo nọ o wo evaọ ukoko Ọghẹnẹ na zaharo vievie he. Pọl ọ gwọlọ nọ Timoti ọ ‘rehọ okẹ Ọghẹnẹ nọ o wo na ruiruo avọ ajọwha wọhọ ẹsenọ o bi fou erae.’ (2 Tim. 1:6) Ẹme Griki nọ Pọl ọ rọ ta ẹme evaọ etenẹ nọ a fa “okẹ” na họ khaʹri·sma. Otọ ẹme Griki nana họ, oware nọ a kẹ ohwo, nọ o ru iruo fihọ họ, yọ ohwo nọ a kẹ na o tube te ọnọ o re wo oware utioye he. Okẹ utionana oye u te Timoti obọ oke  nọ a sei kẹ obọdẹ iruo jọ evaọ ukoko Ọghẹnẹ.​—1 Tim. 4:14.

Eme Pọl ọ ta kẹ Timoti nọ ọ rọ okẹ nana ru? Ẹsejọhọ nọ Timoti ọ jọ ileta na se nọ “ruiruo avọ ajọwha wọhọ ẹsenọ who bi fou erae” na, iroro riẹ i kpohọ erae nọ ahwo a re kokohọ iwou rai, nọ e rẹ to zihe ruọ iwowo-erae jẹ gwọlọ fu no. Re erae na e sae wariẹ ware, a re fou rai. Obe jọ nọ o rẹ fotọ eme o ta nọ ẹme Griki (a·na·zo·py·reʹo) nọ Pọl ọ rọ ta ẹme evaọ etenẹ na u dhesẹ epanọ a re “koko erae nọ e be gwọlọ fu no họ, kprọkprọ ae hayo fou rai.” Fikiere, ẹme na o dhesẹ “epanọ ohwo ọ rẹ wariẹ wo ajọwha ziezi evaọ iruo riẹ.” Ẹme nọ Pọl ọ be ta kẹ Timoti na họ: ‘Romakẹ iruo nọ a kẹ owhẹ evaọ ukoko na.’ Epọvo na o gwọlọ nọ mai omamai ma re wo ajọwha ziezi evaọ iruo Uvie na.

Nọ Timoti o bi se ileta riẹ họ aro na, ọ ruẹ oware ofa nọ u ti fiobọhọ kẹe ru iruo nọ a kẹ riẹ na ziezi. Pọl o kere nọ: “Rehọ ẹkwoma obufihọ ẹzi ọfuafo nọ ọ rrọ omai oma na sẹro emamọ oware nana nọ a mu họ owhẹ obọ na.” (2 Tim. 1:14) Eme a mu họ Timoti obọ? Pọl ọ jọ owọ avọ 13 fodẹ “emamọ eme,” koyehọ iwuhrẹ uzẹme nọ e rrọ Ikereakere na. (2 Tim. 1:13) Nọ Timoti ọ rrọ ọtausiuwoma na, o gwọlọ nọ ọ rẹ rehọ iwuhrẹ uzẹme na wuhrẹ amọfa evaọ ukoko na gbe evaọ obọ otafe. (2 Tim. 4:1-5) U te no ere no, a rọ Timoti mu ọkpako re ọ sẹro uthuru Ọghẹnẹ. (1 Pita 5:2) Re Timoti ọ sae sẹro oware nọ a mu họ iẹe obọ na, koyehọ uzẹme nọ o rrọ Ikereakere na, ọ rẹ lẹ se Jihova re ọ rọ ẹzi riẹ fiobọhọ kẹe, ọ vẹ jẹ hai se Ikereakere na.​—2 Tim. 3:14-17.

U wo oware nọ a mu họ omai obọ nẹnẹ re. Oye họ uzẹme na nọ ma be hae nyai wuhrẹ amọfa na. (Mat. 28:19, 20) Uzẹme nọ a mu họ omai obọ na o te hae jọ ghaghae kẹ omai nọ ma tẹ be hae lẹ se Jihova jẹ romatotọ wuhrẹ Ebaibol na ẹsikpobi. (Rom 12:11, 12; 1 Tim. 4:13, 15, 16) O sae jọnọ a mu iruo efa họ omai obọ. Ma sae jọ ọkpako ukoko hayo jọ iruo odibọgba oke-kpobi na. U fo nọ iruo itienana i re fiobọhọ kẹ omai wo omaurokpotọ. I re ru omai vuhumu nọ ababọ obufihọ Ọghẹnẹ ma sai ru ai hi. Re ma sae sẹro oware nọ a mu họ omai obọ na, ma re rri rie ghaghae jẹ rẹroso Jihova inọ o ti fiobọhọ kẹ omai evaọ iruo na.

Iruo jọ nọ a kẹ Timoti nọ o ru họ, o re wuhrẹ amọfa. Oyejabọ nọ Pọl ọ rọ ta kẹ Timoti nọ: “Eware nọ who yo mi omẹ . . . , mu eware nana họ ezae nọ i wo ẹrọwọ obọ, re ae omarai a sai te ziezi, te epanọ a re ro wuhrẹ amọfa.” (2 Tim. 2:2) Pọl ọ be jọ etenẹ vuẹ Timoti nọ eware nọ ọ riẹ na, ọ rehọ ae wuhrẹ inievo na. U wuzou gaga nọ esẹro kpobi evaọ ukoko Ọghẹnẹ a rẹ daoma ru epọvo na. Ọsẹro nọ o bi ru iruo riẹ ziezi ọ rẹ ko eware nọ ọ riẹ dhere he. Ukpoye, o re wuhrẹ amọfa iruo nọ ọ riẹ evaọ ukoko na. O re bru udu hu inọ ahwo nọ o bi wuhrẹ na a te riẹ vi ei hayo a ti wo onaa vi ei. Fikiere, orọnikọ emeware jọ ọvo o re wuhrẹ ohwo kpahe iruo na ha. Ọ rẹ daoma fiobọhọ kẹ ahwo nọ o bi wuhrẹ re a riẹ eware nọ o bi wuhrẹ ae na ziezi, je kruga evaọ ukoko Jihova. O te bi ru ere, “ezae nọ i wo ẹrọwọ” nọ o wuhrẹ na e vẹ te sai fiobọhọ ziezi evaọ ukoko na.

Avro ọ riẹ hẹ, ileta nọ Pọl o kere se Timoti na e were riẹ gaga. Ẹsejọhọ Timoti ọ jẹ hai se ileta nana no oke te oke, re ọ sae riẹ oghẹrẹ nọ o re ro lele ehrẹ nọ e riẹe, nọ o bi ru iruo nọ a mu họ iẹe obọ na.

O gwọlọ nọ ma re lele ehrẹ nọ Pọl o kere se Timoti na re. Evaọ oghẹrẹ vẹ? Ma rẹ daoma ru iruo avọ ajọwha wọhọ ẹsenọ ma bi fou erae. Ma rẹ jẹ sẹro emamọ oware nọ a mu họ omai obọ na, je wuhrẹ amọfa eware nọ ma riẹ. Ma te ru enẹ, ma te sai “ru iruo odibọgba” mai “gba ziezi,” wọhọ epanọ Pọl ọ vuẹ Timoti na.​—2 Tim. 4:5.