MODI ki bu ta xinti óras ki bu ta resebe un karta di un grandi amigu ki ta nkoraja-u? Disiplu Timótiu resebe kel tipu di karta li di apóstlu Polu. Nu ta konxe-l pa livru di Bíblia di 2 Timóteo. Kantu Timótiu resebe kel karta li, di sertéza el fika ku gana di bai pa un lugar kalmu i lé kuzê ki se grandi amigu skrebe. Talvês Timótiu fika ta pensa: ‘Modi ki Polu sta? El tene algun konsedju pa mi ki pode djuda-m kunpri nhas diziginason? Kel karta li pode djuda-m midjora nha manera di prega i inxina i djuda otus?’ Sima nu sta ben odja, Timótiu atxa respóstas inportanti na kel karta pa kes pergunta li i otus asuntu. Má gósi, nu ben odja alguns konsedju inportanti ki sta na kel karta.

Kantu Timótiu kumesa ta lé kes primeru palavra di kel karta, el ntende lógu ma Polu ta amaba el txeu. Ku txeu amor, Polu txoma-l di ‘nha fidju ki el krê txeu’. (2 Tim. 1:2) Talvês Timótiu tinha uns 30 anu kantu el resebe kel karta pa vólta di anu 65 D.J. Nbóra jóven, Timótiu éra un ansion ku txeu spiriénsa. Dja el trabadjaba pa más di 10 anu ku Polu i el prende txeu ku el.

Timótiu debe fika txeu nkorajadu di sabe ma Polu sta ta aguentaba difikuldadis di manera fiel. Polu staba prézu na Roma i lógu es ta mataba el. (2 Tim. 1:15, 16; 4:6-8) Timótiu odja ma Polu tinha txeu koraji pamodi Polu fla: ‘N sta kontinua ta aguenta tudu kes kuza’. (2 Tim. 2:8-13) Sima Timótiu, izénplu di Polu na aguenta firmi tanbê ta da-nu txeu koraji.

Polu insentiva Timótiu pa da txeu valor pa se diziginason na sirvisu pa Deus. El fla Timótiu: ‘Faze sima tisa lumi, pa bu tisa kel don di Deus ki bu resebe’. (2 Tim. 1:6) Kel palavra gregu ki Polu uza li é khárisma ki traduzidu pa ‘don’. Kel palavra gregu li sta pâpia di un don ki nu ta resebe di grasa i ki nu ka merese. Timótiu resebe kel don li kantu el skodjedu pa sirbi kongregason di un manera spesial. — 1 Tim. 4:14.

Kuzê ki Timótiu devia fazeba ku kel don li? Talvês kantu ki el lé kes palavra ‘faze, sima tisa lumi’, talvês el lenbra di lumi ki  pesoas ta kustuma uzaba na kaza ki dipôs ta fikaba sô un monti di braza. Nton pesoas ta meste sopraba kes braza pa pode pegaba lumi i fika más kenti. Un disionáriu ta fla ma kel palavra gregu anazopyréo ki Polu uza, siginifika ‘torna sende, torna fika bibu, faze béntu pa lumi pega’. Kel-li krê fla ‘sta animadu ô ku gana di faze algun trabadju’. Nton, é kel-li ki Polu krê flaba Timótiu: ‘Faze bu midjór na bu diziginason!’ Nu meste faze mésmu kuza oji, ki é ser zelozu na nos sirvisu pa Jeová.

Timótiu kontinua ta lé karta di se grandi amigu, i el odja otu konsedju ki ta djudaba el ten bons rezultadu na se trabadju pa Deus. Polu skrebe: ‘Ku ajuda di spritu santu ki ta mora na nos, guarda es tizoru di grandi valor ki bu dadu.’ (2 Tim. 1:14) Kal ki é kel tizoru di grandi valor ki Timótiu dadu? Na kel versíklu antis, Polu pâpia di ‘kes palavra dretu’, ki é verdadi ki sta na Bíblia. (2 Tim. 1:13) Dja ki Polu éra un kriston, el tinha ki pregaba kel verdadi déntu i fóra di kongregason. (2 Tim. 4:1-5) Tanbê, Timótiu diziginadu pa kuida di ribanhu di Deus. (1 Ped. 5:2) Pa Timótiu guardaba kel tizoru di grandi valor, ki éra kel verdadi ki es inxinaba el, el meste kunfiaba na spritu santu di Jeová i se Palavra. — 2 Tim. 3:14-17.

Oji tanbê nu dadu kel tizoru di grandi valor ki é inxina otus verdadi. (Mat. 28:19, 20) Nu pode kontinua ta da valor pa es diziginason rei di sábi óras ki nu ta kontinua ta faze orason i studa Bíblia sénpri. (Rom. 12:11, 12; 1 Tim. 4:13, 15, 16) Talvês, nu resebe otus diziginason sima sirbi pa ténpu interu ô ser ansion. Kes priviléjiu li, debe djuda-nu ser umildi i seta ma nu ta dipende di Deus. Nu pode guarda, ô proteje, kel tizoru di grandi valor ki nu resebe óras ki nu ta da-l txeu valor i kunfia na ajuda ki Jeová ta da pa nu kuida di el.

Un párti di diziginason di Timótiu éra trena otus pa faze kel trabadju ki el sta ta fazeba. É pur isu ki Polu insentiva Timótiu: ‘Kes kuza ki bu obi di mi, pasa pa kes ómi fiel, asi, pa es pode sta kualifikadu pa inxina otus.’ (2 Tim. 2:2) Polu lenbra Timótiu ma el devia inxinaba otus algen kes kuza ki el prendeba. Tudu ansion debe sforsa pa faze mésmu kuza na kongregasons. Un bon ansion ka ta sukundi kuzê ki el sabe sobri modi ki ta fazedu un trabadju. Má, el ta trena otus pa faze kel trabadju. El ka ta xinti medu di otus irmon sabe más ki el ô di es faze un diziginason midjór ki el. Tanbê el ka ta fika kontenti di inxina sô kes kuza ki un algen meste sabe pa faze un trabadju. El krê djuda kes más novu ten bon juís i sabedoria, kel-li krê fla ten un bon amizadi ku Jeová. Di kel manera li, ‘kes ómi fiel’ ki ta trenadu pode ser di grandi ajuda pa kongregason.

Di sertéza, Timótiu gosta txeu di kel karta ki Polu skrebe-l. É faxi nu imajina Timótiu ta lé i ta torna lé kes konsedju di txeu valor i ta pensa na kel midjór manera di aplikaba es na se diziginason.

Anos tanbê nu krê sigi kes konsedju. Modi? Óras ki nu ta tisa kel don ki nu resebe, sima tisa lumi, guarda kel ki nu dadu i inxina otus tudu kel ki nu sabe. Asi, nu ta pode sigi kel konsedju ki Polu da Timótiu: ‘Faze nos trabadju pa Deus konplétu.’ — 2 Tim. 4:5.