KYEBHI kiweji divwa se utambula mukanda wakutumikisa kamba dyé dyakazola? Odixibulu Timote, watambula mukanda wadifu kiki, amutumikisa kwa Phawulu, omukanda yu mu Bibidya twene mu ixana kala 2 Timote. Kyoso kyatambula omukanda, séphata Timote wamesenene kuya mukididi kyatululuka phala kwijiya se ihi yamutangela Kamba dyé. Nange Timote wadibhwidisa: ‘Phawulu wala kyebhi? Okwila watumikisa kitendelese kyalungu ni ukexilu ungatokala kutala okikalakalu kyami? Okwila omukanda yú wandangikwatekesa kuditunda kyambote m’ukunji wami ni kukwatekesa akwetu? Kala kitwandamona Timote wasange o itambwijilu ya ibhwidisu yiyi ni yamukwa dingi. Maji mukithangana kiki twandikwatenena ngo mu itendelesu yakatunda yatubhana mwene, itusanga mumukanda yú.

Kyoso Timote kyamateka kutanga omukanda mwene watonginina kwila Phawulu wamuzolele kyavulu. Ni kilendu kyoso, Phawulu wexana Timote kala “mon’ami’a kazola.” (2 Tim. 1:2) Timote watambula omukanda yú nange mumuvu wa 65 K.K., mwene nange wexile kyá ni 30 amivu, sumbala wexile hanji munzangala, maji wexile kyá kafunga wexile ni uhete. Mwene wakalakala kumoxi ni Phawulu mu 10 mivu, séphata wadilongo ima yavulu ni Phawulu

Okukolokota kwa Phawulu mu ibhidi kwaswinisa kyavulu Timote. Phawulu amukutile mumbanza ya Loma, kwakambele ngo ejimujibha. (2 Tim. 1:15, 16; 4:6-8) O izwelu ya Phawulu ya kwila: “Ima yoso ngikolokota nayu” yalondekesa kwa Timote kwila Phawulu wexile muthu waswina. (2 Tim. 2:8-13) Kala kyabhiti ni Timote etu we tutena kudilonga ni phangu yakukolokota ya Phawulu.

Phawulu waswinisa Timote phala kuxila o ujitu musidivisu yê kwa Nzambi. Phawulu wambela kwa Timote wixi: “Enda ni kunvunza uhete yó moxi dyé . . . temabhu ubhane mulengu.” (2 Tim. 1:6) Okizwelu mu Ngeleku, kyatumbula Phawulu bhabha, kyolungulule “uhete” okizwelu khaʹri·sma. Okizwelu mudimi dya Ngeleku kilombolola uhete ututambula mu kingoho, maji kiwatutokala. Timote watambula o uhetu yú kyoso kyamusolo phala kusidivila mukikalakalu kyakatunda.—1 Tim. 4:14.

Kyebhi Timote kyeji kalakala ni uhetu yú? Kyoso kyatange o izwelu “enda ni kunvunza uhete yó  moxi dyé . . . temabhu ubhane mulengu,” mwene nange walembalala kwila otubhya twexile muwika o athu mumabhata, twexile ngó ni makala awama, omakala yâ abhingile kwata jihwi phala omulengu ni munza ni udibandekese. Sayi disyonario okizwelu (a·na·zo·py·reʹo) mu Ngeleku kyatumbala bhabha, kilombolola, kuwika dingi, kuta jihwi ni kubandekesa mulengu. Mu izwelu yengi kilombolola kubhanga kikalakalu ni kisangusangu kyoso. Kyene okiswinisu kyamesenene kubhana Phawulu kwa Timote. Lelu, etu we twatokala kusidivila Jihova ni kufulujuka kwoso.

Mukusuluka ni kutanga omukanda watumikisa kamba dyé dyakazola, Timote wasange kitendelesu kyamukwa kyejimukwatekesa kuditunda kyambote m’ukunji wê. Phawulu wamusonekena, wixi: “Okima kyambote’okyo kyakubhana kulûnda, langakyu mu ngunzu ya Nzumbi Ikôla wa tu tunga moxi.” (2 Tim. 1:14) Kima kyahi kyambote kyatambwile Timote? Muvelesu 13 Phawulu watumbulamu okizwelu “maka madisanze,” kifwa okidi kitusanga mu Mikanda Ikôla. (2 Tim. 1:13) Kuma Timote wexile mukunji mukilunga kya Jikidistá, watokalele kuboka okidi, kikale mukilunga, kikale kukanga dya kilunga. (2 Tim. 4:1-5) Kumbandu yengi Timote amusolele phala kukwinga okilunga kya Nzambi. (1 Phe. 5:2) Phala kulanga okima kyambote kyamubhanene, kifwa okidi kyamulongele, Timote, watokalele kudyelela mukutena kwa nzumbi ikôla ya Jihova ni mu Maka Mê.—2 Tim. 3:14-17.

Lelu, etu we twatambula kima kyambote mba o ujitu wakuboka ni kilunga kya Jikidistá. (Mat. 28:19, 20) Tutena kusuluka ni kubhana ovalolo mukikalakalu kyakatunda mukukolokota mukusamba ni kudilonga jinga izuwa yoso o Mak’â Nzambi. (Loma 12:11, 12; 1 Tim. 4:13, 15, 16) Nange twatambula mawujitu amukwa, kala kusidivila musidivisu yatembu yoso mba kusidivila kala kafunga. Omawujitu atokala kutulendukisa dingi kutukwatekesa kutendela kwila Nzambi mwene utukwatekesa ku ikumbidila. Tutena kulunda mba kulanga okima kiki kyambote kitwatambula, mukukibhana valolo m’ujitu ni kudyelela kwila Jihova wandatukwatekesa kuditunda kyambote.

Mu ikalakalu yavulu yexile nayu Timote, mwene wexile ni ikalakalu yakulonga akwa kubhanga o ima yexile mubhanga mwene. Kiki kyene kyabhangesa Phawulu kuswinisa Timote kwila: “Ima iwévwa jinga kokwami . . . lûndisayu mba bhakesayu ku athu ala jifiyele, atena we kulonga akwâ.” (2 Tim. 2:2) Bhabha Phawulu walembalesa Timote kwila, mwene watokalele kulonga kwakwa yoso yadilongele. Kiki kyene we kyatokala kubhanga otufunga twoso mu ilunga. Okafunga kambote kakala ni difuba mba lwimbi lwa kikalakalu kyé, kasweka we o ima yejiya. Muveji dya kusweka o ima yejiya, mwene ulonga akwa phala kuhádya atene kubhanga o ikalakalu yejiya. Okafunga kambote kakala ni wôma wakwila se akwa ejiya o ima yejiya mwene, ene andaditunda dingi kyambote mukikalakalu kiki omwene wandakala kyá kumbandu. Okafunga kambote kalongo ngó o ima yabhebhuluka kwakwa, yalungu ni kikalakalu kyê. Maji wamesena kwila oyó amumulonga ukala ni kutetuluka, ni kilunji, kifwa ukula mwene mu nzumbi. Se kyene kyabhanga “omayala mba athu afiyele” atambula o ilongesu, andakwatekesa kyambote okilunga.

Se phata Timote wawabhela kyavulu okutanga omukanda yú wahenda wamutumikisa Phawulu. Utena kuxinganeka Timote kutanga muveji javulu o itendelesu yakatunda yiyi ni kuxinganeka kyebhi kyeji kumbidila mukikalakalu kyê?

Etu we twamesena kukayela o itendelesu yiyi. Kyebhi? Mukuvunza kala tubhya o uhete utwatambula, mukulanga o ujitu watubhana ni mukulonga yoso itwejiya. Se kyene kitubhanga twandatena kukayela o itendelesu yabhana Phawulu kwa Timote kyoso kyambe “kumbidila kyambote o ungunza wé.”—2 Tim. 4:5.