ГАВА тӧ жь достәки хԝә нәʹмәкә бь готьнед дьлгәрм дьстини, гәло тӧ ша наби? Тимотʹейо нәʹмәкә ӧса жь Паԝлосе шанди станд. Паше, әв нәʹмә бу пʹарәкә Кʹьтеба Пироз у ԝәк кʹьтеба «2 Тимотʹейо» һат нав кьрьн. Гава Тимотʹейо әв нәʹмә станд, әԝ бешьк пʹьрʹ ша бу. Дьбә кӧ Тимотʹейо ӧса дьфькьри: «Гәло Паԝлос чаԝа йә? Гәло әԝ чь дькә? Гәло Паԝлос бона кʹьфшкьрьна мьн ширәтәк мьнрʹа ньвиси? Гәло әв нәʹмә ԝе али мьн бькә кӧ әз дь хьзмәтеда пешдачуйи бьм у али кәсед дьн бькьм?» Жь ве нәʹма Паԝлос, Тимотʹейо щабед ван пьрса у гәләк пьрсед дьн стандьн. Ньһа әме дина хԝә бьдьн чәнд ширәтед жь ве нәʹме, йед кӧ ԝе бона мә жи керһати бьн.

Готьнед пешьн йед нәʹме нишан дькьрьн кӧ Паԝлос Тимотʹейо чьԛас һʹьз дькьр. Паԝлос ӧса жерʹа ньвиси «лаԝе . . . дәлал» (2 Тимтʹ. 1:2). Ԝәкә сала 65 Д.М., гава Тимотʹейо әв нәʹмә станд, әԝ ԝәкә 30 сали бу. Ԝе дәме, әԝ рʹуспики щерʹьбанди бу, жь бәр кӧ әԝи зедәтьри 10 сала тʹәви Паԝлос хьзмәт кьрьбу у гәләк тьшта һин бьбу.

Паԝлос ль Рʹоме кәледа бу, у әԝ һивийа суще хԝә бу (2 Тимтʹ. 1:15, 16; 4:6-8). Гава Тимотʹейо пеһʹәсийа кӧ Паԝлос чаԝа бь амьни ль һьмбәри тәнгасийа сәбьр дькьр, әԝи бешьк һелан дьстанд. Мерхасийа Паԝлос жь ван готьна әʹйан дьбә: «Әз һәр тьшти сәбьр дькьм» (2 Тимтʹ. 2:8-13). Мина Тимотʹейо, әм жи дькарьн жь мәсәла Паԝлос һелане бьстиньн у чʹәʹв бьдьнә сәбьра ԝи.

Паԝлосе шанди Тимотʹейо һелан дькьр кӧ әԝ хьзмәта хԝә ԛимәт бькә. Паԝлос дьхԝәст кӧ Тимотʹейо «агьре пʹешкʹеша Хԝәде», йе кӧ ԝирʹа һат дайин, һе гӧрʹ бькә (2 Тимтʹ. 1:6). Ль ве рʹезе, Паԝлос хәбәра харисма да хәбате, хәбәрәкә Йунани йа кӧ те һʹәсабе «дийари», «һәдийә» йан жи «кʹәрәм». Гава Тимотʹейо һат кʹьфшкьрьн кӧ дь щьватеда бь аԝайәки мәхсуси хьзмәт бькә, әԝи һьнге әв «пʹешкʹеш» станд (1 Тимтʹ. 4:14).

Гәрәке Тимотʹейо әв пʹешкʹеш чаԝа бьда хәбате? Гава әԝи ԝан хәбәред Паԝлос хԝәнд кӧ ‹агьре пʹешкʹеша Хԝәде һе гӧрʹ  бькә›, әв йәк дьбәкә агьре кӧ малда ведьхьстьн ани бира ԝи, йе кӧ паши ԝәхтәке дьтәмьри у гәрәке диса бьһата гӧрʹкьрьне. Ль гора фәрһәнгәке, хәбәра Йунани (аназопирәо) йа кӧ Паԝлос да хәбате те һʹәсабе «жь нува гӧрʹ кьрьн». Әв хәбәр бь аԝайәки симболик жи дьһат хәбьтандьн. Йани, Паԝлос Тимотʹейорʹа ӧса дьгот: «Дь кʹьфшкьрьна хԝәда бь дьл у щан бьхәбьтә!» Гәрәке әм жи мина Тимотʹейо бь хирәт дь кʹьфшкьрьна хԝәда бьхәбьтьн.

Дь нәʹма Паԝлосда, Тимотʹейо ширәтәкә дьн жи дит, йа кӧ али ԝи дькьр кӧ әԝ дь хьзмәта хԝәда пешдачуйи бьбә. Паԝлос ӧса ньвиси: «Әԝ тьштед ԛәнщә кӧ ль тә һатьнә спартьне бь ԝи Рʹӧһʹе Пирози нава мәда хԝәй кә» (2 Тимтʹ. 1:14). Әв ‹тьштед ԛәнщ йед кӧ ль ԝи һатьн спартьн› чь бун? Ль рʹеза пешийа ве рʹезе, Паԝлос бәʹса «һинкьрьна сахләм», демәк бәʹса рʹастийед Ньвисаред Пироз кьр (2 Тимтʹ. 1:13). Тимотʹейо хьзмәткʹаре Хԝәде бу, ләма лазьм бу әԝ рʹастийе һьм ль һӧндьре щьвате һьм жи ль дәрвәйи щьвате һин бькә (2 Тимтʹ. 4:1-5). Ӧса жи, Тимотʹейо ԝәк рʹуспи һатьбу кʹьфш кьрьн кӧ «шьвантийе . . . кәрийе пәзе Хԝәде» бькә (1 Пәт. 5:2). Бь сайа ве кӧ Тимотʹейо хԝә дьспарт рʹӧһʹе пироз у Хәбәра Хԝәде, әԝи дькарьбу әв ‹тьштед ԛәнщ йед кӧ ль ԝи һатьн спартьн› – демәк рʹастийа кӧ гәрәке әԝи һин бькьра – бьпарезә (2 Тимтʹ. 3:14-17).

Рʹасти мәрʹа жи һатийә тʹәсмилкьрьн, демәк һатийә спартьн, ԝәки ве рʹастийе мәрьва һин бькьн (Мәт. 28:19, 20). Бона кӧ әм тʹӧ щар бир нәкьн кӧ әв рʹасти чьԛас бьԛимәт ә, ԝе баш бә ԝәки әм һәртʹьм дӧа бькьн у Кʹьтеба Пироз леколин бькьн (Рʹом. 12:11, 12; 1 Тимтʹ. 4:13, 15, 16). Һьнә кәс жь мә ԝәк рʹуспийед щьвате йан хьзмәткʹаред һәртʹьм хьзмәт дькьн. Һәгәр шьхӧләки фәрз тʹәсмили мә кьрьнә, гәрәке әм бь мьлукти фәʹм бькьн кӧ әм һʹәԝще аликʹарийа Йаһоԝа нә. Гәрәке әм ‹ван тьштед ԛәнщ› ԛимәт бькьн у жь Йаһоԝа аликʹарийе бьхԝазьн кӧ ԝан бьпарезьн.

Кʹьфшкьрьн у шьхӧлед Тимотʹейо нә тʹәне ԝива, ле кәсед дьнва жи гьредайи бун. Ләма жи Паԝлос әв ширәт да Тимотʹейо: «Әԝ тьштед кӧ тә . . . жь мьн бьһист, бьсперә ԝан мәрьвед амьн, йед кӧ ԝе бькарьбьн һьнәкед дьн һин кьн» (2 Тимтʹ. 2:2). Бәле, лазьм бу кӧ Тимотʹейо тьштед кӧ әԝ һин бьбу кәсед дьн жи һин бькә. Иро жи, пʹьрʹ фәрз ә кӧ һәр рʹуспи хирәт бькә ԝәки әʹйни тьшти бькә. Бәрпьрсийарәки баш ԝе занәбуна хԝә жь кәсед дьн вәнәшерә, ле әԝе кәсед дьн һин бькә кӧ әԝана жи бькарьбьн ишед щьвате биньн сери. Әԝ натьрсә кӧ кәсед дьн ԝе ви иши жь ԝи баштьр бькьн у пәсна бьстиньн. Ләма, бәрпьрсийарәки баш сәра-бәра һин накә. Әԝ дьхԝазә али кәсед дьн бькә кӧ әԝ фәʹмдар у билан бьн у жь алийе рʹӧһʹанива мәзьн бьн. Бь ви аԝайи, «мәрьвед амьн», йед кӧ әԝ һин дькә, ԝе бона щьвате һе керһати бьн.

Бешьк, Тимотʹейо бона нәʹма Паԝлос пʹьрʹ шекьрдар бу. Дьԛәԝьмә, әԝи әв нәʹмә гәләк щара дьхԝәнд у дьфькьри кӧ әԝ чаԝа дькарә ван ширәта дьһа баш пек бинә.

Ширәтед кӧ Тимотʹейо стандьбун бона мә жи керһати нә. Ԝе баш бә кӧ әм жи ише хԝә бь дьл у щан биньн сери, тьштед кӧ мәрʹа һатьнә спартьн бьпарезьн у кәсед  дьн жи һин бькьн. Бь ви аԝайи, әме бькарьбьн хьзмәта хԝә биньн сери (2 Тимтʹ. 4:5).