Aw yu kin fil we yu gɛt lɛta frɔm yu gud padi? Di disaypul Timoti bin gɛt dis kayn lɛta frɔm di apɔsul Pɔl. Na da lɛta wi de kɔl naw 2 Timoti insay di Baybul. I go mɔs bi se Timoti bin fɛn kwayɛt ples kwik kwik wan so dat i go rid wetin in padi dɔn rayt to am. Sɔntɛm Timoti bin de tink se: ‘Aw Pɔl de du? I gɛt ɛni advays we go ɛp mi wit mi wok? In advays go ɛp mi fɔ prich ɛn tich fayn, ɛn fɔ ɛp ɔda pipul dɛn?’ As wi go si, Timoti bin gɛt ansa to dɛn kwɛstyɔn dɛn ya ɛn bɔku ɔda kwɛstyɔn dɛn insay dis impɔtant lɛta. Bɔt fɔ naw, lɛ wi pe atɛnshɔn pan sɔm impɔtant advays dɛn we de insay dis lɛta.

We Timoti bigin fɔ rid di fɔs pat pan di lɛta, i go dɔn si wantɛm wantɛm se Pɔl bin rili bisin bɔt am. Pɔl bin ivin kɔl am in “pikin we [i] rili lɛk.” (2 Tim. 1:​2) Timoti bin gɛt dis lɛta arawnd di ia 65. I go mɔs bi se i bin dɔn pas 30 ia, ɛn in na bin ɛkspiriɛns ɛlda bay da tɛm de. I bin dɔn de wok wit Pɔl fɔ ova tɛn ia, ɛn i dɔn lan plɛnti tin dɛn.

Timoti go mɔs dɔn gladi we i kam fɔ no se Pɔl bin de bia wit in prɔblɛm dɛn. Pɔl na bin prizina na Rom, ɛn i nɔ go te igen, dɛn go kil am. (2 Tim. 1:​15, 16; 4:​6-8) Timoti bin si se Pɔl gɛt kɔrej bikɔs Pɔl bin se: “A de kɔntinyu fɔ bia ɔltin.” (2 Tim. 2:​8-13) Jɔs lɛk Timoti, wisɛf go ebul tinap tranga wan we wi lan bɔt di we aw Pɔl bin de bia.

Pɔl bin ɛnkɔrej Timoti fɔ si di wok we i de du fɔ Gɔd as sɔntin we rili impɔtant. Pɔl bin want Timoti fɔ “mek di gift we Gɔd gi [am] tan lɛk faya.” (2 Tim. 1:​6) Pɔl bin yuz di Grik wɔd khaʹri·sma fɔ “gift.” Da Grik wɔd de min gift we na fri ɛn we yu nɔ wok fɔ. Timoti bin gɛt dis gift di tɛm we dɛn bin pik am fɔ du spɛshal wok na di kɔngrigeshɔn.—1 Tim. 4:​14.

Wetin Timoti fɔ du wit dis gift? As i de rid se “mek di gift we Gɔd gi yu tan lɛk faya,” i go mɔs dɔn de tink bɔt di faya kol dɛn we kin de na os we sɔntɛnde kin gɛt smɔl faya pan am. Pɔsin nid fɔ blo dɛn kol dɛn de so dat dɛn go kech ɛn gɛt mɔ it. Wan dikshɔnari tɔk se di Grik vab we Pɔl yuz min fɔ “stat sɔntin bak, fɔ briŋ bak, ɔ fɔ blo faya  te i kech.” So i min se pɔsin fɔ “gladi ɛn gɛt zil fɔ du sɔntin.” So Pɔl bin de advays Timoti se: ‘Put yu at pan yu wok!’ Wisɛf tide fɔ du di sem tin; wi fɔ gɛt zil fɔ du wi wok.

As Timoti de kɔntinyu fɔ rid di lɛta we in padi rayt to am, i kam fɔ si ɔda tin we ɛp am fɔ prich ɛn tich fayn fayn wan. Pɔl bin rayt se: “Lɛ di oli spirit we de insay wi ɛp yu fɔ protɛkt dis tin we gɛt valyu we dɛn gi yu fɔ kia fɔ.” (2 Tim. 1:​14) Wetin na bin dis tin we gɛt valyu we dɛn gi Timoti? Insay di vas we de bifo dis, Pɔl bin tɔk bɔt di “gud wɔd dɛn,” dat na di tru tin dɛn we de insay di Skripchɔ dɛn. (2 Tim. 1:​13) Bikɔs Timoti na pɔsin we bin de prich, i bin nid fɔ tich di tru to di brɔda ɛn sista dɛn na di kɔngrigeshɔn ɛn to di pipul dɛn na in tɛritri. (2 Tim. 4:​1-5) Dɔn, dɛn bin dɔn pik Timoti fɔ bi ɛlda fɔ mɛn Gɔd in ship dɛn. (1 Pit. 5:​2) Timoti fɔ protɛkt dis valyu tin we dɛn gi am, dat na di tru we i fɔ tich bay we i abop pan Jiova in oli spirit ɛn In Wɔd.—2 Tim. 3:​14-17.

Tide, Jiova dɔn mek wi no di tru tin dɛn we wisɛf fɔ tich ɔda pipul dɛn. (Mat. 28:​19, 20) Wi fɔ sho se wi gladi fɔ dis valyu tin we Jiova dɔn gi wi bay we wi kɔntinyu fɔ pre ɛn stɔdi in Wɔd ɔltɛm. (Rom. 12:​11, 12; 1 Tim. 4:​13, 15, 16) Sɔntɛm wi go gɛt ɔda wok, lɛk fɔ sav as ɛlda ɔ fɔ de na di ful-taym savis. Da kayn wok de fɔ mek wi ɔmbul ɛn mek wi abop pan Gɔd fɔ mek i ɛp wi. So wi fɔ protɛkt di wok we Jiova gi wi bay we wi valyu am ɛn abop se Jiova go ɛp wi fɔ du am.

Sɔm pan Timoti in wok we i bin gɛt na fɔ tren ɔda pipul dɛn fɔ du di wok we i bin de du. Na dat mek Pɔl bin ɛnkɔrej Timoti se: “Tich fetful man dɛn di tin dɛn we yu yɛri a tɔk . . , ɛn dɛn fetful man dɛn de go rili kwalifay fɔ tich ɔda pipul dɛn.” (2 Tim. 2:​2) So Timoti bin fɔ lan frɔm in Kristian brɔda dɛn, ɛn tich dɛn wetin i sabi. I impɔtant fɔ mek ɔl di ovasia dɛn na di kɔngrigeshɔn dɛn tide tray fɔ du di sem tin. So gud ovasia nɔ de ayd wetin i no bɔt aw fɔ du wan patikyula wok. Bifo dat, i de tich ɔda pipul dɛn so dat dɛn go ebul fɔ du di wok. I nɔ de fred se dɛn go no bɔku tin ɔ sabi du di wok pas am. So di ovasia nɔ de jɔs tich di simpul simpul tin dɛn bɔt di wok. I want fɔ ɛp di wan dɛn we i de tren fɔ ebul disayd fɔ du di rayt tin ɛn fɔ bi machɔ Kristian dɛn. Bay da we de, di “fetful man dɛn” we i dɔn tich go ebul fɔ ɛp di kɔngrigeshɔn mɔ ɛn mɔ.

Timoti go mɔs dɔn valyu di fayn lɛta we Pɔl rayt to am. I go mɔs bi se i bin de rid am bɔku bɔku tɛm ɛn tink bɔt aw i go yuz dɛn fayn advays dɛn de we i de du in wok.

Wisɛf want fɔ fala dis advays. Aw? Wi fɔ tray tranga wan fɔ mek di gift we Gɔd gi wi tan lɛk faya, fɔ protɛkt di tin we gɛt valyu we Gɔd gi wi, ɛn fɔ tich ɔda pipul dɛn ɔltin we wi sabi. If wi du dis, wi go ebul fɔ “du [wi] wok fayn fayn wan” jɔs lɛk aw Pɔl bin tɛl Timoti.—2 Tim. 4:​5.