YINKI ya ke salá nge ntangu nge ke zwá lettre yina me katuka na kamarade ya nge ya ntima? Lettre ya nsuka yina Paul filisá na Timote, salá Timote vrai kilengi. Lettre yango ke bubu yayi na kati ya Biblia. Beto lenda zonza ti, ntangu Timote kuzwá lettre yayi, yandi sosa plase yina makelele vandá ve, samu na kutanga mambu yina kamarade ya yandi vandá na nsatu ya kuzonza na yandi. Ntangu ya nkaka Timote kanisá: ‘Paul ke kwandi bien kote yina yandi kele? Wapi bakonseye ya malu-malu mu ke zwá na lettre yayi na faso ya kusadila baresponsabilite yina ke na munu? Bakonseye ya yandi ke sadisa kwandi munu na kubongisa faso ya munu ya kupreche mpe ya kusadisa bantu ya nkaka?’ Ya vrai, Timote kuzwá bareponse na bakestion yayi mpe na bakestion ya nkaka na lettre ya Paul. Beto mase zonzila mwa bakonseye ya mbote yina ke na kati ya lettre yango.

Ntangu Timote bandá kutanga lettre, bamambu ya ntete yina yandi tangá, lakisak’ yandi ti Paul vandá na luzolo ya mingi samu na yandi. Paul bokilá yandi “mwana ya munu yina mu ke zolá mingi.” (2 Tim. 1:2) Tanga ya nkaka Timote vandá na bamvula 30 ntangu yandi kuzwá lettre yayi na 65 N.B. Na ntangu yina, yandi lutisá deja bamvula mingi faso kuluntu na kimvuka. Dyaka, yandi lutisá deja bamvula 10 na kote ya Paul mpe yandi longoká mambu mingi na yandi.

Ya pesá Timote ngolo mpe kuraje ya kuzaba ti Paul kangá ntima na mantwala ya bampasi mingi. Paul vandá na boloko na Rome mpe ya bikaná kaka mwa bilumbu samu ba kufwa yandi. (2 Tim. 1:15, 16; 4:6-8) Timote talá ti Paul vandá na kuraje, samu Paul zonzá: ‘Mu ke lemba ve kukanga ntima na mambu nyonso.’ (2 Tim. 2:8-13) Faso Timote, Beto mpe lenda kuzwa ngolo na ekzample ya mbote yina biká Paul.

Paul zonzá na Timote na kutala kisalu yina yandi ke salá samu na Yehova, faso kima yina ke na valere ya mingi. Paul zolá ti, Timote ‘vumbula faso tiya dikabu ya Nzambi’ yina vandá na yandi. (2 Tim. 1:6) Mot ‘dikabu’ na Grek ke kharisma. Mot yayi na Grek ke zonzilá dikabu yina ba ke pesá ya mpamba, yina muntu ke salá ve bangolo samu na kuzwa yawu. Timote kuzwá dikabu yayi ntangu ba solá yandi samu na kusadila kimvuka na faso ya kulutila.—1 Tim. 4:14.

 Yinki Timote zola sala na dikabu yango? Ntangu Paul zonzá na yandi na ‘kuvumbula yawu’ faso tiya, ntangu ya nkaka yandi vandá kanisa na batiya ya makala yina bantu ke vandá na yawu na bayinzo. Samu makala basisa tiya ya mingi, ba zolá kontinye kusala yawu mupepe. Diksionere mosi me zonza ti, verbe ya Grek (a·na·zo·py·reʹo) yina Paul sadilá zola zonza ‘kuvumbula tiya.’ na kimpeve ya zola zonza mpe ‘kuvanda na tiya mpe kilengi ya kusala kisalu ya malu-malu.’ Na yawu, Paul pesá Timote konseye yayi: ‘Tula ntima ya nge nyonso na kisalu ya Yehova!’ Bubu yayi beto ke mpe na nsatu ya kulanda konseye ya Paul, ya kuvanda na tiya na kisalu ya Yehova.

Na kati ya lettre, Paul zonzá mpe na Timote mambu yina lenda sadisa yandi na kusala na faso ya bien kisalu ya yandi. Paul soniká:‘Bumbu kimvwama yayi ya mbote yina ba pesá nge na nzila mpeve ya santu yina ke zingá na kati ya beto .’ (2 Tim. 1:14) Yinki vandá kimvwama yango? Wapi kima ya valere yina Timote zolá bumba? Na verse 13, Paul zonzilá ‘mambu ya mbote,’ mambu ya Nzambi yina ke na kati ya Biblia. (2 Tim. 1:13) Samu Timote vandá mukristo, yandi zolá longa mambu ya Nzambi na bampangi ya yandi na kati ya kimvuka mpe na bantu ya nkaka na kati ya teritware. (2 Tim. 4:1-5) Dyaka, Timote vandá kuluntu na kati ya kimvuka, na yawu, yandi zola kipe mameme ya Nzambi. (1 Pi. 5:2) Timote zolá bumba mambu ya Nzambi yina yandi vandá longa. Samu na kusala yawu, yandi zolá tula konfianse ya yandi nyonso na mpeve ya Yehova mpe na mambu ya Biblia.—2 Tim. 3:14-17.

Bubu yayi mpe beto zola bumba mambu ya Nzambi yina beto ke precheke na bantu ya nkaka. (Mat. 28:19, 20) Beto zola zimbana ve valere ya mambu ya Biblia yina beto ke longá. Na yawu, beto zolá kontinye kusambila mpe kulongoka Biblia ntangu nyonso. (Rom. 12:11, 12; 1 Tim. 4:13, 15, 16) Beto lenda sosa mpe kusala mingi samu na kukuma kuluntu na kati ya kimvuka to pionier. Baresponsabilite yayi zola nata beto na kuvanda dyaka ya kukuluka mpe na kutula konfianse ya beto nyonso na Nzambi. Kaka ni faso yayi beto lenda bumba mambu ya Biblia na bantima ya beto.

Baresponsabilite yina Timote kuzwá vanda ve kaka ya yandi mosi. Bantu ya nkaka mpe zola kuzwa yawu. Ni mambu yango mpe Paul zonzá na Timote: ‘Mambu yina nge kuwá na munu, [. . .], pesa yawu na babakala yina ke ya kukangama na Nzambi, samu bawu mpe, vandá na ngolo ya kulonga yawu na bantu ya nkaka.’ (2 Tim. 2:2) Paul lombá na Timote na kulonga mambu nyonso yina yandi longá yandi na bantu ya nkaka. Bubu yayi, ya ke mbote na bakuluntu ya bimvuka nyonso na kulanda ekzample yayi. Kuluntu ya mbote lenda bumba ve samu na yandi mosi, mayela ya kusala kisalu. Kasi, yandi ke longa bampangi ya nkaka samu ba kuma na ngolo ya kusala kisalu. Yandi ke ve na boma ti ba zaba mambu mingi to ba lutila yandi na faso ya kusala kisalu. Na yawu, yandi lenda longa ve bamambu na zulu-zulu. Yandi zola ti ba yina yandi ke na formeke, kulisa mayela ya bawu mpe ba kula na kimpeve. Na faso yina, ‘babakala ya kukangama na Nzambi’ yina yandi me longa, ke vanda na ngolo ya kusadisa kimvuka na faso ya kulutila.

Ya vrai, Timote zolá lettre yina Paul filisá yandi. Beto lenda zonza ti, yandi vanda baka ntangu ya kutanga lettre yango bambala mingi samu na kutala faso ya mbote ya kusadila bakonseye yina ba pesak’ yandi na kisalu ya yandi.

Beto mpe zolá tula bakonseye yayi na bantima ya beto. Samu na yinki? Beto lenda sala bangolo samu tiya ya beto na kisalu ya Yehova vanda kaka ngolo, samu na kubumba mambu ya Nzambi na bantima ya beto mpe samu na kukabula mayela mpe mambu yina beto zaba na bampangi ya beto. Si beto sala yawu, kaka faso Paul zonzá na Timote, beto lenda ‘lungisa mbote-mbote kisalu ya beto’—2 Tim. 4:5.