NGAPI o lizuvhu apa kaume koge a ku pe mbilive zekorangedo? Paurusa kwa tjangerere Timoteusa mbilive zekorangedo, mbilive ozo kuna kara Timoteusa gwauvali. Timoteusa kwa here kuresa nokudiva eyi ana hara kumutantera kaume kendi. Nampo Timoteusa kwa lipulire asi: ‘Ngapi Paurusa ana karere? Ana kara ko nomagano ana hara kutantera nge omu nani rugana sirugana sange ndi? Mbilive ezi, nazi vatera nge mosirugana sange sokuzuvhisa nokuronga ntani nokuvatera wopeke ndi?’ Ngomu natu ka yi resa, Timoteusa ga gwene malimbururo komapuro ogo ntani nayimwe hena yoyinzi mombilive ezi. Nye ngesi tatu ka demenena koyitwa yimwe ya kara mombilive ozo eyi nayi tu vatera.

Apa Timoteusa ga resere nonkango dokuhova mombilive, age ga dimbwilire elikwatakano lyenene eli ga kere nalyo naPaurusa. Paurusa kwa tumbwire Timoteusa asi “munwange ogu na hara.” (2 Tim. 1:2) Timoteusa nampo kwa kere nonomvhura 30 ngoso apa ga gwene mbilive ezi koyiha yomvhura 65 ntani age ga kere nare noudivi mosirugana sendi soukuronambunga. Age nga kara-kara naPaurusa ure wonomvhura 10 ntani yinzi ga lirongerere ko kwendi.

Timoteusa ya mu korangedere pokudiva asi Paurusa kuna kulididimikira maudigu noulimburukwi. Paurusa kwa kere monomango modorongo ntani kwa ndindilire va mu dipage. (2 Tim. 1:15, 16; 4:6-8) Timoteusa ga mwene uradi ou ga kere nawo Paurusa, morwa Paurusa kwa uyungire asi: “Ame yiyo ani didimikire mwanayinye.” (2 Tim. 2:8-13) Ngwendi Timoteusa, kulididimikira kwaPaurusa nose kuvhura kutunkondopeka.

Paurusa kwa korangedere Timoteusa a tare sirugana sendi somombunga asi mulyo. Ntani Paurusa kwa here Timoteusa a “hwamenene uhwi wonkenda” ou ga kere nawo. (2 Tim. 1:6) Paurusa kwa ruganesere nkango khaʹri·sma ezi azi tanta asi “uhwi.” Nkango ozo zoRugereka kutamba kouhwi wonkenda ntani kuugwana mawoko-woko. Timoteusa kwa gwene uhwi ou apa va mu pere  situmbukira sokupakera mbili mbungakriste.—1 Tim. 4:14.

Yisinke ga hepere kurugana Timoteusa nouhwi owo? Apa ga resere nkango ozo asi ‘hwamenena,’ age nampo ga gazarere kuhamena mundiro ogu ava ruganesa membo. Mokuninka asi mundiro gu twikire kuhwama va hepere kutura ko yitare. Bukenkango zimwe kwa uyunga asi nkangorugano zoRugereka (a·na·zo·py·reʹo) ezi ga ruganesere apa Paurusa kutanta asi “kutwera, kuhwama, kudumuka,” yipo nye, eyi kutanta asi kwa hweme pampepo. Paurusa ngwendi kwa tanterere Timoteusa asi: ‘Fira po posirugana soge!’ Nose naina twa hepa kurugana yokulifana, twa hepa kulitura mo unene mosirugana setu.

Ngomu Timoteusa ga twikilire kuresa mbilive zina, age ga gwene nonkango dimwe edi da mu vaterere yi mu tompoke mosirugana sendi sokuzuvhisa. Paurusa kwa tjenge asi: ‘Yininke yoyiwa eyi ya ku tumbukira, yi pungwisa kompepo zokupongoka ezi za kara mwetu.’ (2 Tim. 1:14) Yininke musinke oyo? Yisinke va mu pere Timoteusa? Movelise 13, Paurusa kwa tembe ‘kononkango donongwa,’ ndi kousili ou wa kara moMatjangwa. (2 Tim. 1:13) Ngomuzuvhisi, Timoteusa ga hepere kuronga usili mombungakriste ntani ponze zombungakriste. (2 Tim. 4:1-5) Ntani hena, age kwa mu horowere a kare mukuronambunga yipo a takamese siunda saKarunga. (1 Pet. 5:2) Yininke yoyiwa eyi ya tumbukilire Timoteusa kwa kere usili ogu nga rongo, pokuhuguvara mompepo zokupongoka zaJehova ntani nomoNonkando dendi.—2 Tim. 3:14-17.

Naina, nose va tu pa usili ou twa hepa kuronga wopeke mosirugana sokuzuvhisa. (Mat. 28:19, 20) Mokulikida rupandu kousili ou twa gwana, twa hepa kukanderera nkenye apa ntani nokulironga Nonkango daKarunga. (Rom. 12:11, 12; 1 Tim. 4:13, 15, 16) Nose kuvhura tu gwane yitumbukira ngwendi kukara mukuronambunga ndi kurugana sirugana sosiruwo nasinye. Ngano tu linunupike ntani nokuhuguvara mevatero lyaKarunga eli a tu pe. Yipo nye, ose kuvhura tu takamese yininke eyi ya tu tumbukira pokuhuguvara mwaJehova.

Timoteusa ga hepere kudeura wopeke va dive kurugana sirugana esi nga rugana age. Eyi yiyo Paurusa ga korangedere Timoteusa asi: “Nonkango edi wa zuvha kwange . . . , di gava kovagara wokuvhura kuhuguvara, nawo ngava vhure hena kudironga vakwaawo.” (2 Tim. 2:2) Yipo nye, Timoteusa ga hepere kuronga Vakriste vakwawo yininke eyi ga lirongere ntani nokulirongera ko kwawo. Ayo ya kara nomulyo kwankenye mupitisili gomombungakriste a rugane yokulifana. Mupitisili gomuwa kapi a kara nomfudu, age kuronga ko wopeke sirugana esi ga diva. Nye age kuvaronga yipo nawo ngava vhure kurugana sirugana oso. Ntani kapi a lizuvhu asi kuvhura ngava mu pite moudivi wokusirugana. Yipo nye, kapi a rongo tupu madi gosirugana, nye age kuvadeura va kare nonondunge nounongo, yipo va kure pampepo. Monkedi zangoso, ‘vagara wokuvhura kuhuguvara’ ava ga deura ngava vhura kuvatera mbungakriste momunene.

Yosili, Timoteusa ga haferere mbilive ezi ga gwene kwaPaurusa. Gazara tupu omu ga rugurukire kuresa mapukururo gombilive zina ntani nokuteda ko omu naga sikisa mo mosirugana sendi.

Nose ngano tu ture pasirugana mapukururo ogo. Ngapi natu yi rugana? Tu litureni mo unene mokuhwama ngwendi mundiro, nokutakamesa eyi ya tu tumbukira ntani nokudeura wopeke nawo va dive eyi twa diva. Nsene tu yi rugana oyo, ose ngatu ‘sikisa mo sirugana setu’ ngamoomu Paurusa ga tanterere Timoteusa.—2 Tim. 4:5.