INO mulalinyumfwa buyani na mwatambula nkalata iyuminisha kuswa kumubyaanu? Shikwiiya Timoti wakatambulawo nkalata ya mushobo uyu kuswa ku mutumwi Paulo. Iyi ni nkalata njotwiita ayi libuku lya 2 Timoti. Ncakutatoonsha kwaamba ayi Timoti wakacana musena kutaakuwo kuyobeka akutalika kubelenga nkalata iyi. Mpashi Timoti wakalinga kuyeeya ayi: ‘Ino Paulo atoobuka buyani? Sa kuli nshaasuni kundwiita sha mbweenga ndasebensa ncito njondakapekwa? Sa makani ali munkalata iyi inga ancafwa kusebensa kabotu muncito yakushimikila akucafwa bamwi?’ Bweenka mbweshi twiiye, Timoti wakacana shikumbulo kumiipusho iyi alimwi amakani amwi ayandika munkalata iyi. Mumutwi uyu tutokwiiya pamakani amwi ayandika ngeenga tweeya kuswa munkalata iyi.

Timoti ndyaakatalika kubelenga maswi akutalikila munkalata iyi, wakabona Paulo mbwaakalinga kumusuni abuumbi. Paulo wakalinga kwiita Timoti ayi “omwanaangu usunikwi.” (2 Timo. 1:2) Nabi kwaamba ayi mpashi Timoti wakalinga kucite myaaka yamuma 30 ndyaakatambula nkalata iyi cakuma 65 C.E., kaali wasebensa kale mbuli munene mulibungano kwa myaaka iinji. Wakasebensa a Paulo kwa myaaka iindilila 10 alimwi wakeeya shiinji abuumbi.

Cilyeelete kwaamba ayi Timoti wakayuminishikwa abuumbi kushiba kwaamba ayi Paulo wakatolelela kuliyumya cakushomeka mumapensho. Paulo wakalinga waangwa ku Loma alimwi wakalinga kulangila kucaikwa ciindi cili coonse. (2 Timo. 1:15, 16; 4:6-8) Timoti wakabona kwaamba ayi mutumwi Paulo wakalinga muntu utaloondi ndyaakabelenga maswi akaamba Paulo munkalata ayi: “Ndatolelela kuliyumya mushintu shoonse.” (2 Timo. 2:8-13) Bweenka mbuli Timoti, aswebo inga tweeyako kuswa kucakubonenaako cibotu cakwe Paulo cakuliyumya.

Paulo wakayuminisha Timoti kunoobona ncito Lesa njaakamupa kuba iyandika abuumbi. Wakalinga kusuni ayi Timoti ‘acisonsele anga ngu mulilo cipo cakamupa Lesa’ cakalinga muli nguwe. (2 Timo. 1:6, NWT.) Paulo wakasebensesha liswi lyamuci Giliki lya khaʹri·sma lyaamba “cipo.” Liswi ili lilasansulula cintu ncowakapekwabo alimwi ncootana kusebensela. Timoti wakatambula cipo ici ndyaakapekwa ncito ilibetele yakwiimikaninaako mabungano.​—1 Timo. 4:14.

 Ino Paulo wakalinga kuyuminisha Timoti kucita buyani? Ndyaakabelenga maswi akwaamba ayi ‘ucisonsele anga ngu mulilo,’ alyeelete wakayeeya pamulilo wa nkuni mbweenga wacileka kubilima na tamutousonsela. Mulyeelete kutolelela kusonsela kwaamba ayi mulilo utolelele kubilima. Dikishonali imwi ilaamba ayi liswi lyamuci Giliki Paulo ndyaakasebensesha lyakwaamba ayi a·na·zo·py·reʹo, lilasansulula “kubusha cimwi cintu na kusonsela mulilo kwaamba ayi ubilime,” aboobo liswi ili lilasansulula “kukondwa kucita cintu cimwi alimwi akusebensa cankusu.” Aboobo kweelana aliswi ili mbolisansulula, inga twaamba ayi Paulo wakalinga kulwiita Timoti ayi: ‘Ubikemo moyo woonse muncito njowakapekwa!’ Munshiku shino aswebo tulyeelete kukonkela makani Paulo ngaakalinga kuyuminisha Timoti, nkokwaamba ayi kunosebensa cankusu muncito yesu.

Ndyaakatolelela kubelenga nkalata Paulo njaakamulembela, Timoti wakacana maswi aamwi akalinga kusa mukumucafwa kusebensa kabotu ncito yakwe. Paulo wakalemba ayi: ‘Kobamba kabotu shintu shibotu isho nshowakapekwa ayi ulame kwiinda mumushimu usalashi uli mulindiswe.’ (2 Timo. 1:14) Ino nshintu nshi Timoti nshaakapekwa? Muvesi 13 Paulo wakaamba pa “maswi alushinisho,” nkokwaamba ayi cancine camu Malembo akatanjililwa amushimu. (2 Timo. 1:13) Mbuli Mwineklistu, Timoti wakalinga kweelete kwiisha mulibungano alimwi akushimikila cancine muncito yakushimikila. (2 Timo. 4:1-5) Incito imwi Timoti njaakapekwa, nkusebensa mbuli mweembeshi wa mbelele shakwe Lesa mulibungano. (1 Pita 5:2) Kwaamba ayi acikoonshe kulama kabotu cancine ncaakalinga kweelete kwiisha, Timoti wakalinga kweelete kucinka manungo mu Maswi akwe Yehova alimwi amushimu usalashi.​—2 Timo. 3:14-17.

Munshiku shino, aswebo twakapekwa cancine ncotwiisha muncito yakushimikila. (Mate. 28:19, 20) Inga twatondesha ayi tulalumba pacancine ici ciyandika abuumbi ncetwakapekwa na katupaila lyoonse akucita ciiyo ca Baibo capalwesu. (Loma. 12:11, 12; 1 Timo. 4:13, 15, 16) Mpashi twakapekwa amukuli wakusebensa mbuli munene mulibungano na incito yaciindi coonse. Na twapekwa ncito ishi, tulyeelete kuba baliceesha akucinka manungo muli Yehova kwaamba ayi atucaafwe. Aboobo inga twalama kabotu nshotwakapekwa na katushibona kuba shiyandika alimwi akucinka manungo muli Yehova kwaamba ayi atucaafwe.

Pancito Timoti nshaakapekwa pakalinga anciito yakwiisha bamwi bwakusebensa ncito njaakalinga kusebensa. Nceceeco Paulo ncaakalwiitila Timoti ayi: “Shintu nshowakanyumfwa kuswa kuli ndime . . . ushibike mumaansa abantu bashomeka, kwaamba ayi abalo beelele cancine kwiisha bamwi.” (2 Timo. 2:2) Ncakwiila Timoti wakalinga kweelete kwiishako basankwa Beneklistu shoonse nshakaiishikwa. Ncintu ciyandika abuumbi kwaamba ayi bamanene boonse mulibungano lya Bwineklistu banookwiisha bamwi incito. Munene uli kabotu alaiishako bamwi nshakeeya pancito njaasebensa. Alabaiisha shoonse kwaamba ayi abalo bakanoosebensa kabotu. Tayeeyi ayi abo mbatokwiisha balaakwiiya shiinji kwiinda nguwe na kuyeeya ayi balaakunoosebensa kabotu ncito kwiinda mbwaakalinga kusebensa. Alyeelete kubaiisha kwaamba ayi babe bashimpite lwakumushimu. Na wacita boobo ‘basankwa bashomeka’ abo mbaakalinga kwiisha balaakunoocafwilisha abuumbi mulibungano.

Ncakutatoonsha kwaamba ayi Timoti wakalinga kwiisuni abuumbi nkalata iyuminisha njaakatambula kuswa kuli Paulo. Inga twayeeyabo Timoti mbwakalinga kwiibelenga ciindi aciindi alimwi akuyeeya mbweenga wakonkela nshakabelenga kuswa munkalata iyi muncito nshaakalinga kusebensa.

Aswebo tulisuni kukonkela Paulo nshaakalembela Timoti munkalata iyi. Ano ino inga twacita buyani kwaamba ayi tukonkele Paulo nshaakaamba? Tulyeelete kunosebensa cankusu muncito njetwakapekwa, kulama kabotu nshotwakapekwa, alimwi akwiishako bamwi shoonse nshotwakeeya. Na twacita boobo tulaakucikonsha ‘kukumanisha ncito [yesu] cakumaninina’ bweenka mbuli Paulo mbwaakalwiita Timoti.​—2 Timo. 4:5.