Nawˬ haꞈ ve awˬ chawˇ liꞈ bvuhꞈ leh awˬ gʼaˇ peꞈ laˇ ve kʼo, nawˬ hkʼaˬ hkʼe dawˇ tuˬ ve le? Tiˆmoˉseˍ kaꞈ liꞈ chi hkʼe ve Pawˇluꞈ geh gʼa ve yoˬ. Liꞈ chi ve lehˬ 2 Tiˆmoˉseˍ liꞈ hpehꞈ ve yoˬ. Oˇ ve teˇ yanˇ, Tiˆmoˉseˍ Pawˇluꞈ yawˇ htaꞈ aˬ htoꞈ ma bvuhꞈ laˇ ve shiˍ gaˇ leh liꞈ oˇ ve gʼaw tuˬ yawˇ chaw maˇ chehˇ kuiˬ lo kʼai ve yoˬ. ‘Pawˇluꞈ hkʼaˬ hkʼe kʼai le naˍ? Yawˇ chehˇ sha chehˇ˗aw le naˍ? Ngaˬ Gʼuiˬ sha ve kanˉ te kuiˬ hkʼaw yuˬ yehˇ gʼa tuˬ, yawˇ aˬ htoꞈ ma beˆ maˍ laˇ ve le naˍ? Beˆ maˍ laˇ hkawˇ chi ngaˬ Gʼuiˬ sha ve kanˉ hkʼa dehꞈ te gʼa tuˬ ga laˇ ve le naˍ? leh shu htaꞈ hkʼaˬ hkʼe te hkʼa dehꞈ ga piˇ gʼa tuˬ le naˍ?’ tehꞈ teˇ pawˆ pawˆ kʼo, Tiˆmoˉseˍ chi hkʼe dawˇ kaꞈ gʼa ve yoˬ hehˉ. Yawˇ liꞈ chi gʼaw peuˬ htaˇ, yawˇ htawˇ dawˇ nawˬ dawˇ cawˬ ve htaꞈ hkʼawꞈ laˇ hkawˇ gʼa leh awˬ nu ve awˬ lawn kaꞈ na gʼa la ve yoˬ. Chi teˇ hkui beˆ maˍ laˇ hkawˇ ngaˬ hui awˬ pon awˬ bon cawˬ ve teˇ geh nyi sheˍ.

Tiˆmoˉseˍ liꞈ chi teˇ kʼoˆ gʼaw htaˇ, Pawˇluꞈ yawˇ htaꞈ hkʼaˬ hkʼe taw dawˇ haˍ ve shiˍ la ve yoˬ. PawˇluꞈTiˆmoˉseˍ htaꞈ “ngaˬ haꞈ ve yaˇ” tehꞈ kuˬ ve yoˬ. (2 Tiˆmoˉseˍ 1:1) Tiˆmoˉseˍ liꞈ chi teˇ kʼoˆ 65 hkʼawꞈ C.E. htaˇ gʼa ve yoˬ hehˉ. Oˇ ve teˇ yanˇ yawˇ a shaꞈ 30 hkʼawꞈ hpaˆ yoˬ hehˉ. Yaꞈ hkʼaˇ, yawˇ nyi haꞈ shaˉ paˍ te ve awˬ hkʼaˇ shiˍ jaˇ. Tiˆmoˉseˍ Pawˇluꞈ geh Gʼuiˬ sha ve kanˉ 10 hkʼawꞈ hpaˆ te jaw leh yawˇ Pawˇluꞈ geh laiˉ ceuˬ gʼa henˇ ve yoˬ.

Chi teˇ hkui Pawˇluꞈ tuꞈ hkanˍ ve htaꞈ gʼa hpuˇ jaˇ ve htawˇ ka tiꞈ yeˬ ve hkʼaw yeunˇ hkanˍ gʼaˇ ve tehꞈ Tiˆmoˉseˍ shiˍ ve pa taw awˬ gʼaˇ gʼa jaˇ. Pawˇluꞈ Roˉmaꞈ venˇ hkawnˍ hkʼaw chehˇ˗a htaˇ, sho caˆ hpeh ti˗a piˇ leh maˇ maw kʼo yawˇ htaꞈ shu tiˇ pehˍ piˇ tuˬ yoˬ hehˉ. (2 Tiˆmoˉseˍ 1:15, 16; 4:6-8) Tiˆmoˉseˍ Pawˇluꞈ haꞈ hanˉ ve hkʼaw kʼoˆ ve htaꞈ yawˇ gʼa mawˬ ve yoˬ. Leh yawˇ kʼoˆ ve, “awˬ ceuˬ hkʼa peu˗eˬ htaꞈ ngaˬ yeunˇ hkanˍ ve yoˬ.” (2 Tiˆmoˉseˍ 2:8-13) Tiˆmoˉseˍ hkʼa shuˍ, Pawˇluꞈ ve awˬ lawn ngaˬ hui ve yonˍ hkʼaˇ awˬ gʼaˇ hehnˇ la tuˬ kaꞈ ga laˇ ve yoˬ.

PawˇluꞈTiˆmoˉseˍ htaꞈ Gʼuiˬ sha geh gʼa ve kanˉ lehˬ awˬ hpfuhˇ hkʼaˆ jaˇ ve tehꞈ shawˍ tuˬ kʼoˆ piˇ ve yoˬ. Pawˇluꞈ Tiˆmoˉseˍ htaꞈ, “nawˬ awˬ hkʼaw lo cawˬ taˍ ve Gʼuiˬ sha ve laꞈ shawnˍ htaꞈ aˬ miˍ gu ceh ve hkʼe hkʼa dehꞈ gu ceh˗oˆ” tehꞈ kʼoˆ piˇ ve yoˬ. (2 Tiˆmoˉseˍ 1:6) Hka˗riˆ·shaꞈ ma Pawˇluꞈ kʼoˆ ve Heˍlaˍsaˆ ve tawˇ hkawˇ tcuhˉ kuiˬ lehˬ “laꞈ shawnˍ” htaꞈ kʼoˆ gaˇ ve yoˬ. Chi lehˬ hkʼe leˇ piˇ ve laꞈ shawnˍ htaꞈ kʼoˆ gaˇ ve yoˬ. Awˬ chawˇ awˬ bon htaꞈ kʼawꞈ te hkʼawꞈ piˇ ve maˇ heˆ leh gʼa ve chaw daꞈ ve kʼawꞈ te hkʼawꞈ piˇ ve htaꞈ kʼoˆ gaˇ ve maˇ  heˆ. Tiˆmoˉseˍ daꞈ jaˇ ve kanˉ te tuˬ leuˆ htaˇ, te puiˉ te hpehꞈ ve awˬ vuiˬ gʼa ve yoˬ.—1 Tiˆmoˉseˍ 4:14.

Tiˆmoˉseˍ yawˇ gʼa ve puiˉ ve hpehꞈ ve htaꞈ hkʼaˬ hkʼe te ve le? ‘Nawˬ awˬ hkʼaw lo cawˬ taˍ ve Gʼuiˬ sha ve laꞈ shawnˍ htaꞈ aˬ miˍ gu ceh ve hkʼe hkʼa dehꞈ gu ceh˗oˆ.’ Chi ve Heˍlaˍsaˆ ve tawˇ hkawˇ tcuhˉ kuiˬ lehˬ “puiˉ ve hpehꞈ ve lehˬ aˬ miˍ gu ceh ve htaꞈ shuˍ ve yoˬ.” Tiˆmoˉseˍ liꞈ chi ve teˇ tawn htaꞈ gʼa gʼaw htaˇ aˉ hkʼaw lo ceh tiˉ yehˇ tuˬ aˬ miˍ shiˉ gʼeuꞈ nyiˉ˗ehꞈ ve htaꞈ dawˇ mawˬ ve yoˬ. Shiˉ gʼeuꞈ chi hkʼe ve lehˬ aˬ miˍ chiˆ tuˬ gʼa kʼawꞈ beˆ tuˉ ve yoˬ. Heˍlaˍsaˆ tawˇ liꞈ kʼoˆ teˇ kʼoˆ hkʼaw kʼoˆ ve, (a˗na˗zo˗hpo˗re˗o) tcuhˉ kuiˬ Pawˇluꞈ kʼoˆ gaˇ ve lehˬ “aˬ miˍ gu ceh ve hkʼe hkʼa dehꞈ gu ceh˗oˆ.” Chi ve lehˬ nyi ma teˇ pawˆ kʼawꞈ pfuhˇ ve htaꞈ kʼoˆ gaˇ ve yoˬ. Chi htaꞈ pa taw, Pawˇluꞈ Tiˆmoˉseˍ htaꞈ ‘nawˬ ve awˬ vuiˬ htaꞈ nyi ma pfuhˇ ve awˬ hkʼaw lo te˗oˆ’ tehꞈ kʼoˆ piˇ ve yoˬ. Chi beuꞈ teˇ co˗e ngaˬ hui kaꞈ Gʼuiˬ sha ve kanˉ te ve hkʼaw nyi ma pfuhˇ leh a shu yawˇ awˬ to awˬ yanˇ gʼa yuˬ taˇ cawˇ ve yoˬ.

Tiˆmoˉseˍ Pawˇluꞈ ve liꞈ kʼawꞈ gʼaw leh yawˇ Gʼuiˬ sha ve kanˉ hkʼa dehꞈ te gʼa tuˬ awˬ gʼaˇ peꞈ laˇ ve teˇ tawn htaꞈ gʼa mawˬ ve yoˬ. Pawˇluꞈ bvuhꞈ ve, “ngaˬ hui awˬ hkʼaw lo chehˇ taˍ ve daꞈ ve kehˬ ve Awˬ ha hpu htaꞈ nawˬ cuˇ leh, nawˬ htaꞈ chiˇ aꞈ laˇ peuˬ ve, daꞈ jaˇ ve awˬ ceuˬ htaꞈ hkʼa dehꞈ haꞈ shaˉ taˍ˗oꞈ.” (2 Tiˆmoˉseˍ 1:14) Tiˆmoˉseˍ awˬ hpfuhˇ hkʼaˆ ve awˬ ceuˬ aˬ htoꞈ ma gʼa ve le? Peuˬ taˉ ve Liꞈ hpu awˬ tawn hkʼaw, “daꞈ jaˇ biˇ jaˇ ve tawˇ hkawˇ” hpehꞈ ve htaꞈ Pawˇluꞈ kʼoˆ ve yoˬ. Chi lehˬ Liꞈ hpu hkʼaw cawˬ ve awˬ tehˬ hpehꞈ ve yoˬ. (2 Tiˆmoˉseˍ 1:13) Tiˆmoˉseˍ Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ awˬ tehˬ ve maˍ piˇ leh yawˇ bon maˍ kuiˬ awˬ ti lo ve chaw htaꞈ htawˇ maˍ piˇ tuˬ awˬ vuiˬ gʼa ve yoˬ. (2 Tiˆmoˉseˍ 4:1-5) Yawˇ htaꞈ nyi haꞈ shaˉ paˍ te tuˬ leuˆ ve awˬ hkʼoˆ kaꞈ, Gʼuiˬ sha ve yawˬ ehˉ htaꞈ hkʼa dehꞈ haꞈ shaˉ tuˬ awˬ vuiˬ gʼa ve yoˬ. (1 Peˍtruˆ 5:2) Tiˆmoˉseˍ Yaˬhoˉvaˬ ve awˬ ha hpu leh Liꞈ hpu htaꞈ cuˇ htaˇ, yawˇ awˬ hpfuhˇ hkʼaˆ jaˇ ve htaꞈ haꞈ shaˉ ve lehˬ, awˬ tehˬ ve yawˇ maˍ ve htaꞈ kʼoˆ ve yoˬ.—2 Tiˆmoˉseˍ 3:14-17.

Chi beuꞈ teˇ co˗e ngaˬ hui kaꞈ awˬ hpfuhˇ hkʼaˆ jaˇ ve htaꞈ gʼa ve lehˬ, shu htaꞈ awˬ tehˬ ve maˍ piˇ ve yoˬ. (Maꞈhtehˍ 28:19, 20) Awˬ tehˬ ve chi awˬ hpfuhˇ hkʼaˬ hkʼe taw hkʼaˆ ve ngaˬ hui maˇ leunˇ tuˬ, ngaˬ hui teˇ hkui teˇ hkui bon lawˬ leh Liꞈ hpu hkʼaˬ htaˆ kaꞈ gʼa henˇ ve yoˬ. (Roˉmaꞈ 12:11, 12; 1 Tiˆmoˉseˍ 4:13, 15, 16) Chi hkʼoˆ kaꞈ, ngaˬ hui awˬ nu ve awˬ vuiˬ kaꞈ gʼa ve yoˬ. Tawˇ pa haˉ te kʼo, chaw teˇ hpaˍ nyi haꞈ shaˉ paˍ maˇ heˆ leh Gʼuiˬ sha ve kanˉ tiˉ awˬ yanˇ hkʼa biˇ gʼa te ve yoˬ. Awˬ hpfuhˇ hkʼaˆ jaˇ ve awˬ ceuˬ chi ngaˬ hui nyi ma nuˇ nehˬ leh Yaˬhoˉvaˬ htaꞈ gʼaˇ va tuˬ te laˇ ve yoˬ. Ngaˬ hui chi hkʼe te ve kʼo, Yaˬhoˉvaˬ Gʼuiˬ sha ngaˬ hui htaꞈ peꞈ laˇ ve awˬ vuiˬ awˬ hpfuhˇ hkʼaˆ jaˇ ve htaꞈ awˬ hpfuhˇ shiˍ ve tehꞈ hpeuꞈ maw piˇ ve yoˬ.

Tiˆmoˉseˍ awˬ nu ve awˬ vuiˬ gʼa ve teˇ ceuˬ lehˬ, shu yawˇ hkʼe te gʼa tuˬ maˍ piˇ ve yoˬ. Awˬ hkʼaˇ chi htaꞈ pa taw, Pawˇluꞈ Tiˆmoˉseˍ htaꞈ kʼoˆ ve, “nawˬ ngaˬ geh gʼa kaˇ taˍ peuˬ ve awˬ ceuˬ teˇ hpaˍ, shu htaꞈ maˍ piˇ puiˉ ve ka tiꞈ yeˬ ve chaw teˇ hpaˍ htaꞈ kʼawꞈ chiˇ aꞈ piˇ˗oˆ.” (2 Tiˆmoˉseˍ 2:2) Tiˆmoˉseˍ gʼa henˇ taˍ ve awˬ ceuˬ teˇ hpaˍ shu htaꞈ maˍ piˇ tuˬ Pawˇluꞈ kʼoˆ piˇ ve yoˬ. Chi beuꞈ teˇ co˗e ve nyi haꞈ shaˉ paˍ kaꞈ coˇ caˇ leh hkʼa shuˍ te cawˇ ve yoˬ. Daꞈ ve nyi haꞈ shaˉ paˍ lehˬ, puiˉ ve hpehꞈ ve maˇ heˆ leh cuˇ yiˍ htaꞈ maˇ veh ti taˍ cawˇ. Yaꞈ hkʼaˇ, yawˇ te ve hkʼa shuˍ awˬ nu ve chaw kaꞈ te gʼa tuˬ maˍ piˇ cawˇ ve yoˬ. Awˬ nu ve chaw yawˇ aꞈ kehˉ cheuˬ tuˬ, yawˇ aꞈ kehˉ shiˍ tuˬ, maˇ heˆ leh yawˇ te ve aꞈ kehˉ te gʼa tuˬ ve htaꞈ yawˇ maˇ kawˆ cawˇ. Chi htaꞈ pa taw, nyi haꞈ shaˉ paˍ lehˬ, kanˉ htaꞈ caˉ daꞈ ve shiˍ keunˍ shiˍ cawˇ ve htaꞈ ceh maˍ piˇ ve maˇ heˆ. Yawˇ maˍ piˇ ve chaw htaꞈ dawˇ nyi piˇ ve, leh awˬ lawn teˇ hpaˍ htaꞈ kaꞈ dawˇ cheˆ gʼa tuˬ maˍ piˇ cawˇ ve yoˬ. Chi ve lehˬ maˍ piˇ ve chaw oˇ ve teˇ gʼaˇ htaꞈ ca ha hpawˇ ve chaw mawˇ hpehꞈ tuˬ ga piˇ ve yoˬ. Chi hkʼe te ve lehˬ, yawˇ maˍ piˇ ve awˬ viˉ awˬ nyi “ka tiꞈ yeˬ ve chaw” Hkriꞈ yaˇ awˬ moˍ hkʼaw awˬ bon cawˬ tuˬ ga piˇ ve yoˬ.

Tiˆmoˉseˍ lehˬ Pawˇluꞈ liꞈ bvuhꞈ piˇ ve htaꞈ dawˇ cawˇ leh awˬ tehˬ awˬ na awˬ hpfuhˇ shiˍ ve yoˬ. Chi ve yawˇ gʼaw peuˬ kaꞈ gʼaw leh maˍ laˇ ve chi yawˇ Gʼuiˬ sha ve kanˉ te ve hkʼaw hkʼaˬ hkʼe yuˬ yehˇ tuˬ dawˇ nyi ve yoˬ.

Ngaˬ hui kaꞈ beˆ maˍ laˇ ve chi hkʼe ve htaꞈ yuˬ yehˇ gaˇ ve yoˬ. Chi ve ngaˬ hui hkʼaˬ hkʼe te gʼa tuˬ le? Chi nyi ma pfuhˇ ve hkʼaw kʼawꞈ te gaˇ tuˬ te laˇ ve yoˬ. Ngaˬ hui htaꞈ peꞈ laˇ ve awˬ hpfuhˇ hkʼaˆ ve htaꞈ haꞈ shaˉ leh ngaˬ hui gʼa hpuˇ jaw ve awˬ lawn leh cuˇ yiˍ shu htaꞈ maˍ piˇ ve yoˬ. Chi hkʼe te ve kʼo, Pawˇluꞈ Tiˆmoˉseˍ htaꞈ, “nawˬ te chehˇ ve kanˉ htaꞈ biˇ la htaˇ hkʼa gaˬ te˗o” tehꞈ kʼoˆ piˇ ve hkʼe, ngaˬ hui kaꞈ te chehˇ ve yoˬ.—2 Tiˆmoˉseˍ 4:5.