MUIKUTWANGA cwañi hamuamuhela liñolo lelisusueza lelizwa ku mulikanaa mina yomutuna? Mulutiwa Timotea naaamuhezi liñolo lelicwalo lene lizwa ku muapositola Paulusi, mi liñolo leo cwale libizwa buka ya 2 Timotea. Kusina kukakanya, Timotea naabatile sibaka sesikuzize ilikuli akone kubala litaba zanaa muñolezi mulikanaa hae yomutuna yo. Mwendi Timotea naaipuzize kuli: ‘Paulusi uzuha cwañi? Kana kunani kelezo yabata kunifa yeka nitusa kupeta hande musebezi onifilwe? Kana uniñolezi litaba zeka nitusa kupeta hande bukombwa bwaka ni kutusa batu babañwi?’ Sina moluka nyakisiseza, Timotea naafumani likalabo za lipuzo zeo ni lipuzo zeñwi zanaanani zona hanaabalile liñolo la butokwa leo. Kono cwale, halunyakisiseñi lisupo lisikai za butokwa zelukona kuituta mwa liñolo leo.

Timotea hanaakalile kubala litaba za makalelo za liñolo leo, honafo feela naalemuhile kuli Paulusi naamuisa pilu luli. Paulusi naamubizize kuli “mwanaka yalatwa.” (2 Tim. 1:2) Nihaike kuli Timotea naali mwa lilimo za ma 30 hanaaamuhezi liñolo leo ibato ba ka 65 C.E., naasaabile muuna-muhulu mwa puteho ka nako yetelele. Naasebelize ni Paulusi ka lilimo zefitelela zelishumi mi naaitutile zeñata ku yena.

Kubonahala kuli Timotea naasusuelizwe hahulu hanaazibile kuli Paulusi naazwelapili kuitiisa ka busepahali hanaakopana ni nyandiso. Paulusi naatamilwe ka mawenge kwa Roma, mi naatuha abulaiwa. (2 Tim. 1:15, 16; 4:6-8) Timotea naalemuhile kuli Paulusi naanani bundume, hanaañozi kuli: “Nizwelapili kutiyela lika kaufela.” (2 Tim. 2:8-13) Sina Timotea, ni luna lwakona kususuezwa ki mutala omunde wa Paulusi wa buitiiso.

Paulusi naasusuelize Timotea kuunga musebezi wanaafilwe mwa sebelezo yahae ku Mulimu kuba wa butokwa hahulu. Paulusi naabata kuli ‘mpo ya Mulimu yeneinzi ku yena [Timotea] . . . aikoteze sina mulilo.’ (2 Tim. 1:6) Paulusi naaitusisize linzwi la Sigerike la khaʹri·sma kutalusa “mpo.” Linzwi la Sigerike leo litalusa mpo yefiwa feela, yesika sebelezwa kamba mane yesaswaneli kufiwa mutu. Timotea naafilwe mpo yecwalo hanaaketilwe kusebeleza puteho ka nzila yeipitezi.—1 Tim. 4:14.

 Ki lika mañi zanaaswanela kueza Timotea ka za mpo yeo? Mwendi hanaabalile manzwi a kuli “uikoteze sina mulilo,” naanahanile za mulilo obatumbulanga batu kwa mandu, ili wo fokuñwi ubanga feela mashala atuka. Mashala ao atokwanga kukotezwa kuli mulilo ukone kutuka hape. Dikishinari yeñwi italusa kuli linzwi la Sigerike lelitalusa kezo (a·na·zo·py·reʹo) lanaaitusisize Paulusi litalusa “kutukisa hape kamba kufuzela mulilo.” Kacwalo, naatalusa kueza musebezi omuñwi ka taata ni ka kutukufalelwa. Ka kuitusisa linzwi leo, Paulusi zanaabulelela Timotea luli ki ze: ‘Uise pilu kwa musebezi oufilwe!’ Ni luna kacenu, luswanela kueza musebezi waluna ka kutukufalelwa.

Timotea hanaazwelapili kubala liñolo lene lizwa ku mulikanaa hae yomutuna yo, afumana manzwi amañwi anaaka mutusa kukondisa mwa bukombwa bwahae. Paulusi naañozi kuli: “Usileleze nto ya butokwa yende ye, ka moya okenile oinzi ku luna.” (2 Tim. 1:14) Ki nto mañi ya butokwa yeo yanaafilwe Timotea? Mwa timana 13, Paulusi naabulezi za “manzwi amande,” yona niti yefumaneha mwa Mañolo. (2 Tim. 1:13) Bakeñisa kuli Timotea naali Mukreste, naatokwa kuluta niti mizwale ni likaizeli mwa puteho ni batu bane basazibi niti. (2 Tim. 4:1-5) Hape Timotea naaketilwe kusebeza sina muuna-muhulu kuli alise mutapi wa Mulimu. (1 Pit. 5:2) Timotea naaswanela kusileleza nto ya butokwa yanaafilwe, yona niti yanaatokwa kuluta batu, ka kuitinga kwa moya wa Jehova okenile ni Linzwi lahae.—2 Tim. 3:14-17.

Kacenu, ni luna lufilwe musebezi wa kuluta batu niti. (Mat. 28:19, 20) Lubonisa kuli lwaitebuha niti yelufilwe yeo ka kutundamena kulapela ni kuituta Linzwi la Mulimu kamita. (Maro. 12:11, 12; 1 Tim. 4:13, 15, 16) Mwendi hape lufilwe buikalabelo bobuñwi bwa kusebeza sina muuna-muhulu mwa puteho kamba kuba mwa sebelezo ya nako kaufela. Haiba lufilwe musebezi ocwalo, luswanela kuba ni buikokobezo, ni kukupanga Mulimu kuli alutuse kueza hande musebezi olufilwe. Haiba lueza cwalo, lukabonisa kuli lwaitebuha nto ya butokwa yalufile Jehova.

Timotea naatokwa kuluta batu babañwi musebezi wanaafilwe. Ki lona libaka Paulusi hanaa mususuelize kuli: “Lika zene uutwile ku na . . . ulife kwa batu babasepahala, ili babaka kona hande kuliluta babañwi hape.” (2 Tim. 2:2) Kaniti, Timotea naaswanela kuluta mizwale ni likaizeli bahae zanaaitutile, mi ni yena naakaituta ku bona. Baana-bahulu kaufela mwa puteho kacenu ni bona baswanela kulika ka taata kueza nto yeswana. Muuna-muhulu yomunde haabatangi kuipulukela zibo yanani yona ka za musebezi omuñwi mwa puteho. Kono walutanga babañwi ilikuli ni bona bakone kueza musebezi oswana. Hanahanangi kuli haiba aeza cwalo, batu bao bakaziba hahulu musebezi wo kamba kueza hande musebezi wo kumufita. Kacwalo, muuna-muhulu haana kubaluta feela litaba zenyinyani ka za musebezi wo. Kono ubata kuli bahasanyi baluta musebezi babe ni temuho ni kuziba mwakuezeza likatulo zende, fo kikuli babe Bakreste babanani yeloseli. Kueza cwalo kukatahisa kuli “batu babasepahala” balutile musebezi bao bakone kutusa hande puteho.

Kusina kukakanya, Timotea naaitebuhile hahulu liñolo lelisusueza lene lizwa ku Paulusi. Mwendi naalibalile hañata-ñata, kunahanisisa kelezo ya butokwa yanaafilwe, ni kubona mwaku isebeliseza hanzaa peta buikalabelo bwahae.

Ni luna luswanela kusebelisa kelezo yefumaneha mwa liñolo leo. Lukona kueza cwañi cwalo? Ka kulika molukonela kaufela kukoteza mpo yaluna sina mulilo, kusileleza nto ya butokwa yelufilwe, ni kuluta babañwi lika kaufela zeluziba. Haiba lueza cwalo, sina feela mwanaabulelezi Paulusi ku Timotea, “[lukapeta] bukombwa [bwaluna] ka kutala.”—2 Tim. 4:5.