LELO wiivwananga namani shi mulunda nobe muyampe wakutumina mukanda? Temote mwanā bwanga mwine Kidishitu, nandi bāmutumīne mukanda kudi mutumibwa Polo, mukanda otuyukile dyalelo bu mukanda wa mu Bible wa 2 Temote. Bine, Temote wākimbile kifuko kiyampe kwa kutangila bintu byānenene’mo mulunda nandi. Padi Temote wādi wiipangula’mba: ‘Le Polo udi namani? Le udi na madingi a kundingila, a kunkwasha mu mwingilo wami? Le uno mukanda ubwanya kunkwasha ñingile biyampe mwingilo wami wa bwine Kidishitu ne kukwasha bakwetu?’ Monka motusa kwikimwena, Temote wātene malondololo ku bino bipangujo ne bikwabo bivule mu uno mukanda wa mvubu. Ino pano’ko bidi, twisambilei pa madingi amoamo a kamweno adi mu uno mukanda.

Pādi patanga Temote binenwa bya ku ngalwilo kwa uno mukanda, kābudilwepo kujingulula’mba Polo i mulunda nandi wa bine. Polo wāmwityile na nsangaji bu “mwana muswedibwe.” (2 Tm. 1:2) Nansha Temote byaādi padi na myaka 30 ne kupita kitatyi kyobāmutumīne uno mukanda dya mu 65 Yesu Ke Mwiye, wādi kala ke mukulumpe mwine Kidishitu wa bwino. Wādi kala ke mwingile na Polo mu myaka dikumi ne musubu kadi wādi ke mwifunde bintu bivule.

Temote kābudilwepo kukankamana pa kwivwana’mba Polo wādi ūminine kupangwapangwa na kikōkeji. Polo bādi bamukute na miyololo mu Loma, utengēle kwipaibwa. (2 Tm. 1:15, 16; 4:6-8) Temote wādi ubwanya kumona bukankamane bwa mutumibwa paālembele amba: “Ñumininanga bintu byonso.” (2 Tm. 2:8-13) Pamo bwa Temote, kimfwa kiyampe kya Polo kya kūminina kibwanya netu kwitukomeja.

Polo wāsoñenye Temote amone dyese dyaādi nadyo mu mwingilo wa Leza bu dya mvubu mpata. Polo wādi usaka Temote ashinsakanye “pamo bwa mudilo kyabuntu kya Leza” kyaādi nakyo. (2 Tm. 1:6) Polo wāingidije kishima kharisma kyalamwinwe bu “kyabuntu.” Kino kishima kya Kingidiki kifunkila nakampata pa kyabuntu kya ku bitupu nansha kya ku buntu bitupu. Temote wātambwile kino kyabuntu kitatyi kyaātongelwe kwingila mu kipwilo mwingilo wa pa bula.​—1 Tm. 4:14.

 Le Temote wādi wa kulonga bika na kino kyabuntu? Paātangile binenwa bya amba, ‘shinsakanya pamo bwa mudilo,’ padi wāvulukile mudilo wikalanga na bantu mwinjibo, mudilo wa makala obekalanga nao kyaba kimo. Ano makala afwaninwe kushinsakanibwa pa kwaka lubimbi ne kuleta kyanga kivule. Dikishonele dimo dinena’mba, kyubwa kya Kingidiki (anazopyreo) kyāingidije Polo kishintulula “kusonshila, kukabija, kwakija lubimbi,” ko kunena mu muswelo wa kyelekejo amba “kusangela ne kupyasakena mwingilo bininge.” Na bubine, Polo wādingile Temote amba: ‘Ingila mwingilo obe na mutyima umo!’ Ubwanya padi kusangala pa kuyuka’mba, dyalelo netu tufwaninwe kulonga uno muswelo—kutakamana mu mwingilo wetu na bupyasakane.

Pawāendelele kutanga mukanda wāmutumīne mulunda nandi, Temote wātangile binenwa bikwabo byādi bya kumukwasha engile biyampe mwingilo wandi. Polo wālembele amba: “Lama kino kyabulēme kyowapelwe kupityila ku mushipiditu ujila, mwine udi motudi.” (2 Tm. 1:14) Le kino kyaāpelwe i kika? Le i kintu’ka kyabulēme kyaāpelwe? Mu vese ubadikile, Polo wēsambīle pa “binenwa biyampe,” bubine budi mu Bisonekwa. (2 Tm. 1:13) Byaādi mwingidi mwine Kidishitu, Temote wādi ufwaninwe kusapula bubine mu kipwilo ne panja pa kipwilo. (2 Tm. 4:1-5) Kadi Temote wātongelwe bu mukulumpe wa kukumba luombe lwa Leza. (1 Pe. 5:2) Temote wādi ubwanya kulama kyokya kyāmupelwe, ko kunena’mba bubine bwaādi ufwaninwe kufundija, na kukulupila mushipiditu ujila wa Yehova ne Kinenwa kyandi.​—2 Tm. 3:14-17.

Dyalelo, netu twi bapebwe bubine botufundijanga mu mwingilo wa bwine Kidishitu. (Mat. 28:19, 20) Tubwanya kufwija’ko nyeke pa kino kintu kya kutendelwa kitupelwe, na kutakamana mu milombelo ne kwikala na kibidiji kiyampe kya kwifunda Kinenwa kya Leza. (Loma 12:11, 12; 1 Tm. 4:13, 15, 16) Tubwanya kwikala ne na dyese dikwabo dya kwingila bu mukulumpe nansha mwingidi wa kitatyi kyonso. Dino dyese ditupelwe difwaninwe kwitwikadija betyepeje, ne kwitukwasha tukulupile mudi Leza. Nanshi tubwanya kulama, nansha kukinga kyokya kitupelwe na kwikisanswa ne kukulupila’mba Yehova uketukwasha tuvuije’kyo.

Mwingilo obāpele Temote kewādipo umutala bunka bwandi. Wādi utala ne bantu bakwabo. O mwanda Polo wāsoñenye Temote amba: “Bintu byowaivwene kondi . . . pá’byo bantu bakōkele, nabo bakabwanya senene kufundija bakwabo.” (2 Tm. 2:2) Bine, Temote wādi ufwaninwe kwifunda bintu kudi banababo bene Kidishitu ne kwibafundija nandi. I biyampe mutadi yense mu kipwilo kya bwine Kidishitu dyalelo alonge bukomo bwa kwiula Temote. Mutadi muyampe kalekangapo kulombola bakwabo bintu byayukile pa mwingilo umupelwe. Ino ufundijanga bakwabo amba babwanye kwiwingila. Kadipo na moyo wa amba, babwanya kwiuyuka bininge nansha kwiwingila biyampe kumupita. Nanshi, mutadi kafundijangapo bintu bya kulukulu pa mwingilo kampanda. Usakanga kukwasha boba bafundija bekale na mumweno muyampe ne bujinguludi mwa kutamina ku mushipiditu. Mu uno muswelo, “bantu bakōkele” bafundija bakakwasha kipwilo bininge.

Na bubine, Temote wāsangedile bininge mukanda ukankamika wāmutumīne Polo. Tubwanya kumumona mu ñeni utanga kyaba ne kyaba ano madingi a mvubu adi’mo ne kulangulukila pa mwa kwiengidijija mu mwingilo wandi.

Netu tusakanga kwingidija ano madingi. Namani? Tubwanya kulonga bukomo bwa kushinsakanya pamo bwa mudilo kyabuntu kyetu, kulama kyokya kitupelwe, ne kupa bakwetu bwino ne buyuki botudi nabo. Nabya, monka mobāsapwidile Temote kudi Polo, netu tubwanya ‘kuvuija ne pa mfulo mwingilo wetu.’​—2 Tm. 4:5