UNO mweji kwivwanga ngachilihi nge munatambula mukanda wakumikolezeza wakufuma kuli sepa lyenu mwazanga? Chimoteu atambwile mukanda wamuyachou kufuma kuli kaposetolo Paulu. Mukanda kana ukiko vavuluka ngwavo mukanda WaChimoteu wamuchivali. Chimoteu afwililile kuwana chihela chamwaza mangana atangileko mukanda amusonekelelele sepa lyenyi. Pamo alihulishile ngwenyi: ‘Uno Paulu ali ngachilihi? Kutala ali namazu akungukolezeza nguzate kanawa mulimo wami tahi? Uno ou mukanda naungukafwa ngufukile mumulimo wami nakukafwa vakwetu tahi?’ Nganomu namumona, namutachikiza ngwenu vihula kana avikumbulwile omu atangile ou mukanda waulemu ngana. Oloze tuvangilenu kushimutwila havishina vimwe vyavinene vyamumukanda kana.

Omu Chimoteu aputukile kutanga ou mukanda, amwene ngwenyi Paulu amuzangile chikuma. Paulu amuvulukile ngwenyi: “Ove mwanami ngwazanga.” (Chimo. 2, 1:2) Numba tuhu apwile namyaka yakuzomboka 30 halwola atambwile ou mukanda, kafwe mu 65 C.E., oloze apwile mukulwane wakuhya muchikungulwilo. Azachililile hamwe naPaulu hamyaka yakuzomboka 10, kaha alinangwile vyuma vyavivulu kuli ikiye.

Chasoloka nge Chimoteu ajikijile hakwivwa ngwavo Paulu ali akutwalaho kumika chamokomoko naluyando. Paulu apwile mukamenga muLoma, kaha apwile hakamwihi nakumujiha. (Chimo. 2, 1:15, 16; 4:6-8) Chimoteu amwene ngwenyi kaposetolo Paulu apwile wakumika, mwomwo ambile ngwenyi: “Ngweji kukakachilanga muvyuma vyosena.” (Chimo. 2, 2:8-13) Lukakachila lwaPaulu lunahase kutujikijisa nayetu ngana muze lwajikijishile Chimoteu.

Paulu akolezezele Chimoteu amonenga mulimo azachilililenga Kalunga kupwa waulemu chikuma. Amulwezele ‘asambizenga wana amuhanyine Kalunga, mangana ukwate nge kakahya.’ (Chimo. 2, 1:6) Paulu azachishile lizu lyachiHelase khaʹri·sma lize valumuna ngwavo “wana.” Lizu kana lyalumbununa wana wakanyombo, uze kazachilile mutuko, chipwe uze kawamuteleleleko. Chimoteu atambwile ou wana halwola vamutongwele azate mulimo wakulipwila muchikungulwilo.—Chimo. 1, 4:14.

Uno Paulu akolezezele Chimoteu alinge ika? Omu atangile mazu akwamba ngwavo, “usambizenga ukwate nge kakahya,” pamo ashinganyekele hakakahya vapwilenga nakuwika vatu hamembo  kaze lwola lumwe kasalilenga makala kaha. Kakahya kana vatelelelenga kukasambiza mangana kakwate milangi. Ndikishonali yimwe yamba ngwayo, lizu lyachiHelase lyakwamba ngwavo a·na·zo·py·reʹo, lize azachishile Paulu, lyalumbununa “kumunyika cheka chipwe kwepuka milangi.” Shikaho, alizachishile mujila yachifwanyisa, kulumbununa “kuwahilila nakupwa natwima hakuzata mulimo.” Mukavatu, Paulu apwile nakulweza Chimoteu ahake muchima kumulimo wenyi. Nayetu twatela kulinga chuma kana hakuzata mulimo waKalunga natwima.

Omu atwalileho kutanga mukanda vamutuminyine, awanyine mazu akwavo aze amukafwile afukile mumulimo wenyi. Paulu asonekele ngwenyi: “Shipilitu yajila yize yatwama muli etu yikukafwe ulamenga chumechi chamwenemwene.” (Chimo. 2, 1:14) Chuma muka vene echi atambwile Chimoteu? Muvesi 13, Paulu ahanjikile “[ha]mazu amwenemwene” amuVisoneka. Hakupwa muka-Kulishitu, Chimoteu atelelele kunangula muchano vatu vaze vapwile muchikungulwilo navatu veka nawa. (Chimo. 2, 4:1-5) Kaha nawa vamutongwele kupwa mukulwane muchikungulwilo mangana afungenga utanga waKalunga. (Petu. 1, 5:2) Ngocho atelelele kupendamina hashipilitu yaYehova naMazu aKalunga numba alame muchano uze anangwilenga.—Chimo. 2, 3:14-17.

Namakumbi ano vatuhana muchano uze twatela kunangula vatu hakupwa tuvaka-Kulishitu. (Mateu 28:19, 20) Twatela kusolola kusakwilila chetu hamuchano kana, kuhichila mukulombanga naluzema, nakunoneka kanawa lwola lwakulinangula Mazu aKalunga. (Loma 12:11, 12; Chimo. 1, 4:13, 15, 16) Tunahase nawa kupwa namilimo yikwavo yakufwana nge kupwa mukulwane muchikungulwilo chipwe kuzata mulimo washimbu yosena. Kachi nge vanatuhane milimo kaneyi, twatela kupwa vakulinyisa nakupendamina hali Kalunga mangana atukafwe tuzate milimo kana. Ngocho natusolola ngwetu twamona chuma atuhana Kalunga kupwa chachilemu.

Chimoteu apwile namulimo wakunangula vakwavo mulimo uze azachilenga. Chikiko chalingishile Paulu amukolezeze ngwenyi: “Vyuma vize wevwile kuli ami, . . . valwezevyo vatu vakushishika vaze navakatamo kunangula vakwavo nawa.” (Chimo. 2, 2:2) Shikaho atelelele kunangula vakwavo vyuma vize vamunangwile. Namakumbi ano, chapwa chachilemu tulama muvikungulwilo kulinganga mwomumwe. Kalama wamwenemwene kevwila vakwavo lwiso nakuhona kuvanangula mwakuzachila mulimo uze atachikiza ikiyeko. Oloze eji kuvanangulanga mangana navakiko vatengamo kuuzata. Kashinganyeka ngwenyi nge mwavanangula kaha navatachikiza vyuma vyavivulu kuhambakana ikiyeko. Shikaho, kalama kanangula vakwavo vyuma vyaheluheluko, oloze eji kuvakafwanga vatachikize vyavivulu nakuzovoloka kushipilitu. Nge kalama mwalinganga vyuma kana, kaha “vatu vakushishika” vaze mwanangula navanganyalisa chikungulwilo.

Chikupu vene, Chimoteu amwene mukanda amutuminyine Paulu kupwa waulemu. Achishinganyekenu ali nakutanga mukanda kana mapapa kakavulu nakushinganyeka mwakuzachishila vyuma vasonekamo hakuzata mulimo wenyi.

Nayetu twatela kuzachisa vyuma vasoneka mumukanda kana. Mujila muka? Tunahase kulinga ngocho hakusambiza wana wetu nge kakahya, nakulamanga chuma chize vatuhana, nakunangulangako vakwetu vyuma twatachikiza. Nge natulinganga vyuma kana, kaha ‘natutesamo kanawa mulimo wetu,’ ngana muze Paulu alwezele Chimoteu.—Chimo. 2, 4:5.