MWATIYAÑA ñahi neyi ibwambu denu yayitemeshela mukanda wakuyikolesha? Timotewu watambwilili mukanda wamuchidiwu kufuma kudi kapostolu Pawulu, mukanda waTimotewu wamuchiyedi. Chakadi nikujina, Timotewu wakeñeleña kwiluka mazu amusonekeleliwu kudi ibwambu dindi. Hadaha Timotewu watoñojokeleña nindi: ‘Kwiji Pawulu wudi ñahi? Komana nasoneki kulonda yankoleshi kutalisha hamudimu wami? Komana iwu mukanda wunateli kunkwasha kushimwina nikutañisha chiwahi nawa nikukwasha antu? Neyi chitukumona, Timotewu wawanini ñakwilu yanawa malwihu ninsañu yikwawu yalema muniwu mukanda. Ilaña chayinu mpinji, lekenu tushinshikenu hayikuma yantesha yinateli kutukwasha yidi muniwu mukanda.

Chelili Timotewu yatachiki kutaña mazu akutachikilahu muniwu mukanda washikeneni dakwiluka nindi Pawulu wamukeña chikupu. Pawulu wamuteneni Timotewu nindi, “mwana wakeñewa.” (2 Tim. 1:2) Timotewu watambwilili iwu mukanda kwakwihi na 65 C.E. Chakadi nikujina wadiña nayaaka 30 nikubadikahu nawa wadiña mukulumpi mukwaKristu wapama. Wazatili nakapostolu Pawulu hadi yaaka kubadika ha 10 nawa welukili yuma yayivulu.

Timotewu wakolesheweli chelukiliyi nindi Pawulu natwalekihu kuumika hela chakwila nakumona kukala kwakuvulu. Pawulu amukasili muRoma nawa wadiña kwakwihi nakufwa. (2 Tim. 1:15, 16; 4:6-8) Timotewu wamweni nindi Pawulu wadiña wahamuka muloña Pawulu wahosheli nindi: “Natwalekañahu nakuumika yuma yejima.” (2 Tim. 2:8-13) Kufwana Timotewu, chomikiliyi Pawulu chinateli kutukwasha ninetu kuumika.

Pawulu wamulejeli Timotewu kumonaña mudimu wamukalakeleleñayi Nzambi nindi himudimu walema nankashi. Pawulu wakeñeleña Timotewu ‘kusañumuna neyi kesi’ “chawaana chaNzambi” chadiña mudi yena. (2 Tim. 1:6) Pawulu wazatishili izu dachiGiriki dakhaʹri·sma kutalisha ‘kuchawaana.’ Idi izu dachiGiriki datalisha kuchamukunkulu hela kuluwi lwasweja. Timotewu watambwilili ichi  chawana hampinji yamutondeliwu kwakamena chipompelu.—1 Tim. 4:14.

Pawulu wamukolesheli Timotewu kwiladi nanichi chawana? Chatañiliyi mazu akwila nawu “wuchisañumuni neyi kesi” watoñojokeli hakesi kazatishileñawu antu hamatala, kashalaña mpinji yikwawu kwamakala hohu. Awa makala adiña nakuyisañumuna kulonda kesi katachiki kubutuka. Dikishonali yimu yahosha nawu izu dachiGiriki da (a·na·zo·py·reʹo) dazatishiliyi Pawulu datalisha “kupepa, kuvukuta kulonda hatuñi nyizuzu,” dikwila nawu “kwikala namuzañalu niiyena dakuzata mudimu.” Munjila yikwawu Pawulu wamulejeleña Timotewu nindi: ‘Shaku muchima hamudimu weyi.’ Ninetu twatela kwila momumu, dikwila nawu kudikita chikupu mudimu wetu.

Timotewu chatwalekelihu kutaña mukanda wafumini kudi ibwambu dindi, wawanini cheñi mazu amakwawu ateleli kumukwasha. Pawulu wahosheli nindi: “Spiritu yajila yashakama mudi etu yikukwashi kuhemba ichi chuma chachiwahi.” (2 Tim. 1:14) Chadiña chumanyi chenichi? Chumanyi chalema chamwinkeliwu Timotewu? Muvasi yafuminihu, Pawulu wateneneña “mazu amawahi,” chalala chekala muBayibolu. (2 Tim. 1:13) Chineli Timotewu wadiña mukwaKristu wakalakalaña, wadiña namudimu wakutañisha chalala muchipompelu nikushimwina kudi antu. (2 Tim. 4:1-5) Cheñi, Timotewu amutondeli kwikala mukulumpi kulonda yabiñeña nyikoku yaNzambi. (1 Pet. 5:2) Timotewu wahembeli chuma chamwinkeluwu, dikwila nawu chalala chatañishileñayi kuhitila mukushindamena haspiritu yaYehova yajila niIzu Dindi.—2 Tim. 3:14-17.

Makonu ninetu atwinka chalala chitwashimwinaña kudi antu. (Mat. 28:19, 20) Tunateli kumwekesha netu twalemesha ichi chalala chitwadizishaña kuhitila mukulomba mpinji yejima nikudizaña Izu daNzambi. (Rom. 12:11, 12; 1 Tim. 4:13, 15, 16) Hadaha tudi cheñi namudimu wukwawu. Hamwaha tudi akulumpi indi kwiji tudi mumudimu wampinji yejima. Neyi tudi nanyidimu yamuchidiwu, twatela kwikala adizoza nikumushindamena Nzambi kulonda yatukwasheña. Dichi, twatela kuhemba ichi chalala kuhitila mukuchilemesha nikushindamena hadi Yehova kulonda yatukwashi kuchihemba.

Timotewu amulejeli cheñi kudizishaku akwawu mudimu wazatileñayi. Dihafumini Pawulu yamuleji nindi: “Yuma yiwatiyili kudi ami . . . kunjikaku yumiyi kudi antu ashinshika, akushikilamu kudizisha antu amakwawu yumiyi nawa.” (2 Tim. 2:2) Pawulu wamulejeli Timotewu kudizisha amanakwindi yuma yejima yadiziliyi kudi amanakwindi amakwawu. Nimakonu, atulama ejima muchipompelu chawakwaKristu atela kudizishañaku amakwawu. Kalama wamuwahi walejañaku akwawu nyidimu yelukayi, hayihembaña hohu mumuchima windiku. Wayidizishaña akwawu kulonda niwena eluki chakuzata. Wachiinaña wanyi nindi neyi yadizishaku akwawu akumubadikamu. Dichi, hakuminaña hohu dakuyidizisha yuma yanteshaku. Wayikwashaña antu anakudizishayi kulonda ekali nakashinshi, dikwila nawu apami kuspiritu. Neyi ela mwenimu, “antu ashinshika” anadizishiyi akukwasha chipompelu nankashi.

Chakadi nikujina Timotewu watiyili kuwaha naniwu mukanda wamusonekeleliwu kudi Pawulu. Fwikijenu, Timotewu chatañileñayi iwu mukanda mapampa kakavulu nikutoñojoka chiwunateli kumukwasha mumudimu windi.

Ninetu twatela kuzatisha iku kufumba. Munjilanyi? Twatela kuzata nañovu kulonda tusañumuneña chawaana chetu neyi kesi, tuhembaña ichi chuma chachiwahi, nikukunjika yuma yitweluka kudi antu amakwawu. Neyi twila neyi chamulejeliwu Timotewu kudi Pawulu, tunateli ‘kuzata chikupu mudimu [wetu].’—2 Tim. 4:5.