I ṬHIAN ṭha tak hnên aṭanga lehkhathawn lâwmawm tak i dawn hian engtin nge i awm ṭhin? Kristian zirtîr Timothea chuan tirhkoh Paula hnên aṭangin chutiang lehkha chu a dawng a, chu chu tûn laia Bible-a Timothea lehkhathawn pahnihna tia kan hriat hi a ni. Timothea chuan a ṭhian duh tak lehkhathawn chu hmun fianriala chhiar a duh ngei ang. Ani chuan heti hian a ngaihtuah mai thei: ‘Paula hi a dam ang em? Ka chanvo ka thlîr dân chungchângah fuihna min pêk tûr a nei emaw ni le? He lehkhathawn hian ka rawngbâwlnaah leh mi dangte ka ṭanpuinaah hlawhtling tûrin min ṭanpui thei ang em?’ tiin. Ka hriat tûr angin, Timothea chuan chûng zawhnate chhânna bâkah, he lehkhathawn hlu takah hian thil dang tam tak pawh a hmu a ni. Mahse, tûnah chuan he lehkhathawna kan hmuh thurâwn ṭha tak chungchânga thu pawimawh ṭhenkhat chu i lo ngaihtuah ang u.

Timothea’n lehkhathawn tîr lama thute a han chhiar ṭan chuan, Paula nêna an inlaichînna ṭha tak chu a hre nghâl thei ngei ang. Paula chuan ani chu “ka fa duh tak,” tiin nêl takin a koh va. (2 Tim. 1:2) Timothea chu C.E. 64 vêla chu lehkhathawn a dawn lai chuan kum 30 chuang chauh ni mah se, ani chu kohhran upa thiltawn ngah tak a ni tawh a. Paula nên kum sâwm aia tam rawng an bâwl dun avângin a hnên aṭangin thil tam tak a zir a ni.

Paula’n rinawm takin fiahnate a tuar chhuak tih Timothea’n a hriat chuan a chak phah hle ngei ang. Paula chu Rom khuaa tân inah khaidiat buna tihhlum tûrin a awm a. (2 Tim. 1:15, 16; 4:6-8) Tirhkoh Paula’n: “Engkim ka tuar ṭhîn,” tia a sawi avângin huaisenna a neihzia chu Timothea’n a hre thei a ni. (2 Tim. 2:8-13) Timothea angin, keini pawh chhelna kawnga Paula entawn tûr siam ṭha tak aṭangin chakna kan nei thei a ni.

Paula chuan Timothea chu Pathian rawngbâwlnaa a chanvo neih chu ngaihlu hle tûrin a fuih a. Ani chu ‘Pathian thilpêk amaha awm chu chhêm alh tûrin’ a duh a ni. (2 Tim. 1:6) Paula chuan “thilpêk” tih ṭawngkam atân Grik thu mal khaʹri·sma tih chu a hmang a. Chu Grik thu mal awmze dik tak chuan thawh chhuah vâng leh phû vâng ni lova a thlâwn leh phû lo chunga dawn thilpêk a kâwk a ni. Timothea’n kohhran nêna inkûngkaiha mawhphurhna engemaw bîk atâna a inhman khân chu thilpêk chu a dawng a ni.—1 Tim. 4:14.

 Paula chuan Timothea chu, chu thilpêk hmang tûrin engtin nge a fuih? “Chhêm alh tûrin,” tih ṭawngkam a chhiar chuan, ina hman ṭhin mei chu meihawlah a chang mai ṭhîn tih a hre chhuak mai thei a. Chûng meihawlte chu alh reng leh sa reng tûr chuan chhêm a ngai a ni. Dictionary pakhat sawi dân chuan Paula ṭawngkam hman Grik ṭawnga thiltih sawina (a·na·zo·py·reʹo) tih chuan “tithar, tinung leh, chhêm alh,” tih awmzia a neih avângin, “phûr taka thawk” tûra entîr neia a sawina a ni. Dik tak chuan, Paula’n Timothea chu: ‘I chanvo neihah i rilru pe rawh!’ tia fuih ang a ni. Tûn laiah pawh, kan rawngbâwlnaa ṭhahnemngai taka kan thawh a ngaih avângin, chu fuihna avâng chuan kan lâwm hle ngei ang.

A ṭhian duh tak hnên aṭanga a dawn lehkha a chhiar zawm zêl chuan, Timothea chuan a rawngbâwlnaa hlawhtling tûra ṭanpuitu ṭawngkam dang a hmu leh a ni. Paula chuan: “Thil ṭha i hnêna kawltîra awm kha, kan chhûnga thlarau thianghlim awm hianin vawng ṭha rawh,” tiin a ziak a. (2 Tim. 1:14) Chu thil ṭha kawltîr chu eng nge ni? Timothea chuan eng thil ṭha nge a neih? Châng hmasa lamah Paula chuan Pathian Thu aṭanga a hmuh “thu dik dân” chu a hrilh tawh a. (2 Tim. 1:13) Kristian rawngbâwltu a nih angin Timothea chuan thutak chu kohhran chhûngah leh pâwnah a hril tûr a ni a. (2 Tim. 4:1-5) Chu bâkah, Timothea chu Pathian berâmte enkawl tûra kohhran upa nia ruat a ni bawk. (1 Pet. 5:2) Ani chuan Jehova thlarau thianghlim leh a Thu, Bible rinchhanin a hnêna kawltîra awm thutak chu a vawng ṭha thei a ni.—2 Tim. 3:14-17.

Tûn laiah pawh, rawngbâwlnaa mite hnêna kan hrilh thutak chu kawltîr kan ni a. (Mt. 28:19, 20) Ṭawngṭai ziahna leh Pathian Thu ṭha taka zir ziahna hmangin, kan hnêna kawltîra awm he thil ṭha tak avânga kan lâwmzia kan lantîr thei a ni. (Rom 12:11, 12; 1 Tim. 4:13, 15, 16) Kohhran upa emaw, hunbi kima rawngbâwl emaw niin rawngbâwlnaah chanvo dang kan nei pawh a ni thei. Chutiang ang thil ṭha kawltîr kan nihna chuan inngaitlâwm tûr leh Pathian rinchhan duhna nei tûrin min ṭanpui a. Chuvângin, chûng thil ṭha kan kawlte chu ngaihluin leh vawng ṭha tûra Jehova ṭanpuina rinchhanna hmangin kan vênghim tlat thei a ni.

Timothea chanvo dawn chu amah chauhva enkawl tûr a ni lo va. Mi dangte pawh an tel a ni. Chuvângin, Paula chuan Timothea chu heti hian a fuih a ni: “Ka kaa thu i hriatte kha, . . . mi rinawm, mi dangte zirtîr chhâwng thei tûr angte hnênah chuan kawltîr rawh,” tiin. (2 Tim. 2:2) Ni e, a thil zir zawng zawngte chu unau dangte hnêna zirtîr chhâwng leh tûra fuih a ni a. Tûn lai Kristian kohhrana hruaitu zawng zawngte pawhin chutianga an tih chu thil pawimawh tak a ni. Hruaitu ṭha chuan a chanvo dawn nêna inkûngkaiha a thil hriatte chu thîkna avângin mi dangte hrilh lohvin a awm lo vang. Chu aiin, mi dangte pawhin an thawh ve theih nân anni chu an zirtîr zâwk a ni. Mi dangte’n amah aia an hriat zâwk leh an thawh ṭhat zâwk avânga amah an khûm chu a hlau lo vang. Chuvângin, hruaitu chuan hnathawh dân chungchângah anni chu a hming chauhvin a zirtîr hek lo vang a. A zirtîrate chu remhriatna leh hriatthiamna nei a, thlarau lama mi puitling tak ni tûra ṭanpui chu a duh zâwk ngei ang. Chutiang kawng chuan, a zirtîr “mi rinawmte” chu kohhranin nasa takin an hlâwkpui thei a ni.

Timothea chuan Paula hnên aṭanga a dawn chu lehkhathawn chu a hlut hle ngei ang. Fuihna hlu tak a dawnte chu a ennawn fovin, a chanvo neihah a ṭha thei ang bera hman dân tûrte chu a ngaihtuah ngei ang tih kan mitthla thei a ni.

Keini pawhin he fuihna hi nunpui kan duh a. Engtin nge? Thilpêk kan dawnte vawn ṭhat a, kan thil ṭha neihte vênhim leh kan thil hriat zawng zawng mi dangte hnêna theih tâwp chhuaha zirtîr chhâwnna hmangin a ni. Chutiang kawng chuan Paula’n Timothea hnêna a hrilh angin keini pawhin ‘kan rawngbâwlna kan hlen’ thei a ni.—2 Tim. 4:5.