¿WIˈIX mnayjyawëty ko tuˈugë mmëtnaymyaayëbë mduknigexyëty tuˈugë neky mä mmëjääwmoˈoyëty? Duˈunën nyayjyäˈäwë Timoteo ko apostëlë Pablo tyuknigajxë tuˈugë neky, diˈib tyam yajpatp mä Biiblyë ets yajtijy ja myëmajtskpë neky diˈibë Pablo tyuknigajxë Timoteo. Seguurë ko Timoteo jyantsy kyäjpxanë tyäˈädë neky mä kyaj ti naynyaˈamë ets jyantsy nyijawëyan wiˈix jap yˈanëˈëmxëty ja myëtnaymyaayëbë. Ets waˈanë Timoteo nyayajtëëwë: “¿Wiˈixëdaa Pablo yajpääty? ¿Waˈantsëdaa xymyoˈoyaˈany tuˈuk majtskë käjpxwijën wiˈixëts mbäät mas oy ndunyë tyäˈädë tuunk diˈibëts nikëjxmˈäjtypy? ¿Mbäädëtsë tyäˈädë neky xypyudëkë parëts mas oy nduunëdë Diosë tyuunk etsëts nbudëkët ja nmëguˈuktëjk?”. Ja neky diˈib yajtuknigajx kyaj yëˈëyë tˈatsoowëmbijtyë tyäˈädë yajtëˈëwën. Min nˈokˈijxëm tuˈuk majtskë tyäˈädë käjpxwijën diˈib jap yajpatp.

Ko Timoteo tkäjpxtsondaky ja neky, ta netyë tpëjkyë kuentë ko mëjë apostëlë Pablo yaˈityëty ets ko mëk tsyokyëty, pääty yˈanmääyë: “Dëˈënëts mij njawë extëmtsë nˈuˈunk” (2 Tim. 1:2). Timoteo ja yajmooyë tyäˈädë neky, naa jaa mä jëmëjt 65, jekyë nety kujk tyuunë mëjjäˈäy ets waˈanë netyë jyëmëjt naa iˈpx mäjk naxyën. Nan të nety jyëdity mäjk jëmëjt naxy mëdë Pablo ets mëjwiin kajaa tijaty tyukniˈˈijxë.

Seguurë ko Timoteo mëjääwmooyë mëjwiin kajaa ko tnijäˈäwë wiˈixë Pablo tmëmadaktäˈäyë amay jotmay. Pujxndëgotyë nety yˈity jam Roma, ets tim tsojkë nety ja jäˈäy yaˈoogäˈänyëty (2 Tim. 1:15, 16; 4:6-8). Timoteo pyëjkë kuentë wiˈixë netyë Pablo jyantsy jyotmëkëty, pes duˈun nyijäˈäyë: “Päätyëts nyajkexy nyajnaxyëts tëgekyë” (2 Tim. 2:8-13). Timoteo mëjwiin kajaa pyudëjkë ko tˈijxy wiˈixë Pablo myadaky, ëtsäjtëm nan mbäät xypyudëjkëm.

Pablo yˈanmääyë Timoteo parë dyajtsobäädët ja tuunk diˈibë nety tyuumpy. Duˈun tˈanmääy: ‘Ets ja mduunk xyajmëjjëty mëdiˈibë ja Dios të mmoˈoyën’ (2 Tim. 1:6, TY). Pablo yëˈë yajtuunë ayuk grieegë khárisma, diˈib yˈandijpy ko ti nyajnamoˈoyëm oy xykyapat xykyanitëjkëm o të ngayajnimëjääwdakëm. Timoteo yˈaxäjë diˈibë Dios mooyë ko yajwinˈijxy parë ttunët tuˈugë tuungë jëjpˈambë mä ja tuˈukmujkën (1 Tim. 4:14).

 ¿Wiˈixë nety mbäädë Timoteo ttunyë tyäˈädë tuunk? Apostëlë Pablo mooyë käjpxwijën, ets duˈunxyëp extëm yˈanmääyë: “¡Këyakë mgorasoon mä tyäˈädë tuunk!”. Duˈun extëmë jäˈäxy yˈakˈyajjëjpkapë parë kyaj pyiˈitsët ja jëën, Timoteo nan tsojkëbë nety tyuunˈadëˈëtsët parë duˈunyëm tjotmoˈoyëdë Diosë tyuunk. Ëtsäjtëm, nanduˈunën tyam mbäät nduˈunëm: njotmoˈoyëm ja Diosë tyuunk.

Timoteo kyäjpxˈadëts ja neky diˈibë netyë Pablo të tyuknigexyëty ets jap tpatyë ääw ayuk diˈib mbäät pyudëkëty parë yˈoybyëtsëmët ja tuunk diˈib tyuumpy. Pablo yˈanmääyë: “Mët ja espiritë santë pyudëjkën diˈibë ijtp mä ëtsäjtëm, kuentëˈat diˈibë Dios të mdukˈamëbëjtäägëty” o diˈib të mduknipëkyëty (2 Tim. 1:14). ¿Ti diˈibë netyë Timoteo të yajtuknipëky? Mä bersikulo 13 japë Pablo tmaytyaky “ja ëxpëjkënë oybyë”, jaˈa njënäˈänëm, ja tëyˈäjtën diˈib yajpatp mä Diosë jyaaybyajtën (2 Tim. 1:13). Timoteo tsojkëbë nety ttukniˈˈixët ja tëyˈäjtën, duˈun ja myëguˈuktëjk ets nanduˈun ja jäˈäy mä yˈëwaˈkxy kyäjpxwaˈkxy, pes Dios mëduumbë nety (2 Tim. 4:1-5). Nan të nety yajtuunkmoˈoy mëjjäˈäy ets tˈijxˈit tkuentˈatët ja Dios mëduumbëty (1 Peed. 5:2). ¿Wiˈixë nety mbäädë Timoteo tkuentˈaty diˈib të yajtuknipëky, jaˈa njënäˈänëm, ja tëyˈäjtën diˈib tukniˈˈijxëp? Mëdë nyaybyudëkë espiritë santë ets ja Diosë jyaaybyajtën (2 Tim. 3:14-17).

Ëtsäjtëm, nan të nyajtuknipëjkëm ndukniˈˈijxëmë jäˈäy ja tëyˈäjtën (Mat. 28:19, 20). Oy ko xëmë njamyajtsëm ko mëjwiin kajaa tsyobäätyë tyäˈädë tëyˈäjtën. Ets parë kyaj njäˈäytyëgoˈoyëm, oy ko xëmë nnuˈkxtakëm ets ngäjpxëmë Diosë yˈAyuk bom bom (Rom. 12:11, 12; 1 Tim. 4:13, 15, 16). Waˈan mijts mduny mëjjäˈäy o xyyajtuny aduˈugë mxëëw mdiempë mä Diosë tyuunk. Pën duˈun, oy ko mˈitët yujy tudaˈaky. Nan oy ko xytyukˈijxpatëdë Dios parë yajxon xytyunët ja tuunk diˈib mnikëjxmˈäjtypy. Ko duˈun xytyunët, yëˈë nety myajnigëxëˈkypy ko myajtsobatypy ja tuunk diˈibë Dios të mduknipëkyëty.

Timoteo yëˈë yajtuknipëjk parë ttukniˈˈixët ja myëguˈuktëjk wiˈix yajtunäˈäny ja tuunk diˈibë nety nyikëjxmˈäjtypy. Päätyë Pablo yˈanmääyë: “Ja ää ayuk diˈibë të xymyëdoy ngajxyëts, [...] tuknipëk mij yëˈë jäˈäyëty diˈibë jënäämp tëyˈäjtën es mbäät dyaˈëxpeky ja wiink jäˈäyëty oknëm” (2 Tim. 2:2). Pablo, tyukjamyajtsë Timoteo ko tsojkëbë nety ja myëguˈuktëjk ttukniˈˈixët tukëˈëyë tijatyë nety të tjaty. Nanduˈun tyam, pënaty tuundëp mëjjäˈäy mä tuˈukmujkën, tsojkëp ttundëdë mëjääw parë ttukniˈˈixëdët ja myëguˈuktëjk. Tuˈugë nmëguˈukˈäjtëm diˈib yajnëjkxypyë jëjpˈamˈäjtën ets diˈib jantsy oy tuump, tyukniˈˈijxëp ja myëguˈuktëjk wiˈix tijaty yajtunäˈäny, kyaj tpëjkëˈëky tijaty jyajty nyijäˈäwëp. Nan kyaj tsyëˈëgë ko ja myëguˈuk diˈib tyukniˈˈijxëp mas niˈigyë tijaty tjatët o mas oy ttunët ja tuunk. Pääty, kyaj jeˈeyë ttukniˈˈixë yiˈin waanë, tyukniˈˈijxëtyaabyë duˈun. Tyukmëtsojkypy parë tmëdattët ja wijyˈäjtën, ets tnijawëdët wiˈix tijaty ttundët extëm tuˈugë Dios mëduumbë diˈib jyajty nyijäˈäwëp wiˈix tijaty yajtunäˈäny. Ets duˈuntsoowë tyäˈädë yetyëjkjäˈäyëty, mbäät mas niˈigyë tyundë mä Diosë kyäjpn.

Seguurë ko Timoteo mëjwiin kajaa dyajtsobaty ja neky diˈibë Pablo tuknigajxë. Nˈokpawinmäˈäyëm wiˈixë Timoteo tkajpxy janääm jatsojk ja käjpxwijën diˈib mooyë ja myëtnaymyaayëbë ets tmëmay tmëdäjy wiˈix tkuytyunäˈäny.

Ets ëtsäjtëm, ¿wiˈix mbäät nbanëjkxëmë tyäˈädë käjpxwijën? Ko nˈakjëjpkäjpëmë jäˈäxy parë tyooyˈadëˈëtsët ja jëën, jaˈa njënäˈänëm, ko njotmoˈoyëmë Diosë tyuunk, ko nguentˈäjtëm diˈib të nyajtuknipëjkëm ets ko ndukniˈˈijxëm ja nmëguˈukˈäjtëm tukëˈëyë diˈib njäjt nnijäˈäwëm. Ko duˈun nduˈunëm, mbäädë net njënäˈänëm ko të yajxon nduˈunëmë tyäˈädë tuunk extëmë Pablo tˈanmääyë Timoteo (2 Tim. 4:5).