TURAMU namona ta ese hahegoada revarevana ta e siai henimumu neganai, emu hemami be ede bamona? Kristen hahediba tauna Timoteo na aposetolo Paulo amo revareva unu bamona ta e abia. Hari una revareva na Baibul bukana 2 Timoteo. Reana Timoteo na gabu asi reḡereḡena ta ai e helai bona ia turana namona ese e tore herevadia e duahiva. Timoteo na reana e lalova: ‘Paulo be madi namo eiava? Egu asainmen baina karaia namonamo totona, ia be dahaka hahegoada herevadia e tore? Ina revareva ese lau be durugumu egu haroro bona hahediba ḡaukaradia baina kara namonamo, a?’ Baita itaiamu, Timoteo ese henanadai unu bamodia haeredia na ina revareva namona ai e davari. Ina revareva ai sisiba namodia haida mani aita herevalai.

Timoteo ese revareva matamanai Paulo ese e tore herevadia e duahi neganai, e laloparara Paulo ese ia na e lalokau henia badava. Paulo na e gwa, “natugu Timoteo, egu lalokau.” (2 Tim. 1:2) Laḡani 65 C.E. bamona ai Timoteo ese ina revareva e abia. Una negai ia laḡanina na reana 30 mai kahana, bona ia na vada Kristen elda ta. Paulo ida laḡani 10 mai kahana e ḡaukara hebou bona ia amo ḡau momo e diba.

Timoteo na e diba Paulo na hisihisi idauidau e haheaukalaiva neganai, una ese Timoteo na e hagoadaia. Paulo na Roma ai seini amo e ḡuia, bona kahirakahira bae hamasea. (2 Tim. 1:15, 16; 4:6-8) Timoteo na Paulo ena boga-auka karana e itaia, badina Paulo na e gwa: “Hisihisi iboudiai na haheaukalaimu.” (2 Tim. 2:8-13) Timoteo na Paulo ena haheauka karana ese e hagoadaia, una heḡereḡerena ita danu baine hagoadada diba.

Paulo ese Timoteo e hamaoroa Dirava ena hesiai ḡaukara lalonai ena asainmen na baine laloa bada. Paulo na e ura Dirava ese Timoteo e henia “herahia ḡauna” na baine “hahururu-hururua.” (2 Tim. 1:6) Paulo ese e ḡaukaralaia Grik herevana khaʹri·sma anina na “herahia.” Una Grik herevana na Dirava ena hebogahisi dainai e henidamu herahia o harihari ḡauna e herevalaiamu. Timoteo na e  abia hidi neganai, una harihari ḡauna e abia unu amo Kongrigeisin baine durudia.​—1 Tim. 4:14.

Paulo ese Timoteo e hagoadaia una harihari ḡauna be ede baine ḡaukaralaia toma? Paulo na vaitani Timoteo e hamoroava: ‘Mai kudoumu idoinai ida emu asainmen ba karaia!’ Ta ese au e rakuamu eiava lahi e tapoamu bena lahi e hururumu heḡereḡerena, Paulo na e urava Timoteo na ḡau haida baine kara ena hesiai ḡaukara baine goadalaia. Hari ina negai, ita danu unu baita kara toma, mai kudouda idoinai ida eda hesiai ḡaukara baita goadalaia.

Timoteo ese turana Paulo ena revareva e duahiava lalonai, Paulo ena hereva ma ta ese Timoteo e durua ena hesiai ḡaukara baine karaia namonamo totona. Paulo na e gwa: “E henimu ḡauna namona ba gimaia, Lauma Helaḡa, ita laloda e noho heniamu Laumana, dainai.” (2 Tim. 1:14) Timoteo e henia ḡau namona be dahaka? Siri 13 ai, Paulo na Toretore Helaḡadia ai “hereva momokanidia” e herevalai. (2 Tim. 1:13) Timoteo na Kristen tauna ta dainai, ena maduna na kongrigeisin taudia baine durudia bona teritori ai e davaridiava taudia ediai hereva momokani baine harorolaia. (2 Tim. 4:1-5) Danu, Timoteo na elda ta ai ela neganai iena maduna ma ta na Dirava ena mamoe serina baine reḡudia. (1 Pet. 5:2) Bema Timoteo na Iehova ena lauma helaḡa bona ena Hereva ai baine tabekau, ia e henia ḡau namona, hereva momokani ihahedibalaina, na baine gimaia diba.​—2 Tim. 3:14-17.

Hari ina negai, ita danu e henida hereva momokani na taunimanima idauidau baita hadibalaidia. (Mat. 28:19, 20) Bema hanaihanai baita ḡuriḡurimu, bona Dirava ena Hereva baita stadilaiamu Dirava ese e henida ḡau namona na dava bada ḡauna bamona baita gimaiamu. (Roma 12:11, 12; 1 Tim. 4:13, 15, 16) Reana ita haida na kongrigeisin elda eiava fultaim hesiai ḡaukaradia ta karamu. Asainmen unu bamodia daidiai, baita manau na namo bona Dirava enai baita tabekau. Dirava ena heduru amo e henida ḡau namona na baita gimaia namonamo diba.

Timoteo ena asainmen na ma haida baine hadibadia, unu amo idia danu ia e kara ḡaukaradia bae kara diba. Una dainai Paulo ese Timoteo e hamaoroa: “Na hamaorolaimu herevadia na kamonai taudia ba hamaorolaidia; bena idia ese haida ma bae hadibadia.” (2 Tim. 2:2) Timoteo na ena tadikaka amo diba baine abi, bona ia ese danu ma haida baine hadibadia. Hari ina negai, Kristen kongrigeisin lalonai elda taudia iboudiai ese una dala bae badinaia diba. Elda namona ta ese e karaiamu ḡaukarana amo e dibamu ḡaudia na haida edia amo se hunimu. To, ia ese ma haida be hadibadiamu unu amo idia ese danu una ḡaukara bae karaia diba. Ena be elda na dibana e hadibaiamu tauna ese ḡaukara na be karaia namonamomu, bona ena diba na be badamu, to una ese elda na se kouamu ia baine hadibaia. Una dainai, elda na ḡau iboudiai be herevalai namonamomu. Ia na e uramu ia ese e hadibadiamu taudia na ḡau bae haero namonamo bena lo tadikakadia ai baela. Unu amo kongrigeisin be durua namonamomu.

Oibe, Timoteo ese Paulo amo e abia revarevana na e moalelaia. Baita gwau dibamu Timoteo ese unu sisiba na e duahi loulouva, bona ena asainmen ai baine badina daladia e lalohadailaiva.

Ita danu ta uramu una sisiba baita badinaia. Edena dala ai? Baita ḡaukara goada Dirava ese e henida harihari ḡauna baita gimaia, bona ta diba ḡaudia na ma haida baita hadibalaidia. Unu amo Paulo ese Timoteo e hamaoroa heḡereḡerena, ita ese danu eda hesiai ḡaukara baita “haḡuḡurua” diba.​—2 Tim. 4:5.