KI TO resanti kan to gagn enn let bien ankourazan ar enn bon kamarad? Timote ti gagn enn let koumsa avek lapot Pol. Sa let-la se liv Labib ki apel 2 Timote. Sirman Timote ti rod enn plas bien trankil pou lir let ki so bon kamarad ti avoy li. Kitfwa Timote ti pe demann limem: ‘Pol ki manier? Eski li ena bann bon konsey pou ed mwa asim mo bann responsabilite? Eski so bann konsey kapav ed mwa pou prese ek ansegne dan enn pli bon fason, ek osi pou ed lezot?’ Kouma nou pou trouve, Timote ti gagn bann repons pou so bann kestion, ek li ti osi gagn lezot kitsoz bien inportan ankor. Dan sa lartik-la, nou pou koz lor bann konsey bien itil ki ena dan sa let-la.

Deswit kouma Timote ti koumans lir let-la, li ti konpran ki Pol ti vremem gagn so traka. Avek boukou lamour, Pol ti apel li “mo zanfan bieneme.” (2 Tim. 1:2) Timote ti gagn sa let-la, an lan 65 Nou Lepok. Li ti ena anviron 30 an ek li ti deza enn ansien ki ti ena boukou lexperyans. Pandan plis ki di-z-an, li ti travay ansam avek Pol ek li ti aprann boukou avek li.

Sirman sa ti bien ankouraz Timote kan li ti aprann ki Pol ti pe andir bann leprev avek fidelite. Pol ti dan prizon dan Rom, ek bannla ti pou touy li biento. (2 Tim. 1:15, 16; 4:6-8) Timote ti remark kouraz ki Pol ti ena, parski Pol ti dir li: “Mo pe siport tousala.” (2 Tim. 2:8-13) Parey kouma Timote, nou osi nou kapav gagn lafors kan nou reflesi lor landirans Pol.

Pol ti ankouraz Timote pou konsider bann responsabilite ki li ti ena dan servis Bondie kouma bann kitsoz ki ena boukou valer. Pol ti anvi ki Timote “re-alim kouma enn dife sa don ki Bondie” inn donn li la. (2 Tim. 1:6, NW) An Grek, mo “don” ki Pol ti servi se kharisma. Sa mo-la fer referans ar enn don ki gratis ek ki dimounn-la pa merite. Timote ti gagn sa don-la kan bann ansien ti swazir li pou servi lasanble dan enn fason spesial.​—1 Tim. 4:14.

Ki kitsoz Pol ti pe ankouraz Timote pou fer ar sa don-la? Kan li ti lir lexpresion “re-alim kouma enn dife,” kitfwa Timote ti pe pans enn dife ki bann dimounn ti alime dan  lakaz ek ki parfwa ti vinn bann ti labrez. Lerla, ti bizin re-alim sa bann labrez-la pou ki dife-la repran ek gagn plis saler. Enn diksioner explike ki verb Grek (anazopyreo) ki Pol ti servi vedir “re-alime, fer reviv, fer vinn pli for,” setadir pou repran lafors ek pou fer enn travay avek zel. Alor, Pol ti pe rod dir Timote: ‘Asim to bann responsabilite avek tou to leker!’ Azordi, nou osi nou bizin fer parey, setadir nou bizin servi Zeova avek tou nou leker.

Dan so let, Pol ti dir Timote enn lot kitsoz ki ti pou ed li pou gagn bann bon rezilta dan so minister. Pol ti ekrir: “Gard bien sa kitsoz ki ena valer la, gras-a lespri sin ki dan nou.” (2 Tim. 1:14, NW) Ki ete sa kitsoz ki ena valer ki Timote ti gagne la? Dan verse avan, Pol ti koz lor “bann bon parol,” setadir bann verite ki ena dan Lekritir. (2 Tim. 1:13) Antan ki enn Kretien, Timote ti bizin ansegn bann verite ar so bann frer ek ser dan lasanble, me osi ar bann dimounn dan so teritwar. (2 Tim. 4:1-5) Anplis, Timote ti enn ansien ek li ti bizin pran swin troupo Bondie. (1 Pier 5:2) Pou li gard bien sa kitsoz ki ena valer la, setadir bann verite ki li ti bizin ansegne, Timote ti bizin kont lor Parol Bondie ek lor lespri sin.​—2 Tim. 3:14-17.

Azordi, nou osi nou’nn gagn bann verite Biblik ek nou bizin ansegn sa bann dimounn. (Mat. 28:19, 20) Nou pou montre ki nou apresie sa bann verite ki ena boukou valer la kan nou kontign priye ek nou kontign etidie Labib regilierman. (Rom. 12:11, 12; 1 Tim. 4:13, 15, 16) Eski to dan enn form servis aplintan ouswa to pe servi kouma ansien? Sa bann responsabilite-la ena boukou valer. Alor, sa bizin fer nou ena limilite ek kont lor Bondie. Nou pou kapav gard, ouswa protez, nou bann responsabilite si nou kontign donn zot boukou valer ek nou kontign kont lor Zeova pou ed nou.

Timote ti gagn responsabilite pou form lezot osi. Se pou sa rezon-la ki Pol ti ankouraz Timote: “Bann kitsoz ki to finn tande ar mwa . . . konfie sa bann kitsoz-la bann zom fidel, ki an retour, pou bien kalifie pou ansegn lezot.” (2 Tim. 2:2, NW) Pol ti rapel Timote ki li ti bizin ansegn bann lezot frer tou bann kitsoz ki li ti aprann. Azordi osi, li bien inportan ki bann ansien fer parey. Enn bon ansien pa pou gard tou seki li kone lor enn travay zis pou li tousel. Okontrer, li pou montre lezot kouma pou fer travay-la pou ki bannla osi kapav fer li. Li pa pou per tansion lezot konn pli boukou kitsoz ki li ouswa fer travay-la pli bien ki li. Anplis, ansien-la pa pou zis montre bann kitsoz lao-lao. Li pou ed bann ki li pe forme pou zot ena sazes ek bon zizman, pou ki zot grandi lor plan spiritiel. Lerla, “bann zom fidel” ki li’nn forme pou kapav ed lasanble pli bien ankor.

Pena dout ki Timote ti bien apresie let ki Pol ti avoy li. Kitfwa Timote plizir fwa ti lir bann konsey ki Pol inn donn li ek ti reflesi kouma li kapav met zot an pratik.

Nou osi nou anvi aplik sa bann konsey-la. Kouma nou kapav fer sa? Nou kapav fer zefor pou re-alim kouma enn dife don ki Bondie inn donn nou, gard bien sa bann kitsoz ki ena valer la, ek ansegn lezot tou seki nou kone. Kan nou fer sa, parey kouma Pol ti dir Timote, nou pou “akonpli [nou] minister afon.”​—2 Tim. 4:5, NW.