NYUUVA nnokhala cani mpwaniinyu ooveleeliherakani iwarakha yowuulipihani? Nkristau eehaniya Timotiyu ahaakhela iwarakha toko iyo, yaaveleeliheriyaawe ni apostolu Paulu. Iyo iwarakheeyo phi ilivuru yo mbiiblyani ineehaneehu iwarakha yonayeeli ya Timotiyu. Waakhela wawe iyo iwarakheeyo, Timotiyu khweeliini ahototha nipuro noomaalya naahalaawe wiitthaalela usoma wiira acuwele citthu cantikheliyaawe ni mpatthannyaawe. Timotiyu atthunaka ahoopuwela co: ‘Paulu haavo salaama? Kiireke nopheela ukihimyera mananna cinlamuliyaaka uvara miteko co wanlokoni civahaceriyaaka? Kiireke ila iwarakheela inaahala ukiitthuciha mananna oovara saana nteko woolalyeera ni mananna o waakavihera akhwaaka? Toko cinhaleehu wiitthuca, Timotiyu ahophwanya nhina iyo iwarakheeyo waakhuliya waya ayo makohwaayo ni aheetthuca citthu cikiina. Masi nttwee noopele mwaha vakaani ikano ciri nhina iyo iwarakheeyo.

Ukati Timotiyu waasomaawe moolumo oopacera o iyo iwarakheeyo, uyo ahokhitiri woona wiira aanaafentiya venci ni Paulu. Apostolu Paulu hantikha wiira Timotiyu aari “mwaana oofentiya.” (2 Tim. 1:2) Timotiyu atthunaka aakhenle iyo iwarakheeyo mwaakha wo 65. Uyo ukatyuuyo, Timotiyu atthunaka aarina myaakha coopwaha 30. Aanookhalaru mmirawo, Timotiyu aari humu oocuwelaca. Uyo ahokhala myaakha coopwaha 10 avaraka nteko ni Paulu ni aheetthuca citthu cinci.

Timotiyu ahokhala oolipihiya venci waacuwenlyaawe wiira ule ukatyuule Paulu eera avilelaka masakha yaarinaawe. Paulu aahootthukiya u Roma ni woohipica anhala wiiviya. (2 Tim. 1:15, 16; 4:6-8) Moolumo a Paulu wiira wawe “akinhiya uvilela citthu cotheene,” yahonthoonyera Timotiyu wiira Paulu aari nlopwana oolipa nrima. (2 Tim. 2:8-13) Toko Timotiyu, hiiva ciicammo ninaakhala oolipihiya nuupuwelaka mananna Paulu caavilenlyaawe.

Paulu ahonkurumica Timotiyu wiira alemelihe cinene nteko wa Nluku waavahaceriyaawe uvara. Uyo ahomwiirela Timotiyu: “Utetherye, vaavale wo mooro, iparakha ya Nluku waakhenlyaa.” (2 Tim. 1:6) Nhina ila iveeruswiila, nuulumo neekereku niromonlyaawe apostolu Paulu nitaphuleliye “iparakha,” nikhanle khárisma. Nno nuulumonno ninaaca itthuvo inaakhelaawe ntthu mahala ni  woohimphwanela uvahiya. Timotiyu ahaakhela iyo iparakheeyo ukati waavahaceriyaawe miteko cuulupale co wanlokoni.—1 Tim. 4:14.

Timotiyu aalamuliya wiirihelani iyo iparakheeyo? Ukati waasomilyaawe moolumo aneera “utetherye, vaavale wo mooro,” uyo atthunaka ahoopuwela wiira atthu yapahaka mooro mmawannyaya, yahaana yatetheryaka ikhuni wiira upharele venci. Dicionário mmoca neera wiira nuulumo neekereku (anazopyréo) apostolu Paulu niromonlyaawe, maanaaya wiira “upharihela, wuncera mooro,” ni moolumacero makhwaawe, maanaaya wiira “wiiminyaaliha uvara nteko wuutteelaka nrima.” Phimaana, itthu Paulu yaapheelaawe unhimyera Timotiyu phi ila: “Wiikurumice uvara saana nteko uvahaceriyaa!” Iyo phi itthu ninlamuliyeehu upanka ilelo—wiikurumica uvara nteko wa Yehova.

Ukati waasomaawe iwarakha ya mpatthannyaawe, Timotiyu ahophwanya ikano ikhwaawe yaahala unkavihera uvara saana nteko woolalyeera. Paulu hantikha: “Usunke uyo nhakhu womaana uvahaceriyooyo, ukhuluvelaka nnepa wowaarya nirineehu.” (2 Tim. 1:14) Nhakhuni womaana waavahaceriyaawe Timotiyu? Nhina iveerusu 13, Paulu hooluma eeraka “moolumo omaana.” Ayo moolumwaayo inaaciya ikhweeli imphwanyannya nhina Cowantikhiya Cowaarya. (2 Tim. 1:13) Ukhala wiira Timotiyu aari nkristau, uyo ahaana alalyeeraka ikhweeli wanlokoni ni waalalyeera atthu oovate. (2 Tim. 4:1-5) Ciicammo, Timotiyu ahovahaceriya uwacera ikhontwaa ca Nluku. (1 Pet. 5:2) Wiira asunke nhakhu womaana waavahaceriyaawe, awula ikhweeli ceetthucihiyaawe, Timotiyu ahaana akhuluvelaka nnepa wowaarya wa Yehova ni Nuulumo nawe.—2 Tim. 3:14-17.

Ilelo, hiiva ciicammo nihaakhela iparakha yomaana yoovara nteko woowiitthuciha ikhweeli akhwiihu. (Mat. 28:19, 20) Wiira nihihiye ulemeliha uyo nteko uvahaceriyeehuuyo, nihaana nilompaka ni usoma Ibiiblya khula ukati. (Aroo. 12:11, 12; 1 Tim. 4:13, 15, 16) Atthunaka hiiva nihaakhela-tho iparakha cinci, toko uvara nteko wo Umwene ukati wotheene awula ukhala humu o wanlokoni. Naakhelaka iparakha toko nnyo, nihaana wiiyeviha ni unkhuluvela Nluku wiira anikavihere. Wiira nisunke awula nikhikicere iparakha yomaana yaakhenleehu, nihaana ulemeliha ni ukhuluvela wiira Yehova phinhala unikavihera uwacera saana iyo iparakheeyo.

Nteko nkiina waavahaceriyaawe Timotiyu, waari waalakihera akhunanawe miteko caavaraawe. Phimaana Paulu ahomwiirela Timotiyu co: “Citthu cikiiwalyaa, waacuwelihe alopwana ookhuluvelya, anhala ciicammo ucuwela uwiitthuciha akhwaaya.” (2 Tim. 2:2) Paulu ahomuupusera Timotiyu wiira aalamuliya waalakihera akhunanawe citthu ceetthucaawe. Unaareera khula humu o wanlokoni wiikurumica upanka iyo. Humu omaana khankhalela ihace nteko uvahaceriyaawe ni khanvithavitha citthu cincuwelaawe wiira akhunanawe ahicuwele nteko uncuwelaawe uvara. Uhiya commo, uyo nawaalakihera akhwaawe uvara uyo ntekooyo. Uyo khanoova upwahiya ni mayamunna akhwaawe ancuwelaca citthu cinci unvikana uyova, ni unaakhumela saana nteko uvahaceriyaaya. Humu omaana ciicammo khanwiitthuciha akhunanawe citthu vakaani paahi. Uyo naapheela waakavihera ale akenle phiyaaru wanlokoni wiira akhalane ankhili omaana ni yuunuwe mminepani. Nlattu woopanka commo, “alopwana ookhuluvelya” anlakiheriya anaahala utepa ukavihera wanlokoni.

Khweeliini, unawoonannya wiira Timotiyu yahoncivela venci iwarakha yaaveleeliheriyaawe ni Paulu. Khunnirika umuupuwela Timotiyu asomaka ikwaha cinci nnyo ikano cofayitannyo ni oopuwelaka mananna oohala weettela ukati woovara nteko waavahaceriyaawe.

Hiiva ciicammo nimpheela weettela nnyo ikanonnyo. Manannani? Nitetheryaka khampa mooro iparakha yaakhenleehu, nasunkaka nteko uvahaceriyeehu ni naalakiheraraka akhwiihu citthu cotheene cincuweleehu. Napankaka commo, phinhaleehu weettela ikano Paulu yanvahilyaawe Timotiyu: “Uvare ratta nteko wa Nluku.”—2 Tim. 4:5.