UZYE mukauvwa uli nga mwapokelela kalata yakukomelezya ukufuma kuli cuza winu wino mwatemwa sana? Timoti wapokeelile kalata ya musango uu kufuma ku mutumwa Paulo, kalata ino ndakai tukaama ukuti ibuku lyakwe 2 Timoti. Ukwaula nu kutwisika, Timoti walonzile incende ukutaali icongo pakuti abelenge ivyeo vino cuza wakwe wamulembiile. Timoti afwile welenganyanga ukuti: ‘Uzye Paulo ali uli? Uzye akulonda ukunenako vimwi ivingangazwa lino nkuomba umulimo? Uzye kusunda kuu kungangazwa lino nkuomba umulimo wa kusimikila nu kusambilizya yauze?’ Wakwe vino tumalola, Timoti wazanyile amasuko ku mauzyo yaa alino na vyuze muli kalata ii icindame. Nomba mu cipande cii, tumalanda pa kusunda kumwi ukungatwazwa ukwaya muli kalata ii.

Lino Timoti wabelenzile sile amazwi ya kutandikilapo muli kalata wii, afwile waweni ukuti Paulo wamusakamiile sana. Paulo wamwamanga ati “mwanane mukundwe.” (2 Tim. 1:2) Timoti afwile wapokeliile kalata ii mu 65 C.E. ala ali ni myaka kucila pali 30, nupya pa nsita ii ala watandika mpiti ukuomba ueluda mu cilongano ca Ina Klistu. Waomvile na Paulo ukucila pa myaka 10 nupya wasambilileko ivingi.

Timoti afwile wakomeleziwe sana lino wamanyile ukuti Paulo watwalilile ukuya na ucisinka lino wazizimizyanga intazi. Paulo wali mu cifungo mu Loma nupya wali umupipi nu kukomwa. (2 Tim. 1:15, 16; 4:6-8) Timoti waweni ukuti Paulo wali umusipe lino walanzile ukuti: “Acino nemo nkaposya muli vyonsi.” (2 Tim. 2:8-13) Wakwe Timoti, vino Paulo wazizimizye naswe kwene vingatukomya.

Paulo wakomelizye Timoti kulalola umulimo uno Leza wamupeezile ukuti wali ucindame sana. Paulo walondanga ukuti Timoti aomvya uwila uno Leza wamupeezile. Kuomvya uwila uno Leza wamupeezile kukapiliula ukutwalilila ukwaka wa moto. (2 Tim. 1:6) Paulo waomvizye izwi lya Cigliki lyakuti khaʹri·sma lino walandanga pa “wila.” Izwi lii lya Cigliki lyalozyanga ku wila, icintu ca kupeelwa sile ukwaula ukuciombela. Timoti wapokeelile  uwila uu lino yamusoolwile ukuomba umulimo uiyele umu cilongano.—1 Tim. 4:14.

I vyani vino Paulo wakomelezyanga Timoti ukucita? Lino Timoti wabelenzile amazwi yano Paulo walanzile, afwile welenginye pa moto uno antu yapembanga pa mang’anda uno insita zimwi wazimanga. Pakuti umoto utwalilile ukwaka, yalondekwanga ukusonsela. Dikisyonali imwi yalanzile ukuti izwi lya Cigliki ilyakuti (a·na·zo·py·reʹo) lino Paulo waomvizye likapiliula “ukulenga icintu ukuya vino cali” nanti “ukuvwa ningo nupya ukuya mucincile pa ncito imwi.” Fwandi tungati Paulo wakomelezyanga Timoti kulaombesya umu mulimo wakwe! Naswe kwene ndakai tulinzile ukuya acincile lino tukuomba umulimo witu.

Muli kalata wino Paulo walemvile, walanzile na vyuze ivyali nu kwazwa Timoti ukuomba ningo umulimo wakwe. Paulo walemvile ukuti: “Mu maka ya mupasi wa muzilo, uno ukaikala muno tuli, nakunena ukuti uwacingilila vintu visuma vino walasikwa.” (2 Tim. 1:14, NWT.) I vyani vino Timoti walasikwe? Mu cikomo icafumako, Paulo walozyanga uku “usambilizyo wa cumi” uwaya umu malembelo. (2 Tim. 1:13) Pa mulandu wakuti Timoti wali umwina Klistu uwasambilizyanga icumi, wali nu kulasambilizya aina na ya nkazi umu cilongano na antu yauze yano wikalanga nayo. (2 Tim. 4:1-5) Nupya Timoti wasonsilwe ukuya eluda pakuti asakamala iuvi lyakwe Leza. (1 Pet. 5:2) Timoti walinzile ukucingilila icumi cino wasambilizyanga ukupitila mu kutaila sana mupasi wakwe Yeova ni Izwi Lyakwe.—2 Tim. 3:14-17.

Ndakai, naswe kwene twalasikwa icumi cino tukasambilizya yauze. (Mate. 28:19, 20) Tutalinzile ukwilila ukuti icumi cino tukasambilizya cacindama sana, fwandi tulinzile ukutwalilila ukupepa lyonsi nu kuisambilizya Izwi Lyakwe Leza. (Loma 12:11, 12; 1 Tim. 4:13, 15, 16) Tungapeelwa imilimo na yuze wakwe kuombako ueluda nanti umulimo wa nsita yonsi. Imilimo ya musango uu ilinzile ukutulenga ukuya aicefye nu kulataila sana Leza. Fwandi tulinzile ukusunga nanti ukucingilila vino twalasikwa nu kutaila ukuti Yeova wakulatwazwa.

Umulimo uno Timoti wapokeliile wali uwa kusambilizya yauze ukulaomba umulimo uno waombangako. Ali mulandu kwene uno Paulo wakomelizye Timoti ukuti: “Maila aingi ukauvwa nkusambilizya . . . , nkulonda kuti wemo ulasike mulimo uu ku antu atailwe, yano angasambilizya antu yauze.” (2 Tim. 2:2) Paulo wanenyile Timoti ukusambilizya aina ivintu vyonsi vino wasambiliile. Icicindama sana ukuti umwangalizi wensi umu cilongano aezya na maka ukucita vili vimwi. Umwangalizi musuma asikana ukusambilizya yauze vino wamanya. Nomba akasambilizyako yauze pakuti nayo yaomba imilimo iyo. Asielenganya ukuti yangamanya ivingi ukumucila nanti ukulaomba ukucila vino akaomba. Fwandi asisambilizya yauze ivinono sile. Akalonda ukwazwa yano akusambilizya ukulapingula ningo pa vintu, kuya na mano nu kuya Aina Klistu afikepo. Nga wacita vivyo, “antu atailwe” sana yano akusambilizya, yangazwa sana amu cilongano.

Ukwaula nu kutwisika, Timoti watemilwe sana kalata ino wapokeliile ukufuma kuli Paulo. Tungelenganya vino wabelengangamo lyonsi nu kwelenganyapo pali vino wali nu kulaomvya ukusunda ukwali mwenemo mu mulimo wakwe.

Naswe kwene tukalonda ukulaomvya ukusunda kuu. U mu nzila ci? Tungaombesya ukuomvya u wila uno twapeelwa, ukucingilila vino twalasikwa, nu kusambilizya yauze vyonsi vino twamanya. Ngatwacita vivyo, wakwe vino Paulo wanenyile Timoti, tungamalila “kuomba incito” itu yonsi.—2 Tim. 4:5.