WAKELA karta na mukwawo onamudhiveliwe onakala avi? Timotiyu ahakela karta namukwaye Pawulo nnoniwe ninga 2 Timotiyu. Nuwakela karta nna mohanganyedha Timotiyu aali othuwathuwene wihina afwanye mburo oone alebile mukwaye Pawulo. Podi wera Timotiyu ahubuwela: “Pawulo ali avi? Ohukanna dholaga wodhela mutholo waaga? Karta nna nnere ogikavihera wapara pama mabasa aaga ni wakavihera amodha?” Ninga nnonilihu, mukartani muna Timotiyu ahifwanyamo dhowakula dha makoho ola ni dhithu dhimodha. Vano, nnafuna none dholaga dhathima karta nna ninniwana.

Timotiyu nuwambela wileri karta nna, oliye wonelamo wi Pawulo omudhivela. Nuudhivela, Pawulo wera Timotiyu ali ‘mwanaye amudhiveliye.’ (2 Tim. 1:2) Timotiyu akenle karta nna yaka ya 65, podi wera oliye anna yaka 30. Naarive agali muzombwe, Timotiyu ali namaholela athotho. Oliye ahilaba ni murumiwi Pawulo muwari mwa yaka kumi, ahihudhera dhithu dhowinjhiva ni oliye.

Onona wihina Pawulo owagonjhiha makathamiho nuroromeleya yahimulibiha Timotiyu. Pawulo ali mukambura oRoma teto mohilegela ere opiwa. (2 Tim. 1:15, 16; 4:6-8) Madhu ala a Pawulo owi, ‘ginna ovilelanave dhithu dhatedhene,’ yahimoniha Timotiyu wihina Pawulo ali oliba murima. (2 Tim. 2:8-13) Ninga Timotiyu iyo podi olibihiwa ni ovilela wa murumiwi Pawulo.

Pawulo ahimukongomedha Timotiyu ovaha thima mutholo anniyena mmabasani mwa Mulugu. Oliye owoga ni Timotiyu wera: ‘Wenjhedhedhe ninga mootho gari wakenliwe ya Mulugu.’ (2 Tim. 1:6) Madhu ala owi “gari” Pawulo alabihedhiye ni Egerego enatapuleliwa khárisma. Madhu ala ni Egerego enagana gari yamahala ni yohufwanelela. Timotiyu ahakela gari ela athomiwiye wihina akavihere mulogo. — 1 Tim. 4:14.

Timotiyu alabihedhe avi gari ela? Nuwileri madhu ala owi ‘wenjhedhedhe ninga mootho’, oliye ahubuwela wihina mootho wathubanyiwesa wakala makala a mootho. Makala ala yohowela  wenjhedhedhiwa wihina mootho ohuthime ni wikale oviha. Disiyonariyo dhaala onihina madhu a Egerego anazopyréo, alabihedhe pawulo, enatapulela “othubanyedha, wenjhedhedha, ohelavo kwini” ni madhu mamodha enatapulela “muthu aaparaga mabasa akalege ohagalalene.” Ethu Pawulo afuniye owoga ni Timotiyu siila: ‘Wakela mutholo okavihere ni murima wawo watene!’ Peeno nnohowela werana emodhave — oviheya mmabasani mwa Yehova.

Ilerigive karta na mukwaye, Timotiyu woona yolaga emodha yamukavihere mmabasani aye olaleya. Pawulo ohuleba egi: ‘Wodhela muzimu wotxena onanikavihera okoye dhorela ndha dha thima ovahiwiwe.’ (2 Tim. 1:14) Dhorela ndha dha thima avahiwiye Timotiyu sivi? Va versu 13, Pawulo anowoga mweddelo wa “madhu owakwanela,” eli ebaribari ya mBibliyani. (2 Tim. 1:13) Mwaha wa okala namalaleya, Timotiyu ohowela olaleya ebaribari mmulogoni ni walaleya athu atene. (2 Tim. 4:1-5) Ohiya eyo, Timotiyu ahithomiwa wihina akukulege mambila a Mulugu. (1 Ped. 5:2) Wihina akoye dhorela dhaye dha thima, obe ebaribari ahudhihiwiye, Timotiyu ohowela ororomela muzimu wotxena wa Yehova vamodha ni Madhu aye. — 2 Tim. 3:14-17.

Peeno, nihakela dhorela dha thima wi nikavihere mabasa olaleya. (Mat. 28:19, 20) Wihina nivahe thima mutholo ola nnohowela odidela olobela ni omwileri Bibliya malabo a matene. (Rom. 12:11, 12; 1 Tim. 4:13, 15, 16) Podi wera nihakela mutholo dhimodha ninga mabasa a mudhidhi wamutene obe okala namaholela mulogo. Nakanna gari ela enithukulelege okala owiyeviha ni wonelamo wihina onanikavihera di Mulugu. Iyo podi okoya obe obarela dhorela ndha dha thima mwaha wa ovaha thima ni ororomela nikavihero na Yehova.

Mutholo wa Timotiyu wovolowelavo wahudhiha athu amodha wihina yaparege mabasa mamodhave. Bumwahaya Pawulo omukongomedha Timotiyu egi: Dhithu ndha guwaddenlimi, ‘wavahedhe athu ororomeleya, yindo, aliwa enere wanda wahudhiha athu amodha.’ (2 Tim. 2:2) Pawulo omubusedha Timotiyu wihina yere okala yapama wahudhiha amodha ndhe ahudhereye. Sapama kadda namaholela mulogo eeregena emodhave. Namaholela mulogo apama kanakalela nrima mutholo waye newene kanakuwa nde dhinonneye. Mbwenye oliye onowahudhiha amodha wihina yaparege mabasa ala. Oliye kanoova wakihiwa mutholo waye ni addibila amodha enonne wapara pama mabasa ale. Namaholela mulogo apama kanahudhiha dhithu dhing’onove. Onofuna wakavihera addibila axa okanna ekalelo yapama obe witwelavo omuzimuni. Ndo, “athu ororomeleya” enaxagihiwa podi okavihera vanlubale mmulogoni.

Mohanganyedha, karta nna na Pawulo nahimuhagalasa vanlubale Timotiyu. Mwebaribarene Timotiyu owileri, ovirisedha dila dhowinjhivadhene dholaga ndha dha thima teto wubuwelaga makalelo apama olabihedha mmabasani mwaaye.

Peeno nnohowela ohara dholaga ndha. Ni makalelo baani? Wodhela wenjhedhedha ninga mootho gari ela nakenlihu, mwaha wa okoya dhithu nivahiwihu ni wahudhiha amodha ndhe nnonnihu. Nerana ndala, nnere ohara yolaga Pawulo anvahiliye Timotiyu: ‘Wakela mutholo okavihere ni murima wawo watene!’ — 2 Tim. 4:5.