YÃMB zoa sã n tool yãmb lɛtr sẽn kengd raood sõma, y manesem yɩta wãn to? Pipi kiris-nebã wakatẽ, a Tɩmote paamame tɩ tʋm-tʋmd a Poll tool-a lɛtr a woto buudu. Yaa Biiblã sebr ning b sẽn boond tɩ 2 Tɩmote wã. Sãmbg kae t’a Tɩmote ra yãgdame n na n bao zĩig sẽn yaa sɩdd n zĩnd n karem n bãng a zoa wã sẽn dat t’a maan bũmb ningã. Tõe t’a Tɩmote soka a meng yaa: ‘A Poll keemame bɩ? A tara saglg sẽn na n sõng-m tɩ m tʋm m tʋʋmdã sõma bɩ? A saglgã tõe n sõnga maam tɩ m tõog n moon koɛɛgã la m zãms nebã Wẽnnaam Gomdã sõma bɩ?’ Wa d sẽn na n yã wã, a Tɩmote paama sogs-kãensã la a taab leoor lɛt-kãngã sẽn tar yõod wʋsgã pʋgẽ. Sagls kẽer n be lɛtrã pʋgẽ n tõe n sõng tõndo. Bɩ d gom rẽ yell masã.

A Tɩmote sẽn sɩng lɛtrã karengã, zĩig pʋgẽ a bãngame t’a Poll nong-a lame, la t’a sɩd tagsda a yell wʋsgo. Sɩd me, a Poll bool-a lame t’a “bi-nongre.” (2 Tɩm. 1:2) Sẽn zems yʋʋmd 65 wã sẽnes la a Poll tool a Tɩmote lɛtrã. Rẽ t’a Tɩmote zemsa yʋʋm 30, n da zoe n yaa kãsem-soab sẽn tar minim wʋsgo. A ra tũu a Poll yʋʋm 10 la zak n tʋm a Zeova tʋʋmdã, n da zãms bũmb wʋsgo.

A Tɩmote sẽn bãng t’a Poll ra ket n maanda sɩd ne Wẽnnaam baa ne namsgã, tog n kenga a raood wʋsgo. A Poll ra bee bãens roog Rom, tɩ ra pa na n kaoos la b kʋ-a ye. (2 Tɩm. 1:15, 16; 4:6-8) A Tɩmote ra neeme t’a Poll tara raoodo, bala a Poll yeelame tɩ yẽ ‘ket n tõogda toog bũmb fãa pʋgẽ.’ (2 Tɩm. 2:8-13) A Poll sẽn tõog toogã kenga a Tɩmote raoodo. A mak-sõngã tõe n kenga tõnd me raoodo.

A Poll sagla a Tɩmote t’a ges tʋʋmd ning a sẽn tʋmd Wẽnnaam tũubã yĩngã wa bũmb sẽn tar yõod wʋsgo. A ra ratame t’a Tɩmote ‘modg tɩ Wẽnnaam kũunã a sẽn deegã wid wa bugum.’ (2 Tɩm. 1:6) A Poll sẽn yeel tɩ “kũunã,” yaa Gɛrk gom-bil ning sẽn yaa kharisma wã la a pʋd-yã. Gɛrk gom-bi-kãngã gomda kũun d sẽn paamd zaalem yelle, tɩ yaool n pa segd tɩ d paam-a ye. A Tɩmote paama kũun-kãnga, b sẽn yãk-a t’a na n tʋm tʋʋmd sẽn yaa toor zall tigingã pʋgẽ wã.—1 Tɩm. 4:14.

 Bõe la a Poll ra sagend a Tɩmote t’a maane? A sẽn karem n yã b sẽn yeel t’a “wid wa bugmã,” tõe t’a tagsa nebã sẽn yõgend saal b zagsẽ wã yelle, tɩ wakat ning bɩ b mi n bas tɩ rat n ki wã. Saalã segd n wita sõma, tɩ bugmã yãng tɩ tʋʋlmã paasdẽ. Sebr a yembr pʋgẽ, b wilgame tɩ gɛrk gom-bil ning sẽn yaa anazopyreo wã a Poll sẽn pʋdã võor yaa “yãnge, maneg n widgi, fib tɩ yõke,” rat n yeel tɩ “tʋm tʋʋmd b sẽn kõ-f ne sũ-noogo, la ne yẽesem.” Dẽnd a Poll ra sagenda a Tɩmote, n yet-a yaa: ‘Tʋm f tʋʋmdã ne f sũur fãa!’ Tõnd me segd n maana woto rũndã-rũndã, rat n yeel tɩ d segd n modgame n tʋm d tʋʋmdã ne yẽesem.

A Tɩmote sẽn da ket n karemd a zoa wã lɛtrã, a wa n yãa gomd a to sẽn na n sõng-a t’a tõog n tʋm a tʋʋmdã sõma. A Poll yeelame: “Gũ bõn-sõma-kãensã b sẽn kõ foomã neere, ne vʋʋsem sõngã sẽn be tõnd pʋsẽ wã maasem.” (2 Tɩm. 1:14) Yaa bõe la b ra kõ a Tɩmote? Vɛrse nins sẽn deng rẽ wã, a Poll goma “goam nins sẽn nafdã” yelle, rat n yeel tɩ Gʋls-sõamyã sẽn yet bũmb ningã. (2 Tɩm. 1:13) A Tɩmote sẽn da yaa koe-moondã yĩnga, a ra segd n sõnga tigingã neba, la baa neb nins sẽn pa tũud a Zeova wã tɩ b bãng sɩdã. (2 Tɩm. 4:1-5) Sẽn paase, b ra yãk-a lame t’a yaa kãsem-soaba, n segd n ges Wẽnnaam bãgrã yelle. (1 Pɩy. 5:2) A Tɩmote teega a Zeova vʋʋsem sõngã la a Gomdã, n tõog n gũ bũmb ning b sẽn kõ-a wã neere, rat n yeel tɩ bũmb nins a sẽn da segd n zãms nebã.—2 Tɩm. 3:14-17.

Rũndã-rũndã, tõnd me bãnga Wẽnnaam Gomdã sẽn yet bũmb ningã, tɩ d tʋʋmd yaa d zãms neb a taabã bõn-kãense. (Mat. 28:19, 20) D pa segd n yĩm tɩ d sẽn zãmsd nebã bũmb ninsã tara yõod wʋsg ye. Rẽ n so tɩ d segd n wɩngd ne pʋʋsg la d zãmsd Wẽnnaam Gomdã n pa vaandẽ ye. (Rom. 12:11, 12; 1 Tɩm. 4:13, 15, 16) Sẽn paase, b leb n tõe n yãk-d lame tɩ d lebg kãsem-soaba, bɩ so-pakda. Tʋʋmd a woto sẽn tar yõod wʋsgã segd kɩtame tɩ d sik d mense, la d teeg Wẽnnaam sẽn na yɩl t’a sõng-do. D na n tõog n kogla tʋʋmdã b sẽn kõ-dã, d sã n nong tʋʋmdã, la d teeg a Zeova sẽn na yɩl t’a sõng-d tɩ d tõog n tʋm-a sõma.

B sẽn kõ a Tɩmote tʋʋmd ningã ra pa yẽ a yembr bal yĩng ye. A ra segd n zãmsa neb a taab me tʋʋm-kãnga. Rẽ n so t’a Poll yeel a Tɩmote yaa: “Sã n yaa ne bũmb nins fo sẽn wʋm mam nengẽ . . . , bɩ f rɩk-b n zãms rap sẽn maand sɩda, tɩ bãmb me paam minim n tõog n zãms neb a taaba.” (2 Tɩm. 2:2) Sãmbg kae t’a Tɩmote ra segd n zãmsa neb a taab bũmb nins fãa a sẽn da zãmsã. Rũndã-rũndã, kãsem-soab fãa sẽn be tigingã pʋgẽ segd n modg n maana woto. Kãsem-soab sẽn tʋmd a tʋʋmd sõma pa maand su-kiiri, n pa rat n zãms neb a taab yẽ sẽn mi bũmb ninsã ye. A sakd n zãmsa neb a taabã, sẽn na yɩl tɩ b wa tõe n tʋm tʋʋmdã. A pa yɛɛsd nin-kãens na n wa paam minim tʋʋmdã pʋgẽ n yɩɩd yẽ, wall n wa tõe n tʋm tʋʋmdã sõma n yɩɩd yẽ ye. Woto wã, a pa segd n wilg nebã tʋʋmdã yĩngr-yĩngr bal ye. A segd n sõnga neb nins a sẽn zãmsdã tɩ b wa lebg kiris-neb tẽeb sẽn bɩ. Woto, a sẽn zãms ‘rap nins sẽn maand sɩdã’ sõma wã na n nafa tigingã wʋsgo.

Yaa vẽeneg t’a Tɩmote sũur yɩɩ noog ne lɛtrã a Poll sẽn tool-a wã. Tags-y n ges-y a sẽn karemd lɛtrã beoog sẽn vẽeg fãa, n bʋgsd saglgã zugu, n na n bãng a sẽn tõe n tũ rẽ to-to tɩ sõng-a t’a tõog n tʋm a tʋʋmdã neere.

Tõnd me segd n tũu a Poll saglgã. Wãn to? D segd n modgame tɩ Wẽnnaam kũunã wid wa bugum, n gũ tʋʋmd ning b sẽn kõ-dã neere, la d zãms neb a taabã d sẽn mi bũmb ninsã. D sã n maand woto, wa a Poll sẽn yeel a Tɩmote wã, tõnd me na n tõog n ‘tʋma d tʋʋmdã sõma.’—2 Tɩm. 4:5.