MATI du nî tsâ sadu ǀhō-e xu du ga ǂkhâǃnâ du ra briefsa ka hō o? Apostel Timoteub ge ǁnā ame briefsa apostel Pauluba xū ge hō nētsē da 2 Timoteub ǂkhanis ase a ǂansa. Timoteub ge ǀnîsi ǃnōsa ǃkhai-e gere ôa ib ǁîb ǀhōb ge xoa xū-e khomai. ǀNîsib ge gere ǂâi: ‘Pauluba mati ra ǂâi? Mâ ǀapemā i hîna ti ǁgaumâis ǃnâ nî huite eb ra māte? ǁÎb ǀapemāsa mati nî huide i ta aoǁnâ tsî nau khoena ǃgâise ǁkhāǁkhā?’ Mû da ge ra Timoteub ge nē ǃereamdi tsî ǃnāsa xū-i tsîna nē briefsa xu ge hō. Xawe ha re i da mâǂoara ǀapemādi nē briefs ǃnâ hâ di xa ǃhoa.

Nē briefsab ge khomai tsoatsaoa o, ob ge ǁîkha di ǃhōsagusis ǀgaisa ǀgausa gere hōǃgâ. Paulub ge ǁîba “ti ǀnamǀnamsa ǀgôab” di ge ǂâi. (2Tim. 1:2) Timoteub ge nē briefsa 65ǁî kurib ǃnâ ge hō. ǀNîsib ge nē ǁaeb ai ge disiǃonaǀā kurixa-i tsî ge ǀhaohâb ǃûi-ao i. Tsîb ge Paulub ǀkha disi kurina gere sîsen tsî ǂgui xūna ge ǁkhāǁkhāsen.

Paulub di ǁgâiǀāgu xab ge khomai o, ob ge kaise ge ǂkhâǃnâhe. Paulub ge Romes ǃnâ ǃkhōsis ǃnâ ge hâ-i. (2Tim. 1:15, 16; 4:6-8) Timoteub ge Paulub a ǁkhoaǂgaoxa ǀgausa gere mû, “ǁnā-amaga ta hoana ra tani” tib ge a mî-o. (2Tim. 2:8-13) Timoteub khami da ge Paulub ge mâǀgai ǀgaus xa ra ǀgaiǀgai-e.

Paulub ge Timoteuba ge mîba ib ǁîb ǁgaumâisa ǂhâǂhâsase mû. Paulub ge ge ǂhâba hâ i îb Timoteuba ǁîb ǃnâ hâ ‘Elob hōsa ǂkhaiǂkhai’ tamas ka io ǀaes khami flam kai. (2Tim. 1:6) Paulub ge nē Greekeǁî mîs khaʹri·sma di hâsa ‘hōs’ ǃgao ge sîsen-ū. Nē Greekeǁî mîs ge mari-oǃnâse ra hō-e ǀkhaeba ǃoa ra ǁnaeǁgau. Timoteub ge nē ǀkhaeba ge hō, ib ǀō-aisa ǀgaub ǃnâ ǀhaohâba sîsenba.—1Tim. 4:14.

Nē ǀkhaeb ǀkhab tae-e nî dī sab ge Pauluba Timoteuba ge ǂkhâǃnâ. ‘Elob hōsats nî ǂkhaiǂkhai’ tamas ka io ǀaes khami flam kai tib ge khomai o, ob ge Timoteuba khoen ge om di ai gere khau ǀaedi xa gere ǂâi. Hîna ge ǀnî ǁaegu ai, nanira ǂnomdi khama i-i de. ǁNā ǂnomdi ge ǀgaisase flam tsî ra ǀam kai. ǀNî Greekeǁî mîs Paulub gere sîsen-ūs ge (a·na·zo·py·reʹo). Nē mîs ge ôasa khoe-i  tamas ka io ǁî-i a ǀnam sîsen-e ra dī khoe-i di ra ǂâibasen. Paulub ge Timoteuba gere ǀapemā ib ǁîb ǁgaumâis ǃnâ ôasa. Nētsē da ge ǁkhā xu-e ra dī tsî ôasase ra aoǁnâ.

ǀHōsab ge sîbabi breifsab ta khomai hînab ge Timoteuba ge mû aoǁnâ sîsen-i ǃnâ nî ǂkhâǃnâbi xū-e. Paulub ge ge xoa: “Nē ǃgâi ǁguibēbahets hâ ǁauǁauxūba sâubasen re, ǃanu gagab sada ǃnâ ǁan hâba xu.” (2Tim. 1:14) ǁNā ǂgomǃgâsiba a tae? Mâ ǀō-aisa xū-i ǀkhab ge Timoteuba gere ǂgomǃgâhe? ǃKharu goro xoas ǃnâb ge Pauluba ‘ǂuru mîdi’ xab ge ǃhoa o, Elobmîs ǃnâ ra hō-e amab xa gere ǃhoa. (2Tim. 1:13) Xristeǁî aoǁnâ-aob aseb ge Timoteuba ǀhao-ub gere khoen tsî ǀhaohâb ǃna hâ ǃgâsan tsîna amaba gere aoǁnâba. (2Tim. 4:1-5) Tsîb ge Timoteuba ǀhaohâb ǃûi-aob ase Elob di gunab nî ǃûise ge ǁgaumâihe. (1Pet. 5:2) Timoteub ge ǀō-aisa sîsen-i hînab ge māhe-e nî ǃûi. ǁNās ge amaba ǁkhāǁkhāsa tsî Jehovab ǃanu gagab tsî Elobmîs ai ǂgomaiǂnûisa.—2Tim. 3:14-17.

Nētsēs tsîna da ge amaba mâhe hâ i da nau khoena ǁkhāǁkhā. (Mat. 28:19, 20) ǁNā-amaga da ge nî ǀgore tsî hoaǁgae Elobmîsa xu nî ǁkhāǁkhāsen. (Rom. 12:11, 12; 1Tim. 4:13, 15, 16) ǀNî ǁaegu ai da ge ǀkhara ǁgaumâide a ūhâ ǁkhā. Aiǁgause du ge ǀnîsi a ǀhaohâb ǃûi-aob tamas ka io a aimaba-ao. Nēti i ǀō-aisa ǁgaumâis ge a huida ǁkhā i da ǃgamǃgamsenxasiba ūhâ tsî Elob ai ǂgomaiǂnûi huib ǃgao. ǁNā-amaga da ge sida di ǂgomǃgâsiba nî ǃûi tsî Jehovab huib ai nî ǂgomaiǂnûi.

Timoteub gere hō ǁgaumâidi ge ǁîb ǃgao ǀgui ge hâ tama hâ-i. Nau khoen tsîna i ge ge ǃkhōǂgā hâ-i. Nēs ǀkhab ge Pauluba Timoteuba ge ǀapemā: “Tsî ǂgui ǀhûǀguitimî-aon aiǃâts ge tita xu ǁnâun, ǁîna ǂgomǂgomsa khoena ǂgomǃgâba, naunan nî ǁkhāǁkhāsa a ǁkhāna.” (2Tim. 2:2) Paulub ge Timoteuba ge ǂâiǂâiǃnâ ib ǁkhāǁkhāsen i go xūna nau ǃgâsan ǀkha ǀgoragu. ǁNā-amaga i ge kaise a ǂhâǂhâsa nētsē i gu Xristeǁî ǀhaohâb ǃgâsaga nē aiǁgausa sao-ai. ǃGâi mûǂgam-aob ge ǁîb sîsen-i xab a ǂan xū-e sâu tama hâ tsî nau khoena ra ǁkhāǁkhā în nē sîsen-e dī. ǁÎb ge ǃao tama hâ nau khoen ǁîb xa nē sîsen-e ǃnāsase nî ǂansa. ǁNā-amaga i ge mûǂam-aoba ais ai hâ xūn ǀguina ǁkhāǁkhā tama hâ xawe ǀgaisa ǂansa ra mā. ǁNā-amagab ge ǁîb ra ǁkhāǁkhā khoen nî gā-ai tsî ǀgaisa ǂansa nî ūhâsa ra ǂhâba în gagasise ǀgai. ǁNā ǀgaub ǃnâ i ge “ǂgomǂgomsa khoega” ǀhaohâba ra hui.

ǃGāsa i ge a Timoteub ge Pauluba xub ge hō briefsa gere ǃgôaǃgâ ǃkhaisa. Nē ǀapemāsab ge mati gere khomaisa da ge ra mûnan-ai tsî matib nēsa ǁîb ǁgaumâis ǃnâ nî sîsensa.

Sida tsîn ge nē ǀapemāsa ǂgaob ǃgamsib ǃoa ra ū. Mati? ǃGarise da ge ra sîsen ǂgao i da ǁnā ǀkhaeba ǀaes khama khau kai. Î da ǂan da a xūna nau khoena ǁkhāǁkhā. ǁNā ǀgaub ǃnâ da ge Paulub ge Timoteuba a mîba khami sida ǃoabasa nî ‘dīǀoaǀoa.’—2Tim. 4:5.