¿KENIUJ tionmomachilia keman se akin kuali iuan tionmouika mitsontitanilia se amat kampa mitsonnojnotsa ika netasojtalis uan mitsonyolchikaua? Tatitanil Pablo kititanilij Timoteo se amat kemej nejon, se amat tein axkan moajsi itech Biblia uan tein moixmati kemej 2 Timoteo. Timoteo xa kinekia kiixtajtoltitiuj amat kampa amo teyi kikuejmoloskia uan ijkon kimatiskia toni kitapouiaya itasojikniuj. Timoteo xa motajtaniaya: “¿Keniuj yetos Pablo? ¿Nechyolmajxitia teisa tein uelis nechpaleuis maj okachi kuali nikchiua tekimej tein nikpia? ¿Nechpaleuis nejin amat maj okachi kuali nitanojnotsa, nitamachti uan maj nikinpaleui oksekin?”. Kemej tikitaskej, Timoteo kiajsik itanankililuan nejin netajtanilmej uan oksekiok itech amat tein Pablo kititanilij tein semi kipia ipatiuj. Itech nejin tamachtilis tikitaskej seki tayolmajxitilismej tein kipia nejin amat tein semi tapaleuiaj.

Keman Timoteo peuak kiixtajtoltia amat tein Pablo kititanilij, niman kiitak ke Pablo semi kitasojtaya. Ika miak netasojtalis kiluij “tinotasojkonetsin” (2 Tim. 1:2). Timoteo kiselij nejin amat kemej itech xiuit 65, keman xa kipiayaya panoua 30 xiujmej uan uejkaujya tekititoya kemej tayekankej. Tekitikaya iuan Pablo panoua majtakti xiujmej uan Pablo kimachtijkaya miak taman.

Timoteo xa semi kiyolchikauak kimatis ke Pablo kixikojtoya ouijkayomej tein kipanotoya. Tsaktoya ompa Roma, uan amo uejkaua kimiktiskiaj (2 Tim. 1:15, 16; 4:6-8). Timoteo kiitak ke Pablo semi yolchikauak katka, porin Pablo kijkuilouilij: “Nikxijxikojtok nochi in tajyouilisme” (2 Tim. 2:8-13). Pablo kixikoj miak taman uan nejon semi kiyolchikauak Timoteo, uan no uelis techyolchikauas tejuan.

Pablo kiyolchikauak Timoteo maj kiitani ke kitekitilis Dios semi kipiaya ipatiuj. Kiluij: “Nimitselnamiktia ke [...] xikyektekitiltijtiu nojon uelilis ten Dios mitsmaktilij” (2 Tim. 1:6). Keman Pablo kijtoj “uelilis” kikuik tajtol griego khárisma. Nejin tajtol kijtosneki teisa tein tikseliaj tein amo tikixtauaj uan tein amo timotanilijkej. Timoteo kiselij nejin “uelilis” oso  netetayokolil keman Dios kiixpejpenak maj kichiua se tekit tein semi kipia ipatiuj itech nechikol (1 Tim. 4:14).

¿Toni monekia kichiuas Timoteo ika nejin “uelilis”? Ika okseki tajtolmej, Pablo kiluijtoya Timoteo maj tekitini ika chikaualis, ika yolpakilis. Kemej yeskia kiluijtoya: “Senkis ximochikaua itech tekit tein tikpia”. Ijkon kemej se taltikpaknenkej kitalilia okachi kouit oso kipipitsa tit oso tekol uan ijkon kisentokas xotatos, Timoteo monekia kichiuas seki taman tein kipaleuiskia maj kisentokani yolpakini itech tanojnotsalis. Axkan, tejuan no moneki tikchiuaskej nejon: timochikauaskej tikchiuaskej tekit tein tikpiaj ika yolpakilis.

Timoteo kisentokak kiixtajtoltij amat tein Pablo kititanilij uan kiitak seki tajtolmej tein kipaleuiskia maj okachi kuali tanojnotsa uan tamachti. Pablo kijkuilouilij: “Xikyekpixtinemi ika nejmach ne chipauak Tajtoltsin ten Totajtsin Dios mitsmaktilij” (2 Tim. 1:14). ¿Toni ‘kimaktilijkaj’ Timoteo? Itech versículo 13, Pablo ika tajtoj “kuali tanextililis”, tein kijtosnekia, tamachtilis tein melauak tein moajsi itech iTajtol Dios (2 Tim. 1:13). Kemej Timoteo kiteixmatiltiaya iTajtol Dios, monekia kinmachtis tein melauak tokniuan uan taltikpakneminij akin kinnojnotsaya (2 Tim. 4:1-5). Uan no, kemej katka tayekankej monekia kinixyekanas itekitikauan Dios (1 Ped. 5:2). ¿Keniuj ueliskia kiyekpias tein Dios ‘kimaktilijka’, tein kijtosneki, tamachtilis tein melauak tein monekia kiteixmatiltis? Ika inepaleuil iyektikatsin espíritu Jiova uan iTajtol (2 Tim. 3:14-17).

Tejuan no techmaktilianij tamachtilis tein melauak tein tikinmatiltiaj okseki taltikpakneminij (Mat. 28:19, 20). Moneki nochipa tikelnamikiskej ke tamachtilis tein melauak semi kipia ipatiuj. Yejua ika moneki nochipa tikchiuaskej netataujtil uan timomachtiskej iTajtol Dios (Rom. 12:11, 12; 1 Tim. 4:13, 15, 16). Uan no, tejuatsin xa tiontayekankej itech nechikol oso tikontekitilia Jiova miak tonalmej. Se tekit kemej nejin monekiskia techpaleuis maj tiyolyemankej uan maj nochipa tiktemokan inepaleuil Dios. Yejua ika, uelis tikyekpiaskej nejin tekit komo tikpatiuitaj uan tiktemouaj maj Jiova techpaleui.

Timoteo no monekia kinmachtis oksekin keniuj kichiuaskej tekit tein yejua kichiuaya. Yejua ika, Pablo kiluij: “Tejua Timoteo, tikaktinemik ya notanextililis [...]. Uan ne notanextililis xikui uan xikinmachti ne taneltokani ten tikitas ke melau kinekij motekitiltiske [...]. Uan yejuan nojonkes no ma kinextilijtinemikan oksekin” (2 Tim. 2:2). Pablo kielnamiktijtoya Timoteo ke monekia kinmachtis oksekin tein yejua momachtijka. Axkan no moneki maj tayekananij kichiuakan nejon itech nechikol. Se kuali tayekankej amo mokauilia tein kimati, ta kinmachtia oksekin keniuj kichiua tekit tein kipia uan ijkon yejuan no uelis kichiuaskej. Amo kimouilia maj okachi kimatikan ke yejua oso maj okachi kuali kichiuakan tekit. Yejua ika amo kinmachtia sayoj seki taman. Kineki maj akin kinmachtia kinextikan kuali taixejekolis uan maj kimatikan taajsikamatiskej, maj kinextikan ikualneskayouan Cristo. Ijkon, nejon tokniuan uelis okachi tapaleuiskej itech nechikol.

Tikmatij ke Timoteo semi kipatiuitak amat tein Pablo kititanilij. ¿Ueli tiknemiliaj keniuj Timoteo miakpa kiixtajtoltij tayolmajxitilis tein kimakak itasojikniuj uan kinemilij keniuj kichiuas?

Tejuan no tiknekij tikchiuaskej tein Pablo kiyolmajxitij Timoteo. ¿Keniuj? Maj timochikauakan kuali tikchiuaskej tekit tein tikpiaj, maj tikyekpiakan tein Dios ‘techmaktilij’ uan maj tikinmachtikan oksekin nochi tein tikmatij. Komo tikchiuaj nejin, ijkon kemej Pablo kiluij Timoteo, uelis kuali tikchiuaskej tekit tein Dios techmakak (2 Tim. 4:5).