¿KEN timomachilia ijkuak akin iuan timouika mitstlajkuililia uan mitsyolchikaua? Pablo ijkon okitlajkuilili Timoteo. Okijkuilili se carta tlen kajki itech Biblia uan itoka Segunda Carta a Timoteo. Xamo Timoteo okinekiaya yetos kanin uelis kitlajtoltiskia nochi tlen okijkuilili Pablo. Xamo omotlajtlani: “¿Ken kajki Pablo? ¿Nechiluis itlaj tlen nechpaleuis okachi kuali ma niktekichiuili Jehová? ¿Nechpaleuis nin carta okachi kuali ma nitetlapoui uan ma nikinpaleui oksekimej?”. Pablo okinankili nochi non uan okseki tlamantli. Tikitaskej ken techpaleuis tlen ijkuilitok itech non carta.

Ijkuak Timoteo opejki kitlajtoltia carta okitak Pablo sapanoua okitlasojtlaya. Pablo okilui: “Notlasojkone” (2 Tim. 1:2). Xamo Timoteo okipiaya kanaj 30 xiuitl ijkuak Pablo okititlanili non carta uan kanaj itech xiuitl 65, Timoteo yokimatiaya ken okachi kuali tlayekanas itech tlanechikol. Ye okatka iuan Pablo kanaj majtlaktli xiuitl, ik non, omomachti miak tlamantli.

Timoteo omoyolchika ijkuak okimatki Pablo otlaxikojtoka. Otsaktoka ompa Roma uan yikimiktiskiaj (2 Tim. 1:15, 16; 4:6-8). Timoteo okitak Pablo okatka yolchikauak porque ye okijto: “Nochi nikxikoa” (2 Tim. 2:8-13). Omoyolchika ijkuak okitak Pablo otlaxikouaya uan tejuan noijki uelis techyolchikauas.

Pablo okipaleui Timoteo ma kipatioita kitekichiuilijtos Jehová. Pablo okilui Timoteo: “Nimitsilnamiktia xiktekitilti n weletílistli [noso tetliokolil] non Dios omitsmák” (2 Tim. 1:6). Nikan Pablo okitekitilti tlajtoli khárisma ijkuak okijto “tetliokolil”. Ika griego non tlajtoli kijtosneki ijkuak itlaj techmakaj maski amo technamiki tikpiaskej uan amo otikmotlanilijkej. Yetoskia ken Timoteo okiseli se tetliokolil ijkuak okipejpenki ma tlayekana itech tlanechikol (1 Tim. 4:14).

¿Tlen omonekiaya kichiuas Timoteo ika non tetliokolil? Pablo okiluijtoka Timoteo omonekiaya mochijchikauaskia kanin otlapaleuiaya  ika pakilistli, ijkon ken ijkuak ikaj moneki kitlatlatilijtos itlikuil. Ijkon Timoteo omonekiaya mochijchikauas para kitekichiuilis. Axkan tejuan noijki moneki ma timochijchikauakan ma tiktekichiuilikan Jehová ika nochi toyolo uan ika pakilistli.

Ijkuak Timoteo okitlajtoltijtoka carta tlen okitlajkuilili Pablo ompa okijtouaya tlen kipaleuiskia para okachi kuali tetlapouis. Pablo okitlajkuilili: “Ika ichikawalis n Espíritu Santo non kajki itech toyolo, [xikmalui] n kuali tlamachtílistli non Dios omitsmaktili” (2 Tim. 1:14). ¿Tlen miak ipati okipiaya Timoteo? Itech versículo trece Pablo otlajto itech “kualitlájtoli”, kijtosneki tlen kijtoua Biblia (2 Tim. 1:13). Timoteo okinmachti tlen kijtoua Biblia tokniuan uan oksekimej (2 Tim. 4:1-5). Noijki okitlalijkej tlayekanki para ma kinpaleui tokniuan (1 Ped. 5:2). ¿Ken kitematiltiskia tlen melauak? Iespíritu santo uan iTlajtol Jehová okipaleui (2 Tim. 3:14-17).

Tejuan noijki otechmakakej se tetliokolil, tikinmachtiskej oksekimej tlen kijtoua Biblia (Mat. 28:19, 20, TNM). Nochipa moneki tikilnamiktoskej miak ipati tlen kijtoua Biblia. Ik non, moneki nochipa timomachtiskej iTlajtol toTajtsin Dios uan timotlatlaujtiskej (Rom. 12:11, 12; 1 Tim. 4:13, 15, 16). Xamo titlayekanki noso titlapaleuia ken siervo ministerial. Ken tikpia non tekitl miak ipati moneki tiyetos tiyolyamanki uan xikneltoka toTajtsin Dios mitspaleuia. Ik non, nochipa ma tikchiuakan tekitl tlen ye otechmakak uan ma tikkauilikan ma techpaleui, ijkon tikteititiskej tikpatioitaj.

Timoteo noijki omonekiaya kinpaleuis oksekimej. Ik non, Pablo okijto: “Tlan te yotechkakili onikijto [...] xikinmachti n tokniwah non milák motemaktiah inawak Dios, ijkó yejwah noiwa kinmachtiskeh oksikimeh” (2 Tim. 2:2). Pablo okilnamikti Timoteo omonekiaya kinmachtis oksekimej nochi tlen yokimatiaya. Axkan noijki ijkon moneki kichiuaskej tlayekankej. Moneki kinmachtiskej oksekimej tokniuan tlen kimatij uan ijkon uelis tlapaleuiskej. Amo mokuayejyekouaj mopinatiskej porque oksekimej okachi kimatiskej kichiuaskej se tekitl nion mokuayejyekoskej san yejuan ixtlamatkej. Ik non, amo san seki tlamantli kinmachtiaj oksekimej tokniuan. Tlayekankej kinekij oksekimej ma momachtikan miak tlamantli uan ma kimatikan tlen moneki kichiuaskej. Ijkon okachi kinpaleuiskej tokniuan.

Timoteo okitlasojkamatili Pablo nochi tlen okitlajkuilili. Xamo nochipa okitlajtoltiaya tlen okitlajkuilili uan omokuayejyekouaya ken uelis kichiuaskia tlen okilui.

Tejuan noijki moneki tikinmachtiskej oksekimej nochi tlen tikmatij. ¿Ken uelis tikchiuaskej? Moneki ‘tiktekitiltiskeh n weletílistli non Dios otechmákʼ, tikmaluiskej ‘kuali tlamachtílistli non Dios otechmaktiliʼ uan ma tikinmachtikan oksekimej tlen tikmatij. Ijkon tikchiuaskej tlen Pablo okilui Timoteo: ‘Nochipa tikyekchiwaskeh n tekitl non Dios otechmákʼ (2 Tim. 4:5).