NGOAPI mazwiro enyu pamunoashira karata icivha ku shamwari yenyu? Timoti wakaashira karata yakadari icivha ku mupostori Pauro. Nyamasi uno i bhuku ro Bhaibheri rinozivikanwa inga 2 Timoti. Pacina kukana-kana, Timoti wakapsaka ndau kwayo yo kuti averenge karata iyi yaivhari ku Shamwari yake. Kangaije Timoti wairangarira kudari: ‘Kunanga kuti Pauro ari ushoni wari? Kunanga kuti ano mbhangiro iri yese inozondibesera pa karata yangu? Kureva kuti karata iyi inozondibesera ushoni pa kucumaera no kujijisa?’ Inga zvaticada kuvona, iyena wakakwanisa kuwana mupinguro jo muvhunjo iji no zvimweni zvakawanda pa karata yaakatumihwaya. Musoro uwu, unozobhuya ngo mazano anozotibesera ari pa karata iyi.

Timoti paakatanga kuverenga karata iya, ngo kukasika iyena waizozwisisa kuti Pauro waimutajadi kamare. Ngo rudo hwese, iyena wakamudanija “mwana . . . wokudikana.” (2 Timoti 1:2) Zvingaita kuti Timoti wainga no makumatatu o makore paakaashira karata iyi, mu gore ra 65 Kristu Aviya. Iyena wainga waamukuru waano zivo. Cimwenizve iyena wakashanda na Pauro ko makore anopindija gumi zvokuti wakatojijira zviro zvizinji.

Timoti wakavangiswa maningi paakaziva kuti Pauro ari kucungirira zvineso zvese akagondeka. Pauro wainga wakafungihwa ku Roma, zvokuti wainga phedo no kufa. (2 Timoti 1:15, 16; 4:6-8) Timoti waizovona kuti Pauro wainga no cicunge ngo kunanga kwake izvi: “Inini ndinovangirira [pa] bzese ibzi.” (2 Timoti 2:8-13) Inga ndi Timoti, kuvangirira ka Pauro kunotivangisa.

Pauro wakangwaja Timoti kuti avone basa ro kushandira Mwari kuva rinosisira maningi. Pauro waida kuti Timoti ‘akhwindijire inga muriro cipo caakapuwa ndi Mwari’ caainga naco. (2 Timoti 1:6, Shanduro yeNyika Itsva) Pauro wakashandisa gama ro kuti khaʹri·sma ecitonangira “cipo.” Gama iri ro Cigiriki rinonangira cipo comahara no cicikaezaniswi. Timoti waakaashira cipo ici, paakagajwa kuita basa rinosisira mu ungano.—1 Timoti 4:14.

Waro Timoti waizoitenyi no cipo ici? Paainga eciverenga magama o kuti ‘kukhwindijira inga muriro,’ kangaije iyena wakarangarira ngo pamusoro po muriro waishandiswaya ngo vandhu pa muzi, wo kuti nguva jimweni aitosara masimbe  basi. Masimbe aisaraya, pavaimakhwindijira paitobuda murazvu kakutoguma pa kupisa. Dhisionanrio rimweni rakananga kuti gama iri ro Cigiriki ro kuti (a·na·zo·py·reʹo) rakashandiswari ndi Pauro rinoda kureva “kubhwakazve no kubuda murazvu” zvecida kunangira “kuvangisira pa kuita basa riri rese.” Apa Pauro wainga ecingwaja Timoti kuti: ‘Itai zvese zvaunokwanisa pa basa rako!’ Nyamasi uno tinodikana kuita zvakafanana, kuva vandhu vanovangisira mu basa redu.

Timoti paakaenderera mberi eciverenga karata iyi yaivhari ku shamwari yake, wakawana magama amweni aizomubesera kuti abudirire mu basa rake ro kucumaera. Pauro wakatara kudari: “Korondhai utaka hwauxoni uhu, wecibeswa ngo Mujimu Mucena uri motiri.” (2 Timoti 1:14) Ngocapi ciro cinosisira cainga na Timoti? Pa vhesi ya 13 yo cipauko condhoco, Pauro wainangira “mazwi akanaka,” kana cokwadi caivha mu Matahwa. (2 Timoti 1:13) Timoti inga mutokotesi wo vhangeri, wakacumaera cokwadi kunja no mukati mo ungano. (2 Timoti 4:1-5) Cimwenizve, Timoti wainga wagajwa inga mukuru kuti ahavise mavhuta a Mwari. (1 Pedru 5:2) Timoti waizokorondha cokwadi ici caijijisari vamweni ngo kuthemba mujimu mucena wa Jehovha no Soko Rake.—2 Timoti 3:14-17.

Nyamasi uno, itusu takapuwavo cokwadi kuti ticumaere vamweni. (Mateu 28:19, 20) Itusu tingangwarira cokwadi ici cinosisira ngo kwenderera mberi teciita mukumbiro no kuva no cirovejeso co kujija Soko ra Mwari njiku jese. (VaRoma 12:11, 12; 1 Timoti 4:13, 15, 16) Zvingaita kuti tinobasa rimweni ratinoita mu ungano kana kutoshanda mu nguva yakazara. Basa rinosisira kudari rinodikana kutiita kuti tive vandhu vanojidodokesa, tecithemba besero ra Mwari. Ngokudaro, tingazokwanisa kukorondha cokwadi cedu ngo kucireremeja no kuthemba besero ra Jehovha pa kuita basero.

Basa rakapuwa Timoti aricaibatanijepi iyena basi. Raibatanijavo kujijisa vamweni, kuti vaite basa raaitaro. Pauro wakavhunja Timoti Kudari: “Bzo wakandizwa ndecibzinanga . . . , bzipekejei vandhu vakagondeka, vanotojanira kuzojijisa vamweni.” (2 Timoti 2:2) Pauro wakavhunja Timoti kuti ajijise vamweni zviro zvaainga akajija kuvha ku hama jimweni. Zvinosisira maningi nyamasi uno, kuvonavo vavonereri vese mu ungano yo Cikristu vaiciitavo zvakafanana. Muvonereri waushoni aavigi zivo yaanayo kuitira iyena basi. Kusiyapo izvo, iyena anojijisa vamweni kuti vakwanisevo kuita basero. Iyena aathyi kuti vamweni vanozobudirira maningi kupinda iyena ngo kukwanisa kuita mabasa amweni. Ngo kudaro, muvonereri anovajijisa zvese. Iyena anoda kubesera vese vaanojijisa kuti vasakurire mugariro jaushoni no kuva Makristu akaivha kumujimu. Ngo kuita kudaro, “vandhu vakagondeka” vaakajijisa vanozokwanisavo ushoni kubesera ungano.

Pacina kukana-kana, Timoti wakadakara maningi ngo karata yaakapuwari ndi Pauro. Zvakareruka maningi kurangarira Timoti eciverenga no kuverengazve mbhangiro jaakapuwa no kurangarira manera ajaizomubesera mu basi rake.

Kunanga kuti itusu tinodavo kushandisa mbhangiro iyi? Waro tingazviitisa kudini? Tinodikana kushanda ngo simba kuti tikhwindijire cipo cedu inga muriro, tikorondhe cokwadi cedu no kujijisa vamweni zvese zvatinoziva. Tikaita kudaro, inga zvakavhunjwa Timoti ndi Pauro, ‘tingaita kamare basa ro takapuwa.’—2 Timoti 4:5.