OHO kala wu uvite ngiini ngele wa yakula ontumwafo ya za kukuume koye kopothingo? Timoteus okwa li a nyolelwa kukuume ke, omuyapostoli Paulus. Ontumwafo ndjoka ngashingeyi oyi li mOmbiimbeli noya tseyika yi li embo lyaTimoteus omutiyali. Osha yela kutya Timoteus okwa li a kongo ehala li imwenenena, a leshe ontumwafo ndjoka. Otashi vulika a li ti ipula kutya, mbela Paulus oku li po ngiini? Mbela ota pe ndje omayele nkene ndi na okutala ko iinakugwanithwa yandje? Mbela ontumwafo otayi ka kwathela ndje ndi pondole miilonga yokuuvitha nondi kwathele yalwe? Timoteus okwa li a mono omayamukulo komapulo ngoka nokwi ilongo mo iinima oyindji ya simana. Ngashingeyi natu tale kiitsa yimwe mbyoka yi li montumwafo ndjika.

Sho Timoteus a lesha ontumwafo ye petameko, okwa li a mono kutya Paulus oku na ko nasha lela naye. Paulus okwi ithana Timoteus “omwana omuholike.” (2 Tim. 1:2) Otashi vulika Timoteus a li e na omimvo 30 nasha sho a yakula ontumwafo ndjoka lwomomumvo 65 E.N. Ethimbo ndyoka okwa adhika nale e li omukuluntugongalo a pyokoka. Okwa kala ta longo pamwe naPaulus uule womimvo dhi vulithe pomulongo, nokwi ilongo oshindji kuye.

Timoteus okwa li a tsuwa omukumo sho u uvu kutya Paulus oti idhidhimikile omahepeko ogendji. Paulus okwa li mondholongo muRoma, nokwa li e li pokudhipagwa. (2 Tim. 1:15, 16; 4:6-8) Timoteus okwa li e shi wete kutya Paulus oku li omulaadhi, sho a ti: “Otandi idhidhimikile iinima ayihe.” (2 Tim. 2:8-13) Ngaashi Timoteus, natse otatu vulu okuholela eidhidhimiko lyaPaulus.

Paulus okwa li a ladhipike Timoteus a kale a tala ko oshinakugwanithwa she shi na ongushu lela. Okwe mu ladhipike a ‘hwameke omaganohenda gaKalunga e ga pewa,’ ngoka ge li muye. (2 Tim. 1:6, OB-1954) Oshitya shOshigreka kharisma shoka sha tolokwa “omaganohenda,” otashi gandja edhiladhilo lyoshinima we shi pewa oshali nenge opunyu, noino gwana oku shi pewa. Timoteus okwa li a pewa omagano a kale ta kwathele egongalo momukalo gwi ikalekelwa. — 1 Tim. 4:14.

Omagano ngono Timoteus okwa li e na oku ga longitha ngiini? Uutumbulilo “hwameka omaganohenda gaKalunga we ga pewa,” otashi vulika we  mu dhimbulukitha kutya omulilo ngele itagu hohelwa ohagu vulu okudhima. Opo omakala ga teme oge na okukala taga pepelwa sigo omulilo gwa hwama. Embwiitya limwe olya ti kutya oshitya shOshigreka anazopyreo shoka Paulus a longitha otashi gandja edhiladhilo “lyokuhwameka, okutemununa, okufudhila omakala,” nohashi longithwa pathaneko okuningitha nokwiinyengitha omuntu a kale “natango omulaadhi miilonga ye.” Onkee ano, Paulus okwa li ta lombwele Timoteus kutya na kale i ‘itula mo miilonga ye.’ Ongiini mbela kutse kunena? Otu na okuninga naanaa sha faathana, natu longe twa tula ombunda moshihwa, opo tu kale aalaadhi miilonga yetu.

Sho Timoteus ta tsikile nokulesha ontumwafo ye ndjoka, okwi itsu ishewe muutumbulilo wumwe mboka tawu mu kwathele a kale ta pondola muukalele. Kuume ke Paulus okwe mu lombwele a ti: “Dhiginina omagano omawanawa ngoka we ga pewa koonkondo dhOmbepo Ondjapuki, ngoka e li mutse.” (2 Tim. 1:14) Omagano ngono oga li geni? Mbela Timoteus okwa li i inekelelwa shike? Movelise ndjoka ya tetekele, Paulus okwa popi “oohapu dhoshili,” oshili ndjoka tayi adhika mOmanyolo. (2 Tim. 1:13) Timoteus okwa li e na okuuvitha oshili megongalo nokondje yalyo, oshoka okwa li omuuvithi gwonkundana ombwanawa. (2 Tim. 4:1-5) Okwa li wo a langekwa po e li omukuluntugongalo a lithe oshigunda shaKalunga. (1 Pet. 5:2) Timoteus okwa li e na okukwata nawa oshili ndjoka e na okulonga yalwe, mokukala aluhe i inekela ombepo ondjapuki yaJehova nOohapu dhe. — 2 Tim. 3:14-17.

Kunena, natse otwi inekelelwa oshili ndjoka tu na okulonga yalwe sho tatu yu uvithile. (Mat. 28:19, 20) Inatu dhimbwa nando kutya oshili ndjoka oyi na ongushu lela. Shimwe ishewe, otu na okukala aluhe hatu galikana nokutsikila okukonakona Oohapu dhaKalunga. (Rom. 12:11, 12; 1 Tim. 4:13, 15, 16) Otashi vulika tu kale tu na iinakugwanithwa yontumba, ngaashi okuyakula tu li aakuluntugongalo nenge tu li miilonga yethimbo lyu udha. Ngele otu na iinakugwanithwa mbyono otu na okukala aaifupipiki, shoka tashi ulike kutya otwa pumbwa ekwatho lyaKalunga. Onkee ano, otu na okukala twa lenga iinakugwanithwa mbyoka Jehova e tu pa, nokukala twi inekela muye e tu kwathele.

Timoteus okwa li wo e na okudheula yamwe ya kale haya longo iilonga mbyoka e na. Paulus okwe mu lombwele a ti: “Dhiginina oohapu ndhoka u uvu tandi dhi uvitha. . . . Dhi gandja kaantu ye shi kwiinekelwa, mboka taa vulu oku dhi longa yakwawo.” (2 Tim. 2:2) Paulus okwa dhimbulukitha Timoteus a longe aamwatate iinima ayihe mbyoka e shi. Shono otashi tu longo shike kunena? Osha simana opo aakuluntugongalo ayehe ya ninge oonkambadhala ya kale haya dheula yalwe. Omukuluntugongalo ke na okuholeka nenge a ngungunine ontseyo ndjoka e na. Pehala lyaashono, oku na okudheula yalwe ya kale ye na owino yiinima mbyoka e shi. Ke na okukala a tila kutya otashi vulika mbono ta dheula ya ka kale ye na uunongo nenge uunkulungu wu vule we. Ke na owala oku ya pa ontseyo kohulo yoonyala, ihe oku na oku ya longa kehe shimwe. Elalakano lye okukwathela mboka ta dheula, opo ya kale ye na uupambepo uuwanawa, ya kale ye shi okuyoolola nokuninga omatokolo gopandunge. Kungawo, aalumentu mboka “ye shi kwiinekelwa” a dheula, otaya ka ambidhidha egongalo li shi endithe nawa.

Kapu na omalimbililo kutya Timoteus okwa li a pandula ontumwafo ndjoka a yakula, ya za kuPaulus. Otashi vulika Timoteus a li a lesha ontumwafo ndjoka lwiikando nokutedhatedha nkene ta vulu okutula miilonga omayele omawanawa ngoka ge li mo, e li omukuluntugongalo.

Natse otwa hala okutula miilonga omayele ngoka. Ngiini mbela? Natu tsikile okulonga nuudhiginini tu hwameke omaganohenda ngoka twa pewa, tu ga dhiginine, tu gandje owino ndjoka tu na nokulonga yalwe kehe shoka tu shi. Kungawo, otatu ka “gwanitha ayihe mokulongela Kalunga,” ngaashi Paulus a li a lombwele Timoteus. — 2 Tim. 4:5.