MUNOONA hai vaavaa munaakhelaanyu ekaarata yoothamalela enarweela wa nthamwene aphaama? Murummwa a Kristu Timoteo aahaakhela ekaarata ntoko yeela yoorweela wa murummwa Paulo, yeeyo nnasuwelaahu olelo ntoko liivuru a 2 Timóteo. Moohikhwa minikwa, Timoteo aahaavya nipuro noomaaleleya wi aalakhanye yeeyo aarepeliweiye ni nthamwene awe oosiveliwa. Akhweya Timoteo aahiikoha: ‘Apwanne Paulo mukumi? Apwanne Paulo ookhalano ekano aahaaleiye okivaha wi ekikhaviherye mu orummwa aka? Apwanne ekano ela enamukikhaviherya olaleerya, ohusiha phaama nave tho waakhaviherya akina?’ Hiihaa ntoko nnahaalaahu woona, Timoteo aahiphwanya maakhulo a makoho yaala ni ichu ikina soochuneya mweekaarata yeela. Mmwaha yoola, nnahaala ophwanya ikano sookhaviherya seiho inaphwanyeya mu ekaarata yeela.

Vaavaa Timoteo aalakhannyeiye masu oopacerya a ekaarata yeele, mwawaakuveya aahiwerya woona onthamwene wawaacameleya aareiyeno ni Paulo. Moosivela, Paulo aahimwiichana Timoteo wi “mwanaka kinookhwelaaka.” (2 Tim. 1:2) Woonaru vaavaa aakhenleiye ekaarata yeela arino iyaakha 30 mu eyaakha ya 65 E.K., Timoteo iiha ari mutokweene amavyakelo Eekristu. Owo aahikhala vamoha ni Paulo mu iyaakha sincipale nave aahihuserya ichu sincipale wa yoowo.

Woonaru, Timoteo aahilipiheya vancipale vaavaa aasuwenleiye wi Paulo aanavilela ni makacamiho awe moororomeleya. Paulo eera ari mukariposo o Roma, nave moohilekela aahaala wiiphiwa. (2 Tim. 1:15, 16; 4:6-8) Timoteo aahiwerya woona wi Paulo aari oolipa murima vaavaa aalonceiye ariki: “Kinnavilelano soothene.” (2 Tim. 2:8-13) Moolikana ni Timoteo, ovilela wa Paulo onanwerya onlipiha hiyaano.

Paulo aahimuceenyerya Timoteo wi ooneke murici awe mmuteko wa Muluku ntoko echu yasisapo. Paulo aachuna wi Timoteo ‘atetheerye ntoko mooro yamahala ya Muluku.’ (2 Tim. 1:6) Paulo aahipharihela nsu na Ekiriki khaʹri·sma nenlo ntaphuleliwe wi yamahala. Nsu nenla xaxaxa nnaloca sa yoovaha yamahala naari ehinamphwanela muchu. Timoteo aahaakhela yamahala yeela vaavaa aathanliweiye orumeela mmulokoni mmukhalelo wavameekhaaya.—1 Tim. 4:14.

 Echu taani Paulo aamuceenyenreiye Timoteo weera ni yamahala awe? Vaavaa Timoteo aalakhannyeiye masu awi ‘otetheeryeke ntoko mooro,’ woonaru owo aahuupuwela mooro yoowo achu yaakhalaayano yoowo wakhala ni makhala mancipale. Nto makhala awo yaaphwanela otetheeryiwa ni mawuuni wi ekumiherye makalume awaaca ni oviha. Diciyonaariyu mmoha olonce wi nsu na Ekiriki (a·na·zo·py·reʹo) nenlo Paulo opharihenleiye nnataphulela “opaciha wanaawiili, naari otetheerya” mmasu makina enataphulela “okhala oohakalala wi niphare muteko vyakala.” Mwawiihiiha, Paulo aamuleela Timoteo ariki: ‘Okhale a mvai mu orummwa aa!’ Olelo nnaphwanela weerano emohamoha—eyo tiwi okhala a mvai mu orummwa ahu.

Atitelelaka waalakhanya ekaarata ya nthamwene awe oosiveliwa, Timoteo aahiphwanya nsu nikina nenlo naahaala omukhaviherya okhumelela phaama mu orummwa awe. Paulo oorepa: ‘Othokororye eparipari yeeyo yaphaama wunnyeryeriwaa, mwa Munepa waweela yoowo onakhala mwa hiyo.’ (2 Tim. 1:14) Eyo yaari eparipari taani? Echu taani Timoteo annyereriweiye? Mu eversikulu ya 13, Paulo ooloca “mahusiheryo ookumi,” eparipari enaphwanyeya mu Soorempwa. (2 Tim. 1:13) Ntoko murummwa Eekristu, Timoteo aaphwanela olaleerya eparipari mmulokoni ni wa achu akina. (2 Tim. 4:1-5) Nave tho Timoteo aahithanliwa okhala mutokweene a mmulokoni wi akukhuleke ipucepuche sa Muluku. (1 Ped. 5:2) Timoteo aanwerya okhapelela eparipari awe—eparipari yeeyo aahusiheiye—moorweela wa ororomela munepa waweela wa Yehova ni Masu awe.—2 Tim. 3:14-17.

Olelo, hiyotho noonnyereryiwa eparipari yeeyo nnaahusihaahu akina. (Mat. 28:19, 20) Nnanwerya otitelela wooniherya othamalela ntakhara eparipari yeela yasisapo ni winnuwiha yookhovelela yaphaama ya ohuserya Masu a Muluku. (Aro. 12:11, 12; 1 Tim. 4:13, 15, 16) Nnanwerya okhalano murici wawaaceererya nrumeelaka ntoko mutokweene a mmulokoni naari muteko wa elukuluku yoothene. Eparipari ntoko yeela enaphwanela oneeriha okhala awiiyeviha, ni oneeriha omuroromela Muluku wi anikhaviherye. Mwawiihiiha, nnanwerya okhapelela eparipari ahu yeela moorweela wa ovaha esisapo ni ororomela nikhaviheryo na Yehova.

Mirici seiyo Timoteo aakhenleiye haaphwanela okhalano mukhateiye. Owo aaphwanela waavyakiha akina wi emukhaviheryeke muteko yoowo aapakeiye. Ti nthowa nene Paulo aamuceenyenryeiye Timoteo ariki: “Yeeyo ohusenryaa wa miyo . . . owunnyererye achu oororomeleya oowerya waahusiha akina tho.” (2 Tim. 2:2) Paulo aahimuupuxerya Timoteo wi ahusihe ichu soothene seiyo aahusenryeiye wa anna akina. Ela ti yoochuneya wa ooweherya ori oothene mmuloko Weekristu olelo otitelela weerano emohamoha. Ooweherya aphaama hanavitha echu osuwenleiye vooloca sa muteko vyakala. Ohiya yeeyo owo onnaahusiha akina wi ewerye opaka muteko owo. Owo hanoovelela wi akina anahaala osuwela sincipale vooloca sa muteko owo, opaka phaama ompwaha yene. Mwawiihiiha, ooweherya hanoona pahiru omuhusiha muchu ichu soopacerya. Owo onnaakhaviherya yaawo onaavyakiheiye winnuwiha makhalelo aphaama—ni okhala Akristu awiichwelavo. Mmukhalelo yoola, achu oororomeleya anahaala owerya okhaviherya muloko moopwahaxa.

Moohikhwa minikwa Timoteo aahilipiheya ni ekaarata yoolopola yeeyo aakhenleiye orweela wa Paulo. Nnanwerya omwaanyiherya Timoteo aalakhanyaka mwawuuluulela ekano ele yasisapo, ni wuupuwelela mukhalelo aahaaleiye opharihela mu orummwa awe.

Hiyotho nnaphwanela opharihela ekano yeela. Mwawiihai? Nnanwerya olapa mwakuru wi ntetheere ntoko mooro, okhapelela eparipari ahu, ni waahusiha akina soothene seiho nsuwenlaahu. Mmukhalelo yoola, hiiha ntoko Paulo aamulenleiye Timoteo, nnanwerya ‘okhwaaniherya muteko ahu.’—2 Tim. 4:5.