¿KENON timomachilia ijkuak se moamigo akin melak mitstlasojtla mitsmaka se carta? Apóstol Pablo okimakak Timoteo se carta tlen melak okiyolchikauj. Yejuin amatlajkuilojli onka ipan Biblia niman tikixmatij ken Segunda Carta a Timoteo. Kuajli tikmatstokej ika Timoteo sa kinektoya yas kampa ika iyojlo ueliskia kiamapouas yejon amatlajkuilojli. Timoteo kanaj notlajtoltiaya: “¿Kenon nemi Pablo? ¿Kanaj nechijlis kenon uelis más kuajli nikchiuas notekiyo tlen nikpiya ipan tlanechikojli? ¿Nechpaleuis yejuin amatlajkuilojli más kuajli manitenojnotsa niman más kuajli manikinpaleui oksekimej?”. Yejuin amatlajkuilojli melak okipaleui makasikamati nochi tlen notlajtoltiaya. Matikitakan tlenon okijkuilouilijkej Timoteo.

Ijkuak Timoteo opeuj kiamapoua yejon amatlajkuilojli, nimantsin okasikamat ika Pablo melak kitlasojtlaya. Pablo okijli ika kitaya ken itlasojkakoneuj (2 Tim. 1:2). Timoteo okiseli yejuin amatlajkuilojli kanaj ipan xiuitl 65, ijkuakon, yejua kipiaya ipantsin 30 xiuitl niman youejkaujka ken tlayekanketl. Yejua yotekitka iuan Pablo ipantsin majtlaktli xiuitl niman miyek tlemach itech youelka.

Kuajli tikmatstokej ika Timoteo oyolpak ijkuak okimat ika Pablo kuajli ken kitekichiuilijtoya Jehová maski kixnamiktoya tlen ouijtika. Pablo tsauktoya ne Roma, niman sa achijtsin poliuiya ijkuak kimiktiskiaj (2 Tim. 1:15, 16; 4:6-8). Timoteo kuajli okasikamat ika Pablo melak yolchikauak katka pampa Pablo okijkuilo: “Nikijyouiya nochi tlajtlamach” (2 Tim. 2:8-13). Timoteo melak onoyolchikauj ijkuak okitak kenon Pablo tlaxikojtoya, niman tejuamej noijki uelis techyolchikauas.

Pablo okiyolchikauj Timoteo makipatiojkaita tlen kichiujtoya ipan tlanechikojli. Pablo okijli Timoteo: “Xtekitilti on tetlayokolijli yejuan Dios omitsmakak” (2 Tim. 1:6). Timoteo okiselijka yejuin “tetlayokolijli” noso tekitl ijkuak okitlapejpenijkej makichiua se ueyi tekitl ipan tlanechikojli (1 Tim. 4:14).

¿Tlenon nonekiya kichiuas Timoteo ika yejuin “tetlayokolijli”? Matikilnamikikan ika Pablo okijkuilouili: “Xtekitilti on tetlayokolijli yejuan Dios omitsmakak”. Ika griego, yejuin tlajtoltin uelis notlajtolkuepaskej ken “más xtlikuilti itliyo yejon itetlayokolil toTajtsin”. Pablo kanaj otlanemili itech tlen panouaya ijkuak sekimej tlatlatiayaj inkalijtik  niman ijkon matlatotonixto. Pampa ika yolik seujtiaya yejon tlitl niman san tlixochtli nokaujtiaya, nonekiya más kitlikuiltiskej noso kitlatokiliskej niman ijkon maka maseui. Se diccionario kijtoua ika yejon tlajtojli griego (anazōpyréō) tlen Pablo nikan okitekitilti kijtosneki “oksejpa tiktlikuiltis” noso “oksejpa chikauak peuas titekitis”. Pablo kentla kijliskia Timoteo: “Xchiua motekiyo ika nochi moyojlo”. Ipan yejuin tonajli, tejuamej noijki noneki tiktekichiuiliskej Jehová ika nochi toyojlo.

Ijkuak Timoteo kiamapoujtoya on amatlajkuilojli tlen Pablo okijkuilouili, okinnexti seki tlajtoltin tlen kipaleuiskiaj más kuajli makichiua itekiyo. Pablo okijkuilouili: “Xkejeua on kuajli temachtijli ika ipoder on Espíritu Santo” (2 Tim. 1:14). ¿Katlejua “temachtijli” okimakakaj Timoteo? Ipan tlaxelojli 13 Pablo tlajtotoya itech “on kuajli temachtilistli”, kijtosneki on tlen melauak temachtia Biblia (2 Tim. 1:13). Pampa Timoteo kichiuaya tlen Cristo otlanauati, xsan ipan tlanechikojli nonekiya temachtis on tlen melauak (2 Tim. 4:1-5). Yejua noijki nonekiya kitlajpiyas tlanechikojli pampa se tlayekanketl katka (1 Ped. 5:2). ¿Tlenon kipaleuiskia makejyeua noso makitlajpiya yejon “temachtijli” tlen yokimakakaj? ITlajtol toTajtsin niman espíritu santo (2 Tim. 3:14-17).

Tejuamej noijki yotikselijkej se “temachtijli”, kema, yotechmachtijkej on tlen melauak niman ijkon matikinmachtikan oksekimej (Mat. 28:19, 20, TNM). ¿Tlenon techpaleuis maka matikilkauakan ika melak ueyi kijtosneki tlen yotechmachtijkej? Tla nochipa tikchiuaj teoyotl niman tla mojmostla tomachtiaj iTlajtol toTajtsin (Rom. 12:11, 12; 1 Tim. 4:13, 15, 16). Kanaj tejua titlayekanketl ipan se tlanechikojli noso chikauak tiktekichiuilia toTajtsin. Tla tejuamej tikpiyaj yejuin tekitl, noneki tiyolyemankej yeskej. Noijki noneki tiktlajtlaniliskej toTajtsin matechpaleui kuajli matikchiuakan totekiyo tlen tikpiyaj ipan tlanechikojli. Tla ijkin tikchiuaj, tikteititiskej ika melak tiktlasojkaitaj tlen yotechmachti toTajtsin.

Timoteo noijki nonekiya kinmachtis oksekimej. Yejua ika, Pablo okijli Timoteo: “On tlen yotinechkakilij [...], xkinnauati on tlakamej yolmelajkej yejuan uelij kuajli temachtiaj para yejuamej ma temachtikan” (2 Tim. 2:2). Pablo kilnamiktijtoya Timoteo ika yejua nonekiya kimititis oksekimej nochi tlen yokimachtijkaj. Aman, tlayekankej noijki noneki nokojtiliskej ijkon kichiuaskej ipan tlanechikojli. Se kuajli tlayekanketl kimititia oksekimej kenon noneki nochiuas se tekitl. Yejua xkajmana tla yakaj más kimatstika noso más kuajli kichiua yejon tekitl. Yejua melak kuajli kiteititia kenon noneki nochiuas se tekitl. Ijkon kichiua pampa kineki ika akin kinmachtia kuajli mauelikan. Ijkon, akin kinmachtijtokej uelis más tlapaleuiskej ipan tlanechikojli.

Kuajli tikmatstokej ika Timoteo okitlasojkamat iamatlajkuilol Pablo. San matikonnemilikan kenon Timoteo miyekpa kiamapouaya yejon amatlajkuilojli niman kinemiliaya kenon kichiuas tlen ompa ijkuiliujtok.

Tejuamej noijki tiknekij tikchiuaskej tlen Pablo okijkuilo. ¿Kenon uelis tikchiuaskej? Tla tokojtiliaj tikchiuaskej totekiyo ika nochi toyojlo, tla tiktlasojkaitaj tlen yotechititijkej niman tla tikinmachtiaj oksekimej. Tla tikchiuaj tlen Pablo okijli Timoteo, kuajli tikchiuaskej totekiyo tlen Jehová yotechmakak ipan ikalpan (2 Tim. 4:5).